Home ព័ត៌មានជាតិ សង្គម មនុស្ស​២​នាក់...

មនុស្ស​២​នាក់​បាន​ស្លាប់ និង​១៣​នាក់​ផ្សេងទៀត​កំពុង​សង្គ្រោះ ដោយ​ការសង្ស័យថា បាន​ពុល​ផឹកទឹក​អណ្ដូង​

ដោយ​: ទេ​ពក​ង្រី / ខេត្តកំពង់ឆ្នាំង​: ស្ត្រី ២​នាក់​បាន​ស្លាប់ និង​១៣​នាក់​ផ្សេងទៀត ត្រូវបាន​គេ​ដឹក​យកទៅជួយ​សង្គ្រោះបន្ទាន់​នៅ​មន្ទី​ពេទ្យ​បង្អែក​ខេត្ត ដោយមាន​ការសង្ស័យថា បណ្ដាលមកពី​ពុល​ទឹក​អណ្តូង ដែល​អ្នក​ទាំង​នោះបាន​ផឹក​ក្រោយពេល​សម្រាក​ហូបបាយ​។

​នៅ​ព្រឹក​ថ្ងៃទី​២៧ ខែវិច្ឆិកា ឆ្នាំ​២០២០ នេះ អភិបាលខេត្ត​កំពង់ឆ្នាំង លោក ឈួ​រ ច័ន្ទ​ឌឿ​ន បាន​អញ្ជើញ​ទៅ​ចូលរួម​រំលែក​ទុក្ខ និង​ចូល​បច្ច័យ​ក្នុង​ពិធី​បុណ្យសព​ដល់​គ្រួសា​ជនរងគ្រោះ​ទាំងពីរ​នាក់​។ ជាមួយគ្នានេះដែរ អភិបាលខេត្ត​កំពង់ឆ្នាំង​ក៏បាន​ចាត់​ឲ្យ​មន្ត្រី​ជំនាញ​ខេត្ត​ស្រុក​ចុះទៅពិនិត្យ​ដល់​កន្លែងកើតហេតុ នៅ​ចំណុច​អណ្ដូងទឹក​មួយកន្លែង ដែល​ស្ថិតនៅ​ក្នុងភូមិ​ជី​ប្រង ឃុំ​ជៀប ស្រុក​ទឹកផុស ខេត្តកំពង់ឆ្នាំង​។​

​គួ​រំលឹក​ផងដែរ​ថា កាលពី​ថ្ងៃទី​២៥ ខែវិច្ឆិកា ឆ្នាំ​២០២០ កន្លងទៅ​ថ្មីៗ ប្រជាពលរដ្ឋ​ដែលជា​អ្នកភូមិ​រស់នៅ​ក្នុងភូមិ​ជី​ប្រង ឃុំ​ជៀប ស្រុក​ទឹកផុស បាននាំគ្នា​ទៅ​ច្រូតស្រូវ​នៅ​ចំណុច​អូររូង​។​

​សេចក្តីរាយការណ៍​ពី​ប្រជាពលរដ្ឋ​ដែលជា​អ្នករងគ្រោះ​កំពុង​សំរាក​នៅក្នុង​មន្ទីរពេទ្យ​ខេត្តកំពង់ឆ្នាំង បាន​ប្រាប់​អ្នក​សារព័ត៌​ឲ្យ​ដឹង​នៅក្នុង​មន្ទី​ពេទ្យ​នៅ​ព្រឹក​ថ្ងៃទី​២៧ ខែវិច្ឆិកា​២០២០ នេះ​ថា នៅ​ព្រឹក​នោះ​ក្រោយពី​ការ​ច្រូត​រួច ប្រជាពលរដ្ឋ​ចំនួន​១៥​នាក់ បាននាំគ្នា​សម្រាក ពិសា​របាយ​ជុំគ្នា ដោយ​ម្ចាស់​ស្រែ បានធ្វើ​ម្ហូប​មាន​សម្លរ ក្តាមស្រែ និង​ឪឡឹក​ទុំ ពេល​ពិសា​បាយ​រួច ក៏​នាំគ្នា​ពិសារ​ទឹក​ក្នុង​ពី​ដុង ដែល​ម្ចាស់​ស្រែ​ដាក់​មក​តាម លុះដល់​ពេល​អស់ ទឹក​នៅក្នុង​ពី​ដុង ម្ចាស់​ទៅ​ដងទឹក​អណ្ដូង​ដៃ​ដាក់​ក្នុង​ពី​ដុង យកមកចែក​គ្នា​ផឹក​បន្តទៀត​។ ថ្ងៃនោះ ក្រោយពី​នាំគ្នា​ត្រឡប់មកផ្ទះ​វិញ ស្រាប់តែ​នាំ​មាន​អាកា​រៈ ធី​ង​ធោ​ង វិលមុខ ក្អួតចង្អោរ​រាគ ហើយ​ម្ចាស់​ស្រែ ដែលមាន​ឈ្មោះ​ណុល វ៉ា​រ៉ុ​ម ភេទ​ស្រី អាយុ ៤៥​ឆ្នាំ ក៏បាន​ស្លាប់បាត់​បង់ជីវិត​។

​ប្រភព​បន្តថា នៅ​ថ្ងៃ​បន្ទាប់ ទី​២៦​ខែវិច្ឆិកា ជនរងគ្រោះ​ទាំងអស់ ត្រូវបាន​ដឹក​យកមក​សង្គ្រោះ​នៅ​មន្ទីរពេទ្យ​ខេត្តកំពង់ឆ្នាំង ប៉ុន្តែ​ដោយសារ​ស្ថានភាព​ធ្ងន់ធ្ងរ​ពេក នៅ​យប់នោះ​ផងដែរ ស្ត្រី​ម្នាក់ទៀត​ឈ្មោះ ម៉ៅ ចិន្តា អាយុ ៤៧​ឆ្នាំ ក៏បាន​ស្លាប់​នៅក្នុង​បន្ទប់សង្គ្រោះបន្ទាន់​។

​ដោយឡែក មន្ទីរ​សុខាភិបាល​ខេត្តកំពង់ឆ្នាំង នៅថ្ងៃនេះ​មិនអាច​ទំនាក់ទំនង​សាកសួរ​ជុំវិញ​មូលហេតុ ដែល​បណ្ដាល​ឲ្យ​មាន​គ្រោះថ្នាក់​ដល់​ជីវិត​មនុស្ស​នោះទេ បើទោះបី​មានការ​ព្យាយាម​ពី​ក្រុម​អ្នកសារព័ត៌មាន​យ៉ាងណាក៏ដោយ ហើយ​អ្វីដែល​ជាការ​ចាប់អារម្មណ៍​ទៀត​នោះ រឿង​កើតហេតុ​ខាងលើនេះ តាំងពី​ថ្ងៃទី​២៥ ប៉ុន្តែ​ទើប​មានការ​ផ្ទុះ​នៅ​ថ្ងៃទី​២៧ គ្រា​ដែលមាន​មនុស្ស​ស្លាប់​នៅក្នុង​មន្ទីរពេទ្យ​ខេត្ត គឺ​ហាក់ដូចជា​មានការ​លាក់លាម​អ្វីមួយ​ផងដែ​ត​។​

​ទោះជា​យ៉ាងនេះ​ក្តី តាម​ការបញ្ជាក់​ពី​សមត្ថកិច្ច និង​អាជ្ញាធរ​មូលដ្ឋាន បាន​ឲ្យ​ដឹងថា ទឹក​អណ្ដូង​ដែល​ពួកគាត់​ប្រើ​គឺជា​ទឹក​អណ្ដូង​ដៃ ហើយ​នៅ​ជិត​នោះ​មាន​ចម្ការឪឡឹក ដែល​គេ​សង្ស័យថា អ្នកចម្ការ​ប្រើប្រាស់​ទឹក​អណ្ដូង​នេះ​ដើម្បី​លាយថ្នាំ​សម្រាប់​បាញ់ថ្នាំ​សម្លាប់​សត្វល្អិត ទើប​បណ្ដាល​ឲ្យ​មាន​ការពុល​បែបនេះ​ដល់​មនុស្ស​ជាច្រើន​យ៉ាងនេះ​។​

​ក្រោយ​កើតហេតុ នៅ​កន្លែងកើតហេតុ ក៏ត្រូវ​បានធ្វើ​ការព័ទ្ធ​ខ្សែ និង​បានដាក់​ស្លាក​បំរាម​ហាម​មិន​ឲ្យ​មានការ​ប្រើប្រាស់​ទឹក​អណ្ដូងនោះ​បន្តទៀត​ផងដែរ​៕​

ទីតាំងផ្សាយពាណិជ្ជកម្ម

- Advertisment -

Most Popular