Home ព័ត៌មានអន្តរជាតិ អ៊ីរ៉ង់​ចោទ​អ...

អ៊ីរ៉ង់​ចោទ​អ៊ីស្រាអែល​ថា​សម្លាប់​អ្នកវិទ្យាសាស្ត្រ​កំពូល​របស់​ខ្លួន និង​ប្តេជ្ញា​សងសឹក​

​ប្រែ​សម្រួល : កញ្ញា​ដា​លី​ស​/​តេ​អេ​រ៉ង់ ៖ អ៊ីរ៉ង់​បាន​និយាយ​ថា​អ្នកវិទ្យាសាស្ត្រ​នុយក្លេអ៊ែរ​លេចធ្លោ​ជាង​គេ​ម្នាក់​របស់ខ្លួន​ត្រូវបាន​ធ្វើ​ឃាត​កាលពី​ថ្ងៃ​សុក្រ​ទី​២៧​វិច្ឆិកា​នៅក្នុង​ការវាយប្រហារ​មួយ​នៅ​ខាងក្រៅ​ទី​ក្រុងតេអេ​រ៉ង់ ដោយ​ស្តីបន្ទោស​លើស​ត្រូវ​សួ​ពូជ​របស់​ខ្លួន​គឺ អ៊ីស្រាអែល និង​ព្រមាន​អំពី “​ការ​សងសឹក​ធ្ងន់ធ្ងរ​”​។​

​ការធ្វើឃាត​នេះ​បាន​គំរាម​បង្កើន​ភាព​តានតឹង​រវាង​អ៊ីរ៉ង់​និង​អាម៉េរិក​និង​សម្ព័ន្ធមិត្ត​ជិតស្និទ្ធ​របស់ខ្លួន​គឺ​អ៊ីស្រាអែល ជាមួយ​ការព្រមាន​មួយចំនួន​អំពី​ហានិភ័យ​នៃ​ជម្លោះ​ធំ​នៅ​មជ្ឈិមបូព៌ា​។​

​ក្រសួង​ការពារជាតិ​អ៊ីរ៉ង់​និយាយថា លោក ម៉ូ​សិន ហ្វា​គ្រីហ្សា​ដេ អាយុ ៥៩ ឆ្នាំ “​បាន​រងរបួស​យ៉ាងធ្ងន់ធ្ងរ​” នៅពេល​ដែល​ក្រុម​អ្នក​វាយប្រហារ​បាន​ផ្តោត​គោលដៅ​មក​លើ​រថយន្ត​របស់​គាត់ មុន​ពេល​បាញ់ប្រហារ​ជាមួយ​អង្គរក្ស​របស់​គាត់​។​

​ក្រសួង​បាន​បន្ថែមទៀតថា លោក​ហ្វា​គ្រីហ្សា​ដេ ដែល​ជា​ប្រធាន​អង្គការ​ស្រាវជ្រាវ​និង​ច្នៃប្រឌិត​របស់​ក្រសួង ក្រោយមក​បាន​ស្លាប់ បន្ទាប់​ពី​គ្រូពេទ្យ​មិន​អាច​សង្គ្រោះ​ជីវិត​គាត់​បាន​។​

​សហរដ្ឋ​អាម៉េរិក​បាន​ដាក់​ទណ្ឌកម្ម​ទៅលើ​លោក​ហ្វា​គ្រីហ្សា​ដេ​ក្នុង​ឆ្នាំ ២០០៨ ចំពោះ “​សកម្មភាព​និង​ប្រតិបត្តិការ​នានា​ដែល​រួមចំណែក​ដល់​ការអភិវឌ្ឍ​កម្មវិធី​នុយក្លេអ៊ែរ​របស់​អ៊ីរ៉ង់​” ហើយ​នាយក​រដ្ឋមន្ត្រី​អ៊ីស្រាអែល​លោក បេន​ចា​មីន ណេ​តាន់​យ៉ា​ហ៊ូ ធ្លាប់​បាន​ចាត់ទុក​លោក​ជា​បិតា​នៃ​កម្មវិធី​អាវុធ​នុយក្លេអ៊ែរ​របស់​អ៊ីរ៉ង់​។​

​លោក​ហ្វា​គ្រីហ្សា​ដេ​ត្រូវបាន​គេ​វាយប្រហារ នៅពេល​ធ្វើដំណើរ​ក្បែរ​ទីក្រុង​អា​ប់សាដ​ក្នុង​តំបន់​ដា​ម៉ា​វ៉ាន់​ស្ថិត​នៅ​ភាគ​ខាងកើត​ទី​ក្រុងតេអេ​រ៉ង់​។​

​អ្នកយក​ព័ត៌មាន​របស់​ទូរទស្សន៍​រដ្ឋ​មួយរូ​បបាន​និយាយថា ឡាន​ដឹក​ទំនិញ​មួយគ្រឿង ដែល​ផ្ទុក​គ្រឿងផ្ទុះ​លាក់​នៅក្រោម​គំនរ​ឈើ បាន​ផ្ទុះ​នៅ​ពីមុខ​ឡាន​របស់គាត់ មុន​ពេល​រង​ការ​បាញ់ស្រោច​ដោយ​កាំភ្លើង​ចេញពី​រថយន្ត SUV មួយគ្រឿង​។​

​រូបភាព​ពី​កន្លែងកើតហេតុ​បានបង្ហាញ​ឡាន​ខ្មៅ​មួយ​គ្រឿង​ស្ថិតនៅ​ផ្នែក​ម្ខាង​នៃ​ដងផ្លូវ និង​កញ្ចក់​មុខ​របស់​វា​ត្រូវ​ធ្លុះ​ដោយ​គ្រាប់កាំភ្លើង​។ ថ្លុកឈាម​ក៏​ឃើញ​នៅ​លើ​ដងផ្លូវ​ផងដែរ​។​

​រដ្ឋមន្ត្រីការបរទេស​អ៊ីរ៉ង់​លោក ចា​វ៉ាដ ហ្សារី​ហ្វ និយាយថា មាន​ការចង្អុលបង្ហាញ​យ៉ាងខ្លាំង​ថា អ៊ីស្រាអែល​មាន​តួនាទី​នៅក្នុង​ការធ្វើឃាត​នេះ​។​

​លោក​បាន​សរសេរ​នៅលើ Twitter ថា “​ពួក​ភេរ​វករ​បាន​ធ្វើ​ឃាត​អ្នកវិទ្យាសាស្ត្រ​លេចធ្លោ​របស់​អ៊ីរ៉ង់​នៅថ្ងៃនេះ​។ ភាព​កំសាកញី ជាមួយ​ការចង្អុលបង្ហាញ​យ៉ាងខ្លាំង​នៃ​តួនាទី​របស់​អ៊ីស្រាអែល បង្ហាញ​អំពី​ភាព​ល្មោភ​សង្គ្រាម​របស់​ជនល្មើស​”​។​

​លោក​ហ្សារី​ហ្វ​អំពាវនាវ​ឱ្យ​សហគមន៍​អន្តរជាតិ​ថ្កោលទោស​អំពើ​ភេរវកម្ម​នេះ​។​

​កាសែត​ញូវយ៉ក​ថែមស៍​និយាយថា មន្ត្រី​អាម៉េរិក​ម្នាក់​និង​មន្ត្រី​ចារ​កម្ម​ពីរ​នាក់​ទៀត​បាន​បញ្ជាក់​ថា អ៊ីស្រាអែល​ស្ថិតនៅ​ពីក្រោយ​ការវាយប្រហារ​នេះ ដោយ​មិន​ផ្តល់​ព័ត៌មាន​លម្អិត​បន្ថែ​ម​នោះទេ​៕

​លោក ម៉ូ​សិន ហ្វា​គ្រីហ្សា​ដេ ត្រូវ​គេ​ធ្វើឃាត​នៅ​ក្រៅ​ក្រុងតេអេ​រ៉ង់​កាលពី​ថ្ងៃ​សុក្រ​ទី​២៧​វិច្ឆិកា

ទីតាំងផ្សាយពាណិជ្ជកម្ម

- Advertisment -

Most Popular