ដោយៈ ញ៉ែម សុផល/ភ្នំពេញ៖ សួនបណ្ដុំសហគ្រាសធុនតូចនិងមធ្យម បានត្រូវបង្កើតឡើងដើម្បីគៀរគរសហ គ្រាសចូលរួមជាចង្កោមតែមួយក្នុងគោលបំណងមកស្ថិតនៅទីតាំងតែមួយងាយស្រួលគ្រប់គ្រងនិងដោះស្រាយ បញ្ហាប្រឈម។ សួនបណ្ដុំសហគ្រាសធុនតូចនិងមធ្យមទើបនឹងចាប់ផ្តើមសាងសង់នេះ នឹងជំរុញឱ្យវិស័យសហគ្រាសធុនតូច និងមធ្យមឈានទៅមុខមួយកម្រិតទៀតនៅពេលសួននេះដាក់ដំណើរការនៅពេលខាងមុខនេះ។
ថ្លែងនៅក្នុងពិធីបញ្ចុះបឋមសីលាការដ្ឋានសង់សួនបណ្ដុះសហគ្រាសធុនតូចនិងមធ្យមនៅព្រឹកថ្ងៃទី២៧ វិច្ឆិកា២០២០ នៅទីក្រុងរណបសិរីមង្គលក្រុងតាខ្មៅ លោកឧកញ៉ាសៀ ឬទ្ធី ប្រធានក្រុមប្រឹក្សាភិបាលក្រុមហ៊ុនវើលដ៏ប្រ៊ីដ បានមានប្រសាសន៍ថា សួនបណ្ដុំសហគ្រាសធុនតូច និងមធ្យម គឺជាមជ្ឈមណ្ឌលសេវាកម្ម ពាណិជ្ជកម្មការិយាល័យច្រកចេញចូលតែមួយជាមជ្ឈមណ្ឌលហ្វឹកហ្វឺន មន្ទីរពិសោធន៍ មណ្ឌលសន្និសីទនិងជាកន្លែងដែលផ្ដល់សេវាកម្មជាច្រើនទៀត សម្រាប់ម្ចាស់សហគ្រាសដែលចូលមកដាក់ទីតាំងនៅក្នុងសួនមួយនេះ ។
លោកឧកញ៉ាបានបន្តថាវានឹងផ្ដល់អត្ថប្រយោជន៍ដល់សហគ្រាសធុនតូច និង មធ្យមឬសហគ្រិននានាឱ្យយល់ដឹងពីសារសំខាន់ក្នុងការបង្កើតជាចង្កោមខ្សែច្រវ៉ាក់ផលិតកម្មពេញលេញនិងឆ្លើយតបឱ្យគ្នាទៅវិញទៅមកដែលមានលក្ខណៈជាប្រព័ន្ធអេកូឡូស៊ីនៅក្នុងសួនបណ្ដុំសហគ្រាសធុនតូចនិងមធ្យមវើលដ៏ប្រ៊ីដ ។
លោកឧកញ៉ាបានបន្តថា៖តាមរយៈការវិនិយោគជាផ្លូវការលើសេវាកម្មដែលមានស្ដង់ដារ និងហេដ្ឋារចនាសម្ព័ន្ធ ដែលអាចជឿទុកចិត្តបានសម្រាប់សហគ្រាសធុនតូចនិងមធ្យមនេះខ្សែច្រវ៉ាក់ផលិតកម្មពិតជាអាចលើកស្ទួយផ្ដល់តម្លៃ បង្កើតធនធានចំណេញពេលវេលា មានស្មារតីច្នៃប្រឌិតផលិតកម្មនិងការគ្រប់គ្រងប្រកបដោយគុណភាពនិងប្រសិទ្ធភាពក្នុងការចំណាយ។
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា៖ការសាងសង់សួនបណ្ដុំសហគ្រាសធុនតូចនិងមធ្យមនៅពេលនេះ វានឹងជួយដល់សហគ្រិននានា ក្នុងការពង្រឹងគុណភាពផលិតផល ហើយក៏អាចផលិតនូវផលិតផលប្រកួតប្រជែងជាមួយទីផ្សារបរទេសផងដែរ។
ឯកឧត្តមបានជំរុញឱ្យអ្នកផលិតទាំងឡាយ គួរផលិតនូវទំនិញដែលប្រើបច្ចេកវិទ្យាចុងក្រោយ ស្របតាមស្តង់ដារអន្តរជាតិ ហើយវានឹងធ្វើឱ្យសហគ្រាសធុនតូចនិងមធ្យមនៅកម្ពុជាកាន់តែមាកេរ្តិ៍ឈ្មោះលើទីផ្សារអន្តរជាតិ ។
បើតាមលោកឧកញ៉ា តែ តាំងប៉រ ប្រធានសម្ព័ន្ធសហគ្រាសធុនតូច និងមធ្យមកម្ពុជា បានថ្លែងថា វាជារឿងល្អណាស់ដែលកម្ពុជាមានសួនបណ្ដុំសហគ្រាសនេះ ព្រោះវាអាចជួយដល់ម្ចាស់អាជីវកម្ម នៅទីតាំង បញ្ហាប្រឈមនានា ជាពិសេសគឺវាមានភាពងាយស្រួលសម្រាប់រដ្ឋាភិបាលក្នុងការជួយសហគ្រិននៅតែមួយកន្លែង។
សូមជម្រាបថា៖សួនបណ្តុំសហគ្រាសធុនតូចនិងមធ្យម មានទីតាំងស្ថិតនៅភូមិកោះគ សង្កាត់រកាខ្ពស់ ក្រុងតាខ្មៅ ខេត្តកណ្តាល។ គម្រោងសាងសង់នេះ មានរយៈពេល ៨ ខែ និងគ្រោងបញ្ចប់នៅឆ្នាំចុងឆ្នាំ ២០២១៕ph
សួនបណ្តុំសហគ្រាសធុនតូចនិងមធ្យម ស្ថិតនៅភូមិកោះគ សង្កាត់រកាខ្ពស់ ក្រុងតាខ្មៅ ខេត្ត កណ្តាល