Home ព័ត៌មានអន្តរជាតិ ប្រធានាធិបតី​...

ប្រធានាធិបតី​ប្រេ​ស៊ីល​ថា​គាត់​នឹង​មិន​ចាក់​វ៉ាក់សាំង​កូវី​ដ​១៩​ទេ ហើយ​ថា​ការពាក់​ម៉ាស់​ជា​រឿង​មិន​គួរ​ធ្វើ​

​ប្រែ​សម្រួល : កញ្ញា​ដា​លី​ស​/​សៅ​ប៉ូ​ឡូ ៖ ប្រធានាធិបតី​ប្រេ​ស៊ី​លលោក ជែរ បូល​សូ​ណារ៉ូ និយាយថា លោក​នឹង​មិន​ចាក់​វ៉ាក់សាំង​ការពារ​ជំងឺ​កូវី​ដ​១៩​នោះ​ឡើយ​ហើយ​លោក​បាន​ហៅ​ការប្រើ​ម៉ាស់​ដើម្បី​ទប់​​ស្កាត់​ការរីក​រាលដាល​នៃ​ជំងឺ​នេះ​ថា​ជា “​រឿង​មិន​គួរ​ធ្វើ​”​។​

​ការអត្ថាធិប្បាយ​របស់​លោក​បូល​សូ​ណារ៉ូ ដែល​បាន​ចាក់ផ្សាយ​លើ​បណ្តាញ​សង្គម​របស់​គាត់​កាលពី​យប់​ថ្ងៃ​ព្រហស្បតិ៍ បានធ្វើឱ្យ​អ្នកជំនាញ​ផ្នែក​សុខភាព​មាន​ការព្រួយបារម្ភ​ថា​វា​អាច​ធ្វើឱ្យ​អន្តរាយ​ដល់​កិច្ច​​ខិតខំ​ប្រឹងប្រែង​ដើម្បី​សម្រេចបាន​នូវ​កម្រិត​នៃ​ការចាក់​វ៉ាក់សាំង​ចាំបាច់​ដើម្បី​បញ្ឈប់​ការរីក​រាលដាល​នៃ​ជំងឺ​រាតត្បាត និង​អាច​បន្លាច​ដល់​អ្នក​ផលិត​វ៉ាក់សាំង​មិនឱ្យ​ហ៊ាន​មក​ចរចា​ជាមួយ​អាជ្ញាធរ​​ក្នុងស្រុក​។​

​ទោះយ៉ាងណា លោក​បូល​សូ​ណារ៉ូក៏​បាន​និយាយ​ដែរ​ថា រាល់​វ៉ាក់សាំង​ណាមួយ ដែល​បញ្ជាក់​ដោយ​ទីភ្នាក់ងារ​សុខភាព​ប្រេ​ស៊ីល នឹង​ផ្តល់ជូន​សាធារណជន​ដោយ​ឥតគិតថ្លៃ​។​

​ប្រធានាធិបតី​ប្រេ​ស៊ីល ដែល​ឆ្លង​វីរុស​កូរ៉ូណា​កាលពី​ខែ​កក្កដា​បានប​ដិ​សេធ​នឹង​ដំបូន្មាន​របស់​អ្នកវិទ្យាសាស្ត្រ​និង​អ្នកជំនាញ​សុខភាព​ជា​យូរ​មក​ហើយ​ក្នុង​ការដាក់កំហិត​ទៅលើ​ការរក្សា​គម្លាត​ពីគ្នា​និង​​សកម្មភាព​សេដ្ឋកិច្ច ដោយ​លើក​ហេតុផល​ថា ការបំផ្លាញ​ពី​ការបិទ​ប្រទេស​នឹង​អាក្រក់​ជាង​ជំងឺ​រាតត្បាត​ទៅទៀត​។​

​លោក​ក៏​បាន​ផ្សព្វផ្សាយ​ម្តង​ហើយ​ម្តងទៀត​នូវ​ថ្នាំ​ប្រឆាំង​នឹង​ជំងឺគ្រុនចាញ់​ថា​ជា​ការ​ព្យាបាល​សម្រាប់​ជំងឺ​កូវី​ដ ទោះបីជា​ការសិក្សា​វិទ្យាសាស្ត្រ​រកឃើញ​ថា​វា​គ្មាន​ប្រសិទ្ធភាព​និង​អាច​បង្ក​គ្រោះថ្នាក់​ក៏ដោយ ហើយ​បាន​រិះគន់​អភិបាលរដ្ឋ​នានា ដែល​បាន​ធ្វើ​តេស្ត​វ៉ាក់សាំង​របស់​ចិន​នៅក្នុង​ស្រុក​។​

​គាត់​និយាយថា “​ខ្ញុំ​សូម​ប្រាប់​អ្នក​ថា ខ្ញុំ​នឹង​មិន​ចាក់​វ៉ាក់សាំង​ណាមួយ​នោះ​ទេ​។ វា​ជា​សិទ្ធិ​របស់​ខ្ញុំ ហើយ​ខ្ញុំ​ប្រាកដថា សភា​នឹង​មិនបង្កើត​ការលំបាក​សម្រាប់​អ្នក​ដែល​មិន​ចង់​ចាក់​វ៉ាក់សាំង​នោះទេ​”៕

​លោក​បូល​សូ​ណារ៉ូ​នឹង​មិនចាក់​វ៉ាក់សាំង​កូវី​ដ​១៩​ទេ ទោះ​វា​មាន​ប្រសិទ្ធភាព​ប៉ុន​ណា​ក៏​ដោយ

ទីតាំងផ្សាយពាណិជ្ជកម្ម

- Advertisment -

Most Popular