Home ព័ត៌មានជាតិ សេដ្ឋកិច្ច ​សម្ពាធ​ទាប​ប...

​សម្ពាធ​ទាប​បង្ក​ឱ្យ​ផ្ទៃមេឃ​អាប់អួរ​និង​ភ្លៀង​តិចតួច​ដល់​ថ្ងៃ​៣០​វិច្ឆិកា​

ដោយ​: ប​.​ខុន / ភ្នំពេញ​: ផ្ទៃមេឃ​អួរ​អាប់​និង​មាន​ភ្លៀង​រួយ​ស្បៃ​(​ផ្សែង​ក្រូច​) កើតឡើង​នៅ​ស្ទើរ​ទូទាំងប្រទេស​ដែលមាន​តាំងពី​ថ្ងៃទី​២៨​ដល់​ថ្ងៃទី​៣០​ខែវិច្ឆិកា ដោយសារ​ឥទ្ធិពល​សម្ពាធ​ទាប (Low)​មួយ​រុញ​មកពី​សមុទ្រ​ចិន​ខាងត្បូង ភាគ​អ​គ្នេ​យ៍​នៃ​ទីក្រុង​ហូជីមិញ​។ នេះ​បើតាម​លោក ចាន់ យុ​ត្ថា អ្នកនាំពាក្យ និង​ជា​រដ្ឋលេខាធិការ​ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​២៩​ខែវិច្ឆិកា​ឆ្នាំ ២០២០​។​

​អ្នកនាំពាក្យ​ខាងលើ​និយាយ​ឱ្យដឹងទៀតថា​សម្ពាធ​ទាប​នេះ​ប្រសិនបើ​សម្ពាធ​ខ្ពស់ ខ្សោយ​និង​ខ្យល់មូសុង​ឦសាន​មិន​ខ្លាំង គឺ​វា​បង្កឱ្យមាន​ភ្លៀង​ធ្លាក់​ច្រើន​ដូច​ភ្លៀង​ក្នុង​រដូវវស្សា តែដោយសារ​ខ្យល់​លើ​ចាប់ពី​កម្ពស់​៦០០​ម៉ែត្រ​ឡើង​មាន​ល្បឿន​ដល់​១៥​ម៉ែត្រ​ក្នុង​មួយ​វិនាទី​ធ្វើឱ្យ​ឥទ្ធិពល​របស់​សម្ពាធ​ទាប​មាន​មកលើ ព្រះរាជាណាចក្រ​កម្ពុជា​ចុះខ្សោយ​។​

​ក្រសួង​ធនធានទឹក និង​ឧតុនិយម កាលពី​ថ្ងៃទី​២៥​ខែវិច្ឆិកា​ឆ្នាំ​២០២០ បាន​ជូនដំណឹង​ថា តាមរយៈ​ការតាមដាន និង​ការវិវត្ត​ជាក់ស្តែង​នៃ​ស្ថានភាព អាកាស ធាតុ​បង្ហាញ​ឲ្យ​ឃើញថា​ឥទ្ធិពល​នៃ​បាតុភូត​ឡា​នី​ណា (La Nina) បានធ្វើ​ឲ្យ​ជ្រលង​សម្ពាធ​ខ្ពស់​ពី​ប្រទេស​ចិន​រុញ​ចុះ មកក្រោម​ខ្លាំង​និង​គ្របដណ្តប់​មកលើ​កម្ពុជា​។​

​តាម​ការ​ព្យាករ​លក្ខណៈ​បែប​ខាងលើនេះ នឹងធ្វើ​ឲ្យ​ព្រះរាជាណាចក្រ​កម្ពុជា​ក្នុង​រដូវរំហើយ​ខាងមុខ (​ខែធ្នូ ឆ្នាំ​២០២០-​ខែមករា ឆ្នាំ​២០២១) ស្ថានភាព​ធាតុអាកាស នឹង​ចុះ​ត្រជាក់​ជាង​បណ្តា​ឆ្នាំ​កន្លងទៅ​។​
១- ធាតុអាកាស​នឹង​ចាប់ផ្តើម​ចុះ​ត្រជាក់ លើក​ទី​១ ដោយ​ចាប់ពី​សប្តាហ៍​ទី​១​ខែធ្នូ​ដល់ សប្តាហ៍​ទី​៣ ខែធ្នូ ឆ្នាំ​២០២០​។ នៅក្នុង​អំឡុង​ពេលនោះ មាន​ថ្ងៃ​មួយចំនួន​ធាតុអាកាស អាច​នឹង​ចុះ​ត្រជាក់​ពី​មធ្យម​ទៅ​បង្គួរ ក្នុងនោះ​មានដូចជា​នៅ​
– បណ្តា​ខេត្ត​នៅ​ភាគ​ខាងលើ ក្នុងភូមិ​សាស្ត្រ​តំបន់​ជួរ​ភ្នំ​ដងរែក និង ខ្ពង់រាប ភាគ​ឦសាន​សីតុណ្ហភាព​អប្បបរមា នឹង​ធ្លាក់​ចុះមក​នៅក្នុង​រង្វង់​ពី​១៨​អង្សា​សេ ទៅ​២១​អង្សា​សេ​។​
-​បណ្តា​រាជធានី ខេត្ត​ដទៃទៀត​សីតុណ្ហភាព​អប្បបរមា ក្នុង​រង្វង់​ពី​១៩​អង្សា សេ​ទៅ ២២​អង្សា​សេ​។​
២-​ធាតុអាកាស​នឹង​ចុះ​ត្រជាក់​លើក​ទី​២ ដោយ​ចាប់ពី​សប្តាហ៍​ទី ៤ ខែធ្នូ ឆ្នាំ ២០២០ ដល់​បំណាច់​ខែមករា ឆ្នាំ​២០២១​។ ក្នុងអំឡុង​ពេលនោះ​ធាតុអាកាស នឹង​ចុះ​ត្រជាក់​ខ្លាំង​និង​ត្រជាក់​យូរ​ច្រើន​ថ្ងៃ​ក្នុងនោះ រួមមាន
-​បណ្តា​ខេត្ត​នៅ​ភាគ​ខាងលើ ក្នុងភូមិ​សាស្ត្រ​ជាប់​តំបន់ភ្នំ និង​តំបន់​ខ្ពង់រាប ភាគ​ឦសាន​សីតុណ្ហភាព​អប្បបរមា អាច​នឹង​ធ្លាក់​ចុះមក​នៅក្នុង​រង្វង់​ពី​១៦​អង្សា សេ​ទៅ​១៩​អង្សា​សេ​។​
– បណ្តា​ខេត្ត​ដទៃទៀត សីតុណ្ហភាព​អប្បបរមា នៅក្នុង​រង្វង់​ពី ១៨​អង្សា​សេ ទៅ ២១​អង្សា​សេ​។​
​ក្រសួង​ធនធានទឹក​និង​ឧតុនិយម បាននិងកំពុង​បន្ត​តាមដាន​យ៉ាង​យកចិត្ត ទុកដាក់​លើ​បាតុភូតធម្មជាតិ​នេះ ហើយនឹង​ជម្រាបជូន​ព័ត៌មាន​ជា​បន្តបន្ទាប់​ទៀត​ក្នុងករណី​អាកាសធាតុ​មានការ​ប្រែប្រួល​ថ្មី​៕​

ទីតាំងផ្សាយពាណិជ្ជកម្ម

- Advertisment -

Most Popular