Home កីឡា Spursឡើង​មក​ល...

Spursឡើង​មក​លេខ​១ ក្រោយ​ស្មើ Chelsea ខណៈ​កា​វ៉ា​នី​ជួយ​ឱ្យ Man Utd ឈ្នះ​ចុង​ម៉ោង​

​ប្រែ​សម្រួល : កញ្ញា​ដា​លី​ស​/​ឡុង​ដ៍ ៖ ក្រុម​មាន់​ខ្នាយ​មាស Tottenham ឡើង​មក​កំពូល​តារាង Premier League ជាមួយ​លទ្ធផល​សូន្យ​ស្មើ​ជាមួយ​គូប្រជែង​ពាន តោ​ខៀវ Chelsea​ខណៈ​កីឡាករ​​អេឌីន​សុន កា​វ៉ា​នី បាន​ជួយ​ឱ្យ​ក្រុម​បិសាច​ក្រហម Manchester United ឈ្នះ ៣-២ នៅ​ទឹកដី​របស់ Southampton កាលពី​ថ្ងៃអាទិត្យ​។

​ក្រុម​របស់​លោក​ចូសេ ម៉ូ​រី​ញ៉ូ​បាន​ឡើង​មក​លើ​ក្រុម Liverpool ដោយ​គម្លាត់​គ្រាប់​បាល់​ខុសគ្នា ក្រោយ​ការប្រកួត​ដ៏​តានតឹង​រវាង​ជំនួប​អ្នកក្រុង​ឡុង​ដ៍​ដូច​គ្នា​នៅ​កីឡដ្ឋាន Stamford Bridge​។​

Spurs មិនទាន់​ចាញ់ ៩ ប្រកួត​ក្នុង​លី​ក ហើយ​លោក​ម៉ូ​រី​ញ៉ូ​ហាក់​សប្បាយចិត្ត​នឹង​ធ្វើឱ្យ​អតីត​ក្លឹប​របស់​គាត់​ខកចិត្ត ខណៈ​ពួកគេ​ជ្រើសរើស​ទម្រង់​លេង​បែប​ប្រយ័ត្នប្រយែង​ខ្ពស់​ពុំ​សូវ​មាន​មហិច្ឆតា​ប្រយុទ្ធ​។​

​លោក​ម៉ូ​រី​ញ៉ូ​និយាយថា “​វា​ជា​ការប្រកួត ដែល​យើង​គោរព​ពួកគេ ពួក​គេ​គោរព​ពួកយើង​។ គ្មាន​នរណា​ម្នាក់​ហ៊ាន​លេង​ប្រថុយប្រថាន ឬ ព្យាយាម​ប្តូរ​ទិសដៅ​ការប្រកួត​ទេ​។ ខ្ញុំ​ចូល​ចិត្ត​អារម្មណ៍​ដែល​បាន​នៅ​លើ​កំពូល​តារាង​។ យើង​បាន​ចេញមក​ពី​ចំណាត់​ថ្នាក់​លំបាក​កាល​រដូវ​កាល​មុន ហើយ​យើង​រីករាយ​នឹង​លទ្ធផល​នេះ​”​។

Chelsea ក៏​មិន​ដែល​ចាញ់​ដែរ​ក្នុង ១១ ប្រកួត​ចុងក្រោយ​គ្រប់​ក្របខ័ណ្ឌ និង​ឈរ​នៅ​លេខ ៣ ចាញ់ Spurs និង Liverpool ២​ពិន្ទុ​។

​អ្នក​ចាត់ការ​ទូទៅ​របស់​តោខៀវ លោក ហ្វ្រែង ឡាំ​ផាត និយាយថា “​ការប្រកួត​ប្រព្រឹត្តទៅ​ដូច​ខ្ញុំ​បាន​រំពឹងទុក​។ ខ្ញុំ​គិតថា​យើង​នឹង​គ្រប់គ្រង​បាល់​បាន​ច្រើន​។ យើង​បាន​បង្កើត​ឱកាស​គ្រប់គ្រាន់​ដើម្បី​យកឈ្នះ​។ លទ្ធផល​សូន្យ​ស្មើ​ទល់នឹង​ក្រុម​ដែល​បង្កើតឡើង​ដើម្បី​វាយបក​លឿនៗ គឺជា​លទ្ធផល​ល្អ​ប្រសើរ​។ យើង​មិន​បាន​ផ្តល់ឱកាស​សូម្បី​តែ​បន្តិច​ដល់​ខេន​ឬ​សុន​”​។​

​ដោយឡែក​នៅ​ទឹកដី​របស់ Southampton ឯណោះ​វិញ Man Utd បាន​តាម​ពីក្រោយ ២-០ មក​ឈ្នះ​វិញ​ចុង​ម៉ោង ២-៣ ដោយ​ការ​ស៊ុត​បាល់ ២ គ្រាប់​ចុង​ម៉ោង​របស់​កីឡាក​រវ័យ ៣៣ ឆ្នាំ កា​វ៉ា​នី​។​

​លោក​សូល​ក្យ័រនិយាយ​ថា “​វា​ជា​ចរិត​របស់ Manchester United មិន​ដែល​ចុះចាញ់​ឡើយ​។ គ្រប់គ្នា គឺ​គ្មាន​នរណាម្នាក់​ព្រម​ចុះចាញ់​នោះឡើយ​។ វា​ជា​រឿង​អស្ចារ្យ​សម្រាប់​កីឡាករ Manchester United”៕

​តោ​ខៀវ Chelsea បាន​ត្រឹម​សូន្យ​ស្មើ​ជាមួយ Spurs នៅ​ទឹកដី Stamford Bridge កាលពី​ថ្ងៃអាទិត្យ​

ទីតាំងផ្សាយពាណិជ្ជកម្ម

- Advertisment -

Most Popular