ដោយៈ បូកគោ / កំពតៈ នាអំឡុងពេល ចុងក្រោយនេះ ការនាំស្រូវទៅលក់ នៅប្រទេសវៀតណាម តាមច្រកទ្វារទ្វេភាគីទាន់ហន់ ក្នុងភូមិសាស្ត្រស្រុកកំពង់ត្រាច មានភាពកកស្ទះ ធ្វើឱ្យឈ្មួញ មកពីខេត្តនានា ក៏ដូចជា ប្រជាកសិករមួយចំនួន ជួបក្តីលំបាក សម្រាប់មុខរបរ អាជីវកម្មរបស់ខ្លួន។ ឆ្លើយតបចំពោះ បញ្ហាប្រឈម ខាងលើ កាលពីព្រឹកថ្ងៃទី៣០ ខែវិច្ឆិកា ឆ្នាំ២០២០ អភិបាលខេត្តកំពត បានចុះពិនិត្យស្ថានភាពផ្ទាល់ ដើម្បីរកដំណោះស្រាយ តាមលទ្ធភាព ដែលអាចធ្វើបាន។
ក្រោយរកឃើញថា ការរាតត្បាតនៃ ជំងឺកូវីដ ១៩ និងការរឹតបន្តឹងច្បាប់ចរាចរណ៍ផ្លូវគោក នៅប្រទេសវៀតណាម ជាដើមហេតុ នៃការកកស្ទះនោះ លោក ជាវ តាយ អភិបាលខេត្តកំពត បានមានប្រសាសន៍ថាៈ រដ្ឋបាលខេត្តកំពត នឹងបង្កើតក្រុមការងារ ក្នុងកិច្ចដោះស្រាយ ការនាំស្រូវចេញ ដោយរៀបចំកិច្ចប្រជុំ ជាមួយភាគីវៀតណាម ខេត្តជាប់ព្រំដែន តាមរយៈវីដេអូខនហ្វើរេន ( Video Conference ) ដើម្បីពិភាក្សានូវ បញ្ហារាំងស្ទះទាំងនេះ។ បច្ចុប្បន្ន យន្តការសម្រប សម្រួល នៃការនាំស្រូវ ទៅប្រទេសវៀតណាម មិនទាន់មានភាព ប្រទាក់ក្រឡា គ្នានៅឡើយ។
លោកអភិបាលខេត្ត បានក្រើនរំលឹកផងដែរថា ក្នុងនាមរដ្ឋបាលខេត្ត លោកសំណូមពរ ដល់ប្រជាពលរដ្ឋ អាជ្ញាធរ កងកម្លាំងមានសមត្ថកិច្ច ទាំងថ្នាក់ខេត្ត និងតាមព្រំដែន ត្រូវរួមគ្នាបង្ការ ទប់ស្កាត់ជំងឺកូវីដ ១៩ ឱ្យមានប្រសិទ្ធភាពបំផុត។ ជាមួយនេះ ក៏ត្រូវលុបបំបាត់នូវ ភាពអសកម្មផ្សេងៗ ដើម្បីបង្កលក្ខណៈ ងាយស្រួល ចំពោះប្រជាពលរដ្ឋ ក្នុងការប្រកបរបរជំនួញ តាមព្រំដែន រវាងប្រទេសជិតខាងផងដែរ។
សូមបញ្ជាក់ថា ស្របពេលប្រជាកសិករខ្មែរ កំពុងប្រមូលផល ស្រូវវស្សា សកម្មភាពដឹកជញ្ជូនស្រូវ ទៅប្រទេសវៀតណាម តាមច្រកទ្វារទ្វេភាគី ទាន់ហន់ ហាក់មានភាពអធិកអធម ជាងពេលធម្មតា ពោលគឺ ក្នុងមួយថ្ងៃ បរិមាណនៃការនាំចេញ ក្នុងរង្វង់ ២ ពាន់តោន។ ប៉ុន្តែកាលពី២សប្តាហ៍កន្លងទៅនេះ ភាគីខាងវៀតណាម បានរឹតបន្តឹងច្បាប់ ស្តីពីចរាចរណ៍ផ្លូវគោក ដែលតម្រូវឱ្យគ្រប់យានយន្តដឹកទំនិញ ត្រូវមានឯកសារគ្រប់គ្រាន់ និងការផ្ទុកមិនឱ្យលើស ទម្ងន់កំណត់។ ជាមួយគ្នានោះដែរ ភាគីវៀតណាម ក៏បានបង្កើនការរឹតបន្តឹង ចំពោះវិធានការបង្ការទប់ស្កាត់ ការរីករាលដាលជំងឺកូវីដ ១៩ ។ ហេតុផលទាំង ២ នេះហើយ ដែលបង្កឱ្យមានភាពរាំងស្ទះ ដល់ការដឹកជញ្ជូនទំនិញចូល ទៅប្រទេសវៀតណាម៕/V
អភិបាលខេត្តកំពត រកដំណោះស្រាយ អំពីភាពកកស្ទះ នៃការនាំស្រូវ ទៅប្រទេសវៀតណាម
អភិបាលខេត្តកំពត រកដំណោះស្រាយ អំពីភាពកកស្ទះ នៃការនាំស្រូវ ទៅប្រទេសវៀតណាម 
អភិបាលខេត្តកំពត រកដំណោះស្រាយ អំពីភាពកកស្ទះ នៃការនាំស្រូវ ទៅប្រទេសវៀតណាម 
អភិបាលខេត្តកំពត រកដំណោះស្រាយ អំពីភាពកកស្ទះ នៃការនាំស្រូវ ទៅប្រទេសវៀតណាម 
អភិបាលខេត្តកំពត រកដំណោះស្រាយ អំពីភាពកកស្ទះ នៃការនាំស្រូវ ទៅប្រទេសវៀតណាម