ក្រុមហ៊ុន Moderna ដាក់​ពាក្យ​សុំ​ការអនុញ្ញាត​ប្រើប្រាស់​វ៉ាក់សាំង​កូវី​ដ​១៩​ពី​អាជ្ញាធរ​អាម៉េរិក

​ប្រែ​សម្រួល : កញ្ញា​ដា​លី​ស ៖ ក្រុមហ៊ុន Moderna Inc និយាយ​កាលពី​ថ្ងៃ​ចន្ទ​ទី​៣០​វិច្ឆិកា​ថា ខ្លួន​បាន​ដាក់​ពាក្យសុំ​ការអនុញ្ញាត​ជា​បន្ទាន់​នៅ​សហរដ្ឋ​អាម៉េរិក​សម្រាប់​វ៉ាក់សាំង​កូវី​ដ​១៩​របស់​ខ្លួន​បន្ទាប់​​ពី​លទ្ធផល​ពេញលេញ​ពី​ការសិក្សា​នៅ​ដំណាក់កាល​ចុងក្រោយ​បានបង្ហាញ​ថា វា​មាន​ប្រសិទ្ធភាព ៩៤,១ ភាគរយ ដោយ​គ្មាន​ការព្រួយបារម្ភ​អំពី​សុវត្ថិភាព​អ្វី​ធ្ងន់ធ្ងរ​នោះ​ទេ​។​

​រដ្ឋបាល​ចំណីអាហារ​និង​ឱសថ​អាម៉េរិក (FDA) បាន​និយាយថា គណៈកម្មាធិការ​ប្រឹក្សា​យោបល់​មួយ​នឹង​ជួបគ្នា​ដើម្បី​ពិភាក្សា​លើ​សំណើ​នេះ​នៅ​ថ្ងៃទី ១៧ ខែ​ធ្នូ ដែល​នឹង​ធ្វើឱ្យ​បេក្ខជន​វ៉ាក់សាំង​របស់​ក្រុមហ៊ុន Moderna ក្លាយ​ជា​វ៉ាក់សាំង​ដែល​មាន​ប្រសិទ្ធភាព​ខ្ពស់​ទី ២ ដែល​ទំនងជា​ទទួល​បាន​ការ​គាំទ្រ​ពី​សហរដ្ឋ​អាម៉េរិក​និង​អាច​នឹង​ចេញលក់​ក្នុងឆ្នាំនេះ​ផងដែរ​។​

​វ៉ាក់សាំង ដែល​បង្កើតឡើង​ដោយ​ក្រុមហ៊ុន Pfizer Inc និង​ក្រុមហ៊ុន BioNTech SE ដែល​មាន​ប្រសិទ្ធភាព​៩៥ ភាគរយ​នៅក្នុង​ការសាកល្បង​ព្យាបាល​គ្រោង​នឹង​ពិនិត្យ​ដោយ​ក្រុម​អ្នក​ជំនាញ​របស់​​គណៈកម្មាធិការ​ប្រឹក្សា​យោបល់​នៅ​មួយ​សប្តាហ៍​ទៀត​។ FDA នឹង​សម្រេច​លើ​ការ​អនុញ្ញាត​ឱ្យ​ប្រើប្រាស់​ជាបន្ទាន់ (EUA) បន្ទាប់​ពី​អ្នកផ្តល់​ប្រឹក្សា​យោបល់ ផ្តល់​អនុសាសន៍​របស់​ពួកគេ​។​

​ក្រុមហ៊ុន Moderna ដែល​គ្រោង​នឹង​ស្វែងរក​ការអនុញ្ញាត​ប្រើប្រាស់​បន្ទាន់​ពី​សហភាព​អឺរ៉ុប​ផង​ដែរ​នោះ បាន​រាយការណ៍​ថា ប្រសិទ្ធភាព​វ៉ាក់សាំង​របស់ខ្លួន​គឺ​ត្រូវ​ចំ​ពោះ​គ្រប់​អាយុ ពូជសាសន៍ និង ប្រជាសាស្ត្រ​យ៉េនឌ័​រ ក៏ដូចជា ទទួលបាន​ជោគជ័យ ១០០ ភាគរយ​ក្នុង​ការការពារ​ពី​ករណី​ឈឺធ្ងន់ធ្ងរ​ពី​កូវី​ដ​១៩ ដែល​បាន​សម្លាប់​មនុស្ស​ជិត ១,៥ លាន​នាក់​នៅ​ទូទាំង​ពិភពលោក​។​

​លោក តាល់ ហ្សាក់ ប្រធាន​ផ្នែក​វេជ្ជសាស្ត្រ​របស់​ក្រុមហ៊ុន Moderna បាន​និយាយថា “​យើង​ជឿជាក់ថា​យើង​មាន​វ៉ាក់សាំង​ដែលមាន​ប្រសិទ្ធភាព​ខ្ពស់​។ ឥឡូវ​នេះ​យើង​មាន​ទិន្នន័យ​ដើម្បី​បញ្ជាក់​វា​។​យើង​រំពឹង​​ថា​នឹង​ដើរតួនាទី​យ៉ាង​សំខាន់​ក្នុង​ការផ្លាស់ប្តូរ​ស្ថានការណ៍​ឱ្យ​ប្រសើរ​ឡើង​ពី​ជំងឺ​រាតត្បាត​នេះ​”៕

​វ៉ាក់សាំង​របស់​ក្រុមហ៊ុន Moderna ត្រូវបាន​ដាក់​ពាក្យសុំ​ការប្រើប្រាស់​បន្ទាន់​ពី FDA កាលពី​ថ្ងៃ​ចន្ទ​

ទីតាំងផ្សាយពាណិជ្ជកម្ម

- Advertisment -

Most Popular