Home ព័ត៌មានជាតិ សន្តិសុខ ឃុំខ្លួន​ជនសង...

ឃុំខ្លួន​ជនសង្ស័យ​បីនាក់​ករណី​ជួញដូរ​គ្រឿងញៀន​ឆ្លងដែន​ចេញពី​កម្ពុ​ជាមាន​ទម្ងន់ ជិត​៣ គីឡូក្រាម​

ដោយៈ​ស​រិ​ទ្ធ / ភ្នំពេញៈ​ជនសង្ស័យ​ចំនួន​៣​នាក់​ជាប់​ពាក់ព័ន្ធ​ករណី​ជួញដូរ​គ្រឿងញៀន​ឆ្លងដែន ចេញពី​កម្ពុជា ទៅ​ញូ​ហ្ស៊ី​លែ​ន​និង អូស្ត្រាលី តាមរយៈ​កញ្ចប់​បញ្ញើ​ប្រៃសណីយ៍​មាន​ទម្ងន់ ជិត​៣ គីឡូក្រាម​បាន​ត្រូវ​តុលាការ​សម្រេច​ឃុំខ្លួន​ដាក់ពន្ធនាគារ​នៅ​រសៀល​ថ្ងៃទី​១​ខែធ្នូ​ឆ្នាំ​២០២០​ដើម្បី​រង់ចាំ​ការស៊ើបអង្កេត​ជា​បន្តទៀត​។​

​សមត្ថកិច្ច​ជំនាញ​បាន​បញ្ជាក់ថា​កម្លាំង​មន្ទីរ​ប្រឆាំង​គ្រឿងញៀន បាន​សហការ​ជាមួយ​សមត្ថកិច្ច​គយ ប្រចាំការ​នៅ​ឃ្លាំង​ដឹកទំនិញ Cargo នៃ​អាកាសយានដ្ឋាន​អន្តរជាតិ​ភ្នំពេញ ស្នងការដ្ឋាន​នគរបាល​រាជធានី​ភ្នំពេញ និង​ខេត្ត​ព្រះសីហនុ និង​មានការ​សម្របសម្រួល​ពី​លោក សឿន មុនី​រ័ត្ន ព្រះរាជ​អ​ជ្ញា​រង​អម​សាលាដំបូង​រាជធានី​ភ្នំពេញ បាន​ដំណើរការ​ស្រាវជ្រាវ ស៊ើបអង្កេត និង​ឈានទៅ​បង្ក្រាបបាន​ក្រុម​ជួញដូរ​គ្រឿងញៀន​ឆ្លងដែន ចេញពី​កម្ពុជា ទៅ​ញូ​ហ្ស៊ី​លែ​ន និង​អូស្ត្រាលី ដោយ​លាក់​បង្កប់​ក្នុង​កញ្ចប់​បញ្ញើ​ប្រៃសណីយ៍ ចំនួន​៣​លើក ជា​បន្តបន្ទាប់ នៅ​រាជធានី​ភ្នំពេញ និង​ខេត្ត​ព្រះសីហនុ ដោយ​ចាប់ខ្លួន​ជនសង្ស័យ​ចំនួន ៣​នាក់ និង​ចាប់យក​វត្ថុតាង​គ្រឿងញៀន សរុប ២៥៤៩,៧៧ ក្រាម ។​

​ប្រតិបត្តិ​ការបង្ក្រាប​ការជួញដូរ​គ្រឿងញៀន​ឆ្លងដែន ជា​លទ្ធផល រួមមាន ៖
​លើក​ទី​១ ៖ នៅ​ថ្ងៃទី​២០ ខែតុលា ឆ្នាំ​២០២០ នៅ​ចំណុច​ឃ្លាំងទំនេញ (Cargo) នៃ​អាកាសយានដ្ឋាន​អន្តរជាតិ​ភ្នំពេញ ចាប់យក​វត្ថុតាង​គ្រឿងញៀន​ប្រភេទ​មេ​តំ​ហ្វេ​តា​មីន (ICE) ទម្ងន់ ៨៥,៣២​ក្រាម ដោយ​លាក់​បង្កប់​ក្នុង​ដំបង​២​កំណាត់ ។​

​លើក​ទី​២ ៖ នៅ​ថ្ងៃទី​០៥ ខែវិច្ឆិកា ឆ្នាំ​២០២០ នៅ​ចំណុច​ឃ្លាំងទំនេញ (Cargo) នៃ​អាកាសយានដ្ឋាន អន្តរជាតិ​ភ្នំពេញ ចាប់យក​វត្ថុតាង គ្រឿងញៀន​ប្រភេទ​មេ​តំ​ហ្វេ​តា​មីន (ICE) ទម្ងន់ ១២៩៥,៦៧​ក្រាម ដោយ​លាក់​បង្កប់​ក្នុង​បដិមាករ​ព្រះ​ពុទ្ធរូប ឈើ ២​ព្រះអង្គ ។​
​លើក​ទី​៣ ៖ នៅ​ថ្ងៃទី​២៥ ខែវិច្ឆិកា ឆ្នាំ​២០២០ នៅ​ចំណុច ក្រុមហ៊ុន IAL ផ្ទះ​លេខ​១៦​បេ ផ្លូវ​សូ​នី សង្កាត់​ទឹកថ្លា ខណ្ឌ​សែន​សុខ រាជធានី​ភ្នំពេញ ឃាត់ខ្លួន​ជនសង្ស័យ ២ នាក់ ៖
១- ឈ្មោះ លឿង សៀង​ហៃ ភេទ​ប្រុស អាយុ​៣១​ឆ្នាំ (​អ្នក​ផ្ញើ​គ្រឿងញៀន​)
២-​ឈ្មោះ ឈុន ម៉ា​រ៉ា​ឌី ភេទ​ប្រុស ២៥​ឆ្នាំ (​អ្នក​ផ្ញើ​គ្រឿងញៀន​) ។​
​វត្ថុតាង​ដែល​សមត្ថកិច្ច​ដកហូត​បានរួម​មាន ៖ គ្រឿងញៀន​ប្រភេទ​មេ​តំ​ហ្វេ​តា​មីន​(ICE) ទម្ងន់ ១០៤៨, ៤៨​ក្រាម លាក់​បង្កប់​ក្នុង​រូប​បដិមាក ៤​អង្គ ព្រះ​កេស​១. ព្រហ្ម​២ រូប​ព្រះបាទ​ជ័យវរ្ម័ន​១ ។​
​លុះ​នៅ​ថ្ងៃទី​២៧ ខែវិច្ឆិកា ឆ្នាំ​២០២០ យើង​បន្ត​ការស្រាវជ្រាវ កំណត់​បាន​មុខសញ្ញា​មេក្លោង​ម្នាក់ និង​ឈានទៅ​ចាប់ខ្លួន​ឈ្មោះ CHEN KEXI ភេទ​ប្រុស ជនជាតិ​ចិន អាយុ​៣៩​ឆ្នាំ ស្នាក់​នៅក្នុង​បន្ទប់ ២០៥ អា​ផាត់​មិន វិមានឯករាជ្យ ផ្លូវ​១២៤ សង្កាត់​លេខ​៣ ក្រុង​-​ខេត្ត​ព្រះសីហនុ និង​ចាប់យក​វត្ថុតាង​បាន គ្រឿងញៀន​ប្រភេទ​មេ​តំ​ហ្វេ​តា​មីន​(ICE) ទម្ងន់ ១២០,២៧​ក្រាម បន្ថែមទៀត ដោយ​លាក់​បង្កប់​ក្នុង​ចម្លាក់​ឈើ រូប​ដំរី ២​រូប និង​ដំបង​ឈើ ២​កំណាត់ ៣​គូរ ៕

ទីតាំងផ្សាយពាណិជ្ជកម្ម

- Advertisment -

Most Popular