Home ព័ត៌មានជាតិ សង្គម ដំរី​ឈ្មោល​ខា...

ដំរី​ឈ្មោល​ខា​វ៉ាន់​ពី​ប៉ា​គី​ស្ថាន​យកមក​បង្កាត់​ពូជ​ជាមួយ​ដំរី​ញី​ខ្មែរ ដើម្បី​ឱ្យបាន​ពូជ​កាន់តែ​ល្អ

ដោយ​: ដេប៉ូ / ភ្នំពេញ​: សត្វ​ដំរី​អាស៊ី​ឈ្មោះ​ខា​វ៉ាន់​ដែល​បាន​បញ្ជូន​ពី​ប្រទេស​ប៉ា​គី​ស្ថាន​មក​កម្ពុជា​កាលពី​ថ្ងៃ​ម្សិល​ម៉ិ​ញ​(​ថ្ងៃទី​៣០​ខែវិច្ឆិកា​)​ដើម្បី​ធ្វើការ​បង្កាត់​ពូជ​ជាមួយ​ដំរី​ក្នុងស្រុក គោលបំណង​បង្កើត​ប្រសិទ្ធភាព​ក្នុងការ​បន្ត​ពូជ​សត្វ​ដំរី​អាស៊ី​ឱ្យ​កាន់តែ​ប្រសើរឡើង​ថែមទៀត​។​នេះ​បើតាម​ការ​ឱ្យដឹងពី​លោក នេត្រ ភក្ត្រា មន្ត្រី​នាំពាក្យ​និង​ជា​រដ្ឋលេខាធិការ​ក្រសួងបរិស្ថាន​។​


​ប្រាប់​បណ្តាញសារព័ត៌មាន​ក្នុងស្រុក​នៅ​រសៀល​ថ្ងៃទី​១​ខែធ្នូ​នេះ លោក នេត្រ ភក្ត្រា​បាន​បញ្ជាក់ថា​ការនាំយក​ដំរី​ខា​វ៉ាន​ជា​សត្វ​ដំរី​ឈ្មោះ​នេះ​នឹងត្រូវ​យកទៅ​ចិញ្ចឹម​ក្នុង​ដែន ជម្រក​សត្វព្រៃ​គូលែន​ព្រហ្ម​ទេព ស្ថិតនៅ​ក្នុងភូមិ​អូ​តា​ម៉េង ឃុំ​អន្លង់វែង ស្រុក​អន្លង់វែង ខេត្ត​ឧ​ត្ត​រ មានជ័យ​ជាមួយ​សត្វ​ដំរី​ញី​របស់​ខ្មែរ​ដើម្បី​បន្ត​ពូជ​។​

​ជាមួយគ្នានេះ​លោក​រដ្ឋលេខាធិការ​ថ្លែងថា​”​ការយក​ដំរី​ពី​ប៉ា​គី​ស្ថាន​នេះ​គឺ​យើង ជៀសវាង​ការ​បង្កាត់​ជាន់​ពូជ បង្កើន​នានា​ព​ន្ធុ (​សេនេទិច​) ការ​ធន់​នឹង​អាកាសធាតុ និង​ជំងឺ និង​សម្រាប់​ជំរុញ​ក្នុង​វិស័យ​ទេសចរណ៍ធម្មជាតិ នៃ​ព្រះរាជាណាចក្រ​កម្ពុជា​”​។​

​គួរបញ្ជាក់​ថា​ដំរី​អាស៊ី​ឈ្មោះ «​ខា​វ៉ាន់​» Kaavan ដែលជា​ដំរី​ដ៏​កម្រ​និង​ជិត​ផុត​ពូជ បាន​ត្រូវគេ​ដឹក​តាម​យន្តហោះ​ពិសេស​ពី​ប្រទេស​ប៉ា​គី​ស្ថាន​មកដល់​ទឹកដី​នៃ​ខេត្ត​សៀម​រាម​អង្គរ នៃ​ប្រទេស កម្ពុជា​កាលពី​រសៀល​ថ្ងៃទី​៣០ ខែវិច្ឆិកា ឆ្នាំ​២០២០​។

​លោក​នេត្រ ភក្ត្រា រដ្ឋលេខាធិការ​ក្រសួងបរិស្ថាន​បាន​បញ្ជាក់ថា ដំរី​ខា​វ៉ាន់​ជា​ដំរី​ឈ្មោល មាន​អាយុ​៣៥​ឆ្នាំ ត្រូវបាន​ក្រុម​អភិរក្ស​សត្វព្រៃ​ជួយសង្គ្រោះ​ពី​សួនសត្វ​មួយ​នៃ​ប្រទេស​ប៉ា​គី​ស្ថាន តាមរយៈ​ការតស៊ូ ផ្នែក​ច្បាប់ ហើយ​ចុងក្រោយ​តុលា​កំពូល​របស់​ប៉ា​គី​ស្ថាន បានសម្រេច​ឱ្យ​ដំរី ខា​វ៉ាន់ ត្រូវមាន​សេរីភាព និង​បញ្ជូនមក​រស់នៅ​ក្នុងព្រៃ​ធម្មជាតិ​នៃ​ដែនជម្រកសត្វព្រៃ​របស់​ប្រទេស​កម្ពុជា​។​
​ក្នុងនាម​រាជរដ្ឋាភិបាល​កម្ពុជា លោក នេត្រ ភក្ត្រា បាន​គូសបញ្ជាក់ថា កម្ពុ​ជាមាន​ក្តី​សោមនស្ស​រីករាយ​ទទួល​ស្វាគមន៍​ដំរី​ខា​វ៉ាន់​។ ពី​អំ​ណេះ​តទៅ ដំរី​ខា​វ៉ាន់​នឹង​លែង​រស់នៅក្នុង​ភាព​ឯកោ​ទៀតហើយ​។ សត្វ​ដំរី​ខា​វ៉ាន់​នេះ​នឹងត្រូវ​រស់នៅ​ក្នុងព្រៃ​ធម្មជាតិ​នៅក្នុង​ដែនជម្រកសត្វព្រៃ​គូលែន​ព្រហ្ម​ទេព​ក្នុងភូមិ​សាស្ត្រ​ខេត្ត​ឧ​ត្ត​រ​មានជ័យ ក្រោម​ការយកចិត្តទុកដាក់​ថែរក្សា​ការពារ​ខ្ពស់​របស់​ក្រសួងបរិស្ថាន និង​អង្គការ​អភិរក្ស​ដែនជម្រកសត្វព្រៃ​កម្ពុជា (CWS)៕

ទីតាំងផ្សាយពាណិជ្ជកម្ម

- Advertisment -

Most Popular