Home ព័ត៌មានអន្តរជាតិ យាន​ស្រាវជ្រា...

យាន​ស្រាវជ្រាវ​របស់​ចិន​ចុះចត​ដល់​ផ្ទៃ​ព្រះ​ចន្ទ​ដើម្បី​យក​សំណាក​មក​ផែនដី​

​ប្រែ​សម្រួល : កញ្ញា​ដា​លី​ស​/​ប៉េកាំង ៖ ទីភ្នាក់ងារ​អវកាស​របស់​ចិន​ដែល​មាន​គោលបំណង​នាំយក​មក​ផែនដី​វិញ​នូវ​សំណាក​របស់​ព្រះ​ចន្ទ​ដំបូងបង្អស់​ក្នុង​រយៈពេល​បួន​ទសវត្សរ៍ បាន​និយាយថា​យាន​​ស្រាវជ្រាវ​របស់​ចិន​បាន​ចុះចត​លើ​ផ្ទៃ​ព្រះ​ចន្ទ​កាលពី​ថ្ងៃ​អង្គារ​ទី​០១​ធ្នូ​។​

​ចិន​បាន​ចាក់​បញ្ចូល​លុយ​រាប់ពាន់​លាន​ទៅ​ក្នុង​កម្មវិធី​អវកាស​ដែល​គ្រប់គ្រង​ដោយ​យោធា​របស់​ខ្លួន ដោយ​សង្ឃឹមថា​នឹង​មាន​ស្ថានីយ​អវកាស​មាន​មនុស្ស​នៅក្នុង​ឆ្នាំ ២០២២​ហើយ​នៅ​ទីបំផុត​នឹង​​អាច​បញ្ជូន​មនុស្ស​ទៅ​ឋាន​ព្រះ​ចន្ទ​។​

​គោលដៅ​ចុង​ក្រោយ​នៃ​បេសកកម្ម​នេះ​គឺ​ដើម្បី​ប្រមូល​ថ្ម​និង​ដី​ពី​ព្រះ​ចន្ទ​ដើម្បី​ជួយ​អ្នកវិទ្យាសាស្ត្រ​រៀនសូត្រ​អំពី​ប្រភពដើម ការកកើត និង សកម្មភាព​ភ្នំភ្លើង​នៅលើ​ផ្ទៃ​របស់​ព្រះ​ចន្ទ​។​

​ទីភ្នាក់ងារ​សារព័ត៌មាន​ចិន​ស៊ីនហួ​បាន​រាយការណ៍​ដោយ​ដកស្រង់​សម្តី​របស់​រដ្ឋបាល​អវកាស​ជាតិចិន​យ៉ាង​ដូច្នេះ​ថា យាន​អវកាស Chang’e-5 ដែល​ដាក់​ឈ្មោះ​តាម​ទេវរូប​ព្រះ​ចន្ទ​ចិន​ក្នុង​រឿង​ទេវ​កថា បាន​ចុះចត​នៅ​គែម​ផ្ទៃ​ព្រះ​ចន្ទ​កាលពី​ល្ងាច​ថ្ងៃ​អង្គារ​។​

​ប្រសិនបើ​ដំណើរ​វិលត្រឡប់​វិញ​ទទួលបាន​ជោគជ័យ នោះ​ចិន​នឹង​ក្លាយជា​ប្រទេស​ទី​៣ ដែល​បាន​ទៅ​យក​សំណាក​ពី​ព្រះ​ចន្ទ បន្ទាប់​ពី​សហរដ្ឋ​អាម៉េរិក​និង​សហភាពសូវៀត​នៅ​ទសវត្សរ៍ ១៩៦០ និង ១៩៧០ ។​

​បេសកកម្ម​នេះ​គឺ​ជា​ការប៉ុនប៉ង​លើក​ទី​មួយ​ដើម្បី​នាំយក​សំណាក​ពី​ព្រះ​ចន្ទ​ត្រឡប់មក​ផែនដី​វិញ​ចាប់តាំងពី​យាន Luna 24 របស់​សហភាពសូវៀត​បាន​ធ្វើ​ដូច្នេះ​ក្នុង​ឆ្នាំ ១៩៧៦ ។​

​ស៊ីនហួ​បាន​និយាយថា យាន​ស៊ើបអង្កេត​របស់​ចិន​បាន​ចូលទៅ​ក្នុង​គន្លង​ព្រះ​ចន្ទ​កាលពី​ថ្ងៃ​សៅរ៍ បន្ទាប់​ពី​ការធ្វើដំណើរ​រយៈពេល ១១២ ម៉ោង​ពី​ផែនដី​បន្ទាប់ពី​រ៉ុក្កែត​មួយ​បាន​ដឹក​វា​ចូល​ទី​អវកាស​ពី​​ខេត្ត​ហៃ​ណាន​ភាគ​ខាងត្បូង​ប្រទេស​ចិន​កាលពី​សប្តាហ៍​មុន​៕

​រូបគំនូរ​បង្ហាញ​យាន Chang’e-5 ចុះ​ដល់​ផ្ទៃ​ព្រះ​ចន្ទ​កាលពី​ថ្ងៃ​អង្គារ

ទីតាំងផ្សាយពាណិជ្ជកម្ម

- Advertisment -

Most Popular