Home ព័ត៌មានជាតិ សន្តិសុខ លួច​ស៊ីម៉ង់ត៍...

លួច​ស៊ីម៉ង់ត៍ លក់​រាប់​ឆ្នាំ ត្រូវបាន​តំណាង​ក្រុមហ៊ុន​ដឹង ឃាត់ខ្លួន ប្រគល់​ទៅ​ឲ្យ​សមត្ថកិច្ច​

ដោយៈ ចាន់តូ / ភ្នំពេញៈ ជនសង្ស័យ បីនាក់ ដែលជា​អ្នកបើកបរ រថយន្ត​ដឹក​ស៊ីម៉ង់ត៍ របស់ ក្រុមហ៊ុន ស៊ី​ហ៊ូ​ហ៊ុយ គ្រុប ត្រូវបាន​តំណាង​ក្រុមហ៊ុន ចាប់​ប្រគល់ ឲ្យ​សមត្ថកិច្ច នគរបាល ខណ្ឌដង្កោ ក្រោយពី​ដឹងថា ជនសង្ស័យ​ទាំង បី​រូបនោះ បាន​លួច​ស៊ីម៉ង់ត៍ របស់ខ្លួន​យកទៅលក់ ឲ្យ​ក្រុមហ៊ុន​ផ្សេង​។ ករណី​ឃាត់ខ្លួន​នេះ បានកើត​ឡើង កាលពី​ថ្ងៃទី​១ ខែធ្នូ ឆ្នាំ​២០២០ វេលា​ម៉ោង ៦ នាទី​ល្ងាច ត្រង់ចំណុច​ក្រុមហ៊ុន ស៊ី​ហ៊ូ​ហ៊ុយ គ្រុប ស្ថិតនៅ​ភូមិ​សំបួរ សង្កាត់​ដង្កោ ខណ្ឌដង្កោ​។​

​សមត្ថកិច្ច បានឱ្យដឹងថាៈ ជនសង្ស័យ ដែល​សមត្ថកិច្ច ឃាត់ខ្លួន​បាន​នោះ រួមមានៈ ១.​ឈ្មោះ ហយ ហា​ញ អាយុ​៣៩​ឆ្នាំ ស្នាក់នៅ​ផ្ទះជួល ភូមិ​សំបួរ សង្កាត់​ដង្កោ ខណ្ឌដង្កោ , ២.​ឈ្មោះ អុល អន អាយុ​៣៩​ឆ្នាំ ទីលំនៅ ភូមិ​កណ្តាល ឃុំ​លំហាច ស្រុក​អង្គស្នួល ខេត្តកណ្តាល និង​៣.​ឈ្មោះ ហយ បញ្ញា អាយុ​៣៣​ឆ្នាំ ទីលំនៅ​ភូមិ​អង្គ​ដូន​ពិស ឃុំ​ទឹកល្អក់ ស្រុក​គងពិសី ខេត្តកំពង់ស្ពឺ ។ បុរស​បីនាក់​នេះ មានមុខ​របរ ជា​អ្នកបើករថយន្ត ដូចគ្នា​។

​ចំណែក​ជនរងគ្រោះ ឈ្មោះ ងិន សុ​ផារិន ភេទ​ប្រុស អាយុ​៣៣​ឆ្នាំ មុខរបរ ប្រធាន​រដ្ឋបាល ក្រុមហ៊ុន​ស៊ី​ហ៊ូ​ហ៊ុយ គ្រុប ស្នាក់នៅ​ផ្ទះជួល ស្ថិតនៅ​ភូមិ​ដំណាក់​ធំ សង្កាត់​ស្ទឹងមានជ័យ ៣ ខណ្ឌមានជ័យ ជា​តំណាងឱ្យ​ក្រុមហ៊ុន ស៊ី​ហ៊ូ​ហ៊ុយ គ្រុប​។​

​សមត្ថកិច្ច បាន​បន្តថាៈ ជនសង្ស័យ​ទាំង បីនាក់ ជា​អ្នកបើករថយន្ត​ដឹក​ស៊ីម៉ង់ត៍ ចេញពី​ក្រុមហ៊ុន ស៊ី​ហ៊ូ​ហ៊ុយ ស្ថិតនៅ​ភូមិ​សំបួរ សង្កាត់​ដង្កោ ខណ្ឌដង្កោ ទៅ​ដឹក​ស៊ីម៉ង់ត៍ ពី​រោងចក្រ ចក្រី​ទីង ស្ថិតនៅ​ខេត្តកំពត មក​រាជធានី​ភ្នំពេញ ។ ប៉ុន្តែ​ពេល​ជនសង្ស័យ ទាំងបី​នាក់​ខាងលើ​បើករថយន្ត ដឹក​ស៊ីម៉ង់ត៍ យកទៅដាក់ តាម​ដេប៉ូ ក្នុង​រាជធានី​ភ្នំពេញ ពួកគេ (​ជនសង្ស័យ​) បាន​លួច​បូម​ស៊ីម៉ង់ត៍ យកទៅលក់​ឱ្យ​ម៉ូយ​ផ្សេងៗ ក្នុង​១​លើកៗ អស់​ចំនួន​ពី ៥០ គីឡូក្រាម ទៅ ៣០០ គីឡូក្រាម ។

​តំណាងឱ្យ​ក្រុមហ៊ុន ស៊ី​ហ៊ូ​ហ៊ុយ គ្រុប បានឱ្យដឹងថាៈ នៅពេល​បុគ្គលិក របស់​ក្រុមហ៊ុន ស៊ី​ហ៊ូ​ហ៊ុយ​គ្រុប ទៅ​ទូទាត់​លុយ​ពី​ភ្ញៀវ នៅតាម​ដេប៉ូ​នីមួយៗ ភ្ញៀវ​បានឱ្យ​វិក្កយបត្រ​ទូទាត់​លុយ បាត់​ស៊ីម៉ង់ត៍ ក្នុង​១​រថយន្ត អស់ពី ៥០ គីឡូក្រាម ទៅ ៣០០ គីឡូក្រាម ។ ពេលនោះ ខាង​ក្រុមហ៊ុន បាន​ហៅ​ជនសង្ស័យ ខាងលើ មក​ធ្វើការ​សួរនាំ តែ​ពួកគេ (​ជនសង្ស័យ​) បាន​ឆ្លើយថា​ការបាត់ បង់​ស៊ីម៉ង់ត៍ បណ្តាលមកពី​ជញ្ជីង​ថ្លឹង​ឡើង និង​ជញ្ជីង​ថ្លឹង​ចុះ រួច​បុគ្គលិក​ក្រុមហ៊ុន ស៊ី​ហ៊ូ​ហុយ បាន​ទៅ​ត្រួតពិនិត្យ​ជញ្ជីង នៅតាម​ដេប៉ូ​នីមួយៗ ឃើញថា ជញ្ជីង​មាន​ភាពប្រក្រតី ត្រឹមត្រូវ ។

​ប្រភព បាន​បន្តថាៈ លុះដល់​ថ្ងៃទី​១ ខែធ្នូ ឆ្នាំ​២០២០ វេលា​ម៉ោង ៦ ល្ងាច ប្រធាន​ក្រុមហ៊ុន បាន​ហៅ​ជនសង្ស័យ ទាំង បីនាក់ ខាងលើ មក​សួរនាំ​ម្តងទៀត ទើប​ពួកគេ (​ជនសង្ស័យ​) បាន​ឆ្លើយ​សារភាពថា ពួកគេ (​ជនសង្ស័យ​) ពិតជា​បាន​លួច​បូម​ស៊ីម៉ង់ត៍ របស់​ក្រម​ហ៊ុន យកទៅលក់ ឱ្យ​ម៉ូយ​ផ្សេងៗ កាលពី​អំឡុង ឆ្នាំ​២០១៨ ប្រាកដ​មែន រួច​បុគ្គលិក​ក្រុមហ៊ុន ក៏បាន​ធ្វើការ​ត្រួតពិនិត្យ​ទៅលើ​ស៊ីម៉ង់ត៍​ដែល បាន​បាត់បង់ ឃើញថា ចាប់ពី​ឆ្នាំ​២០២០ រហូតដល់​បច្ចុប្បន្ន មានការ​បាត់បង់ ស៊ីម៉ង់ត៍​ជាង ១៩៨ តោន គិត​ជា​ទឹកប្រាក់​សរុប ចំនួន ១៤.៨៥០ ដុល្លារ ។

​លោក​វរសេនីយ៍ឯក ជឹម ស៊ីថា អធិការ​ខណ្ឌដង្កោ បាន​ប្រាប់​ឲ្យ​ដឹងថាៈ យោងតាម​ពាក្យបណ្ដឹង របស់​តំណាង​ក្រុមហ៊ុន និង​ចម្លើយសារភាព របស់​ជន​សង្ស័យថា ពួកគេ​ពិតជា​បាន​លួច​ស៊ីម៉ង់ត៍ របស់​ក្រុមហ៊ុន លក់​ពិតប្រាកដ​មែន កាលពី​ឆ្នាំ ២០១៨ រហូតមកដល់​បច្ចុប្បន្ន ពេលនេះ ជនសង្ស័យ ទាំងបី​នាក់ ត្រូវបាន​សមត្ថកិច្ច​ខ​ណ្ឌ​ដង្កោ កសាង​សំណុំរឿង​បញ្ជូន​ទៅកាន់ សាលាដំបូង រាជធានី​ភ្នំពេញ ដើម្បី​ចាត់ការ តាម​នីតិវិធី​ច្បាប់​៕​PC

ទីតាំងផ្សាយពាណិជ្ជកម្ម

- Advertisment -

Most Popular