Home ព័ត៌មានជាតិ សេដ្ឋកិច្ច ជនពិការ​ប្រមា...

ជនពិការ​ប្រមាណ​ជា​ជិត​៧០០០​នាក់ ត្រូវបាន​ជ្រើសរើស​ឲ្យ​ចូល​បម្រើការ


​ដោយៈ ជា សីហៈ​/​ភ្នំពេញៈ ជនពិការ​ប្រមាណ​ជា ជិត ៧០០០ នាក់ ត្រូវបាន​គេ​រាយការណ៍​ថា បាន​ត្រូវ​ជ្រើសរើស​ឲ្យ​ចូល​បម្រើ​ការងារ​នៅតាម​ស្ថាប័ន​ទាំង​សាធារណៈ​និង​ឯកជន ។ នេះ​បើតាម​សារ​របស់​សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​រាជរដ្ឋាភិបាល​កម្ពុ​ជានា​ឱកាស​ដែល​កម្ពុជា​ចូលរួម​ទិវា​ជនពិការ​ជាតិ​និង​អន្តរជាតិ​នៃ​ថ្ងៃទី ០៣ ខែ ធ្នូ ឆ្នាំ ២០២០ ។

​នៅក្នុង​សារ​នេះ បាន​រំលេច​ថា បច្ចុប្បន្ននេះ ជន​ពិការភាព​ត្រូវបាន​យកចិត្តទុកដាក់​ពី​គ្រប់​មជ្ឈដ្ឋាន​ហើយ​នៅក្នុង​ឆ្នាំ ២០១៩ កន្លងទៅនេះ ជនពិការ​ភាព​ដែល​ចូល​បម្រើ​ការងារ​ក្នុង​ក្រសួង​ស្ថាប័ន រដ្ឋ​ចំនួន ៤០ មាន​ជន​ពិការភាព​ចំនួន សរុប ២.៨៦០ នាក់ នៅក្នុង​នោះ ស្ត្រី​ពិការ​ចំនួន ៧៨៩ នាក់ ជនពិការ​កម្រិតធ្ងន់​ចំនួន ១.៥៥៧ នាក់ បើ​គិត​ជា​ភាគរយ គឺ​ប្រមាណ​ជា ១,៩៥ ភាគរយ ។​

​ប្រភព​ដដែល​បាន​បន្តថា ដោយឡែក វិស័យ​ឯកជន រួមមាន ធនាគារ គ្រឹះស្ថាន​មីក្រូហិរញ្ញវត្ថុ សណ្ឋាគារ រោងចក្រ ស្ថិតិ​ដែល​ក្រសួង​សង្គមកិច្ច​បានធ្វើការ​កត់ត្រា​សាកល្បង​នៅ​រាជធានី​ភ្នំពេញ កណ្តាល និង សៀមរាប លើ​អង្គភាព​ចំនូ​ន ១០២ អង្គភាព បាន​បង្ហាញថា មាន​ជន​ពិបាក​ភាព​ចូល​បម្រើ​ការងារ​ចំនូ​ន ៣.៧៩២ នាក់ នៅក្នុង​នោះ​ស្ត្រី​មាន​២.១៦២ នាក់ សរុប​ទាំង​ស្ថាប័នរដ្ឋ​និង​ឯកជន​ទូទាំងប្រទេស មាន​ចំនួន ជនពិការ​ភាព​ចំនួន ៦.៦៥២ នាក់ ។

​ប្រភព​ដដែល​បាន​ឲ្យ​ដឹងថា នៅក្នុង​នោះ នៅក្នុង​ចំណែក​សាច់ប្រាក់​នៃ​ការអនុវត្ត​កម្មវិធី​ផ្តល់​សាច់ប្រាក់​ជូន​ពលរដ្ឋ​ក្រីក្រ​និង​ងាយ​រងគ្រោះ​ដោយសារ​ជំងឺ​កូ​វីដ ១៩ ជនពិការ​ប្រមាណ​ជា ៥៨.២៥២ ក៏​ទទួលបាន​ការឧបត្ថម្ភ នេះ​ផងដែរ៕

ទីតាំងផ្សាយពាណិជ្ជកម្ម

- Advertisment -

Most Popular