Home ព័ត៌មានជាតិ នយោបាយ នាយករដ្ឋមន្ត្...

នាយករដ្ឋមន្ត្រី​ទី​ម័​រ​ឡេ​ស្ត​ផ្ញើ​សារ​ថ្លែងអំណរគុណ​សម្តេច​តេ​ជោ ហ៊ុន សែនចំពោះ​ការឧបត្ថម្ភ​ម៉ាស​១​លាន​៥​ម៉ឺន​និង​បរិក្ខារ​ពេទ្យ​ជាច្រើន

ដោយ​៖​តារា​រិ​ទ្ធ​/​ភ្នំពេញ​៖​លោក ទួ​រ ម៉ា​តាន់ រ៉ូ​ក់​(Taur Matan Ruak) នាយករដ្ឋមន្ត្រី​នៃ​សាធារណរដ្ឋ​ប្រជាធិបតេយ្យ​ទី​ម័​រ​ឡេ​ស្ត​បាន​ផ្ញើ​សារលិខិត​ថ្លែង​អំណរ គុណ​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ចំពោះ​ការឧបត្ថម្ភ​ម៉ាស​១​លាន​៥​ម៉ឺន​និង​បរិក្ខារ​ពេទ្យ​ជា​ច្រើ​ដល់ ប្រទេស​ទី​ម័​រ​ឡេ​ស្ត​ដើម្បី​ប្រយុទ្ធ​ប្រឆាំងនឹង​ជំងឺ​កូ​វីដ​១៩​។​

​តាម​សារលិខិត​ចុះ​នៅ​ថ្ងៃទី ១​ខែធ្នូ ឆ្នាំ​២០២០ លោកនាយក​រដ្ឋមន្ត្រី​ទី​ម័​រ​ឡេ​ស្ត​បាន​ថ្លែងថា​៖ «​តាងនាម​រដ្ឋាភិបាល​និង​ប្រជាជន​ទី​ម័​រ​ឡេ​ស្តេ​ខ្ញុំ​សូម​សម្ដែង​នូវ​ការ ដឹងគុណ​ដ៏​ស្មោះស្ម័គ្រ​ជូន​ចំពោះ​សម្ដេច​តេ​ជោ​នាយករដ្ឋមន្ត្រី និង រាជរដ្ឋាភិបាល​នៃ​ព្រះរាជណាចក្រ​កម្ពុជា​សម្រាប់​ការផ្តល់​នូវ​ម៉ាស់​ចំនួន​១​លាន​និង​សម្ភារៈ​វេជ្ជ សាស្ត្រ​ផ្សេងទៀត ជូន​ដល់​ប្រជាជន​ទី​ម័​រ​ឡេ​ស្ដ​»​។​

​សារលិខិត​បាន​បន្តថា​៖«​កាយវិការ​សាមគ្គីភាព​នេះ​គឺជា​ការបោះ​ជំហាន​ទៅមុខ​ក្នុង​ទំនាក់ទំនង​ទ្វេភាគី​រវាង​ប្រទេស​យើង​ទាំងពីរ​និង​ជាការ​គូសបញ្ជាក់​នូវ​សមាន ចិត្ត​ចែករំលែក​និង​ការយកចិត្តទុកដាក់​ទៅវិញទៅមក​រវាង​ប្រជាជន​នៃ​ព្រះរាជាណាចក្រ​កម្ពុជា​និង​ប្រជាជន​ទី​ម័​រ​ឡេ​ស្តេ​។​ដូច​ការលើកឡើង​ដ៏​ត្រឹមត្រូវ​របស់​សម្ដេច​តេ​ជោ​នាយករដ្ឋមន្ត្រី​ដែលថា​នេះ​គឺជា​កិច្ចសហប្រតិបត្តិការ​ដែល​នឹង​អនុញ្ញាតឱ្យ​យើង​អាច​ជម្នះ​បាន​លើ​ជំងឺ​រាតត្បាត​កូ​វីដ​-១៩»​។​

​លោកនាយក​រដ្ឋមន្ត្រី​ទី​ម័​រ​ឡេ​ស្ត​ក៏បាន​សម្ដែង​ផងដែរ​នូវ​ការដឹងគុណ​ចំពោះ​ការគាំទ្រ​ឥត​ងាករេ​របស់​សម្ដេច​តេ​ជោ​នាយករដ្ឋមន្ត្រី​ចំពោះ​កិច្ចខិតខំ​ប្រឹងប្រែង​រប​ស់ ប្រទេស​ទី​ម័​រ​ឡេ​ស្ត​ក្នុង​ការចូល​ជា​សមាជិក​អាស៊ាន​និង​អង្គការ​ពាណិជ្ជកម្ម​ពិភពលោក​អស់​រយៈកាល​ជាច្រើន​ឆ្នាំកន្លងមក ។ លោក​អះអាងថា​លោក​នៅតែ​បន្ត ពឹង​ផ្អែកលើ​ការគាំទ្រ​នេះ​នៅក្នុង​កិច្ចដំណើរការ​នាំទៅរក​ការអនុម័ត​ឱ្យ​ប្រទេស​ទី​ម័​រ​ឡេ​ស្តេ​ក្លាយជា​សមាជិក​ទី​១១ នៃ​សមាគម​ប្រជាជាតិ​អាស៊ីអាគ្នេយ៍​។​

​គួរ​បញ្ជាក់ថា​ម៉ាស​របស់​កម្ពុជា​ចំនួន​១​លាន​៥​ម៉ឺន​និង​សម្ភារៈ​បរិក្ខារ​មួយចំនួនទៀត​ត្រូវបាន​ដឹក​តាម​យន្តហោះ​ពិសេស​ចាក​ចេញពី​រាជធានី​ភ្នំពេញ​ឆ្ពោះទៅកាន់​ប្រទេស​ទី​ម័​រ​ខាងកើត​(​ទី​ម័​រ​ឡេ​ស្ត​) ត្រូវបានធ្វើ​ពិធី​ប្រគល់ជូន​រដ្ឋាភិបាល​និង​ប្រជាជន​ទី​ម័​រ​ខាងកើត​រួចរាល់​ហើយ​នៅ​ថ្ងៃទី​០២​ខែធ្នូ ឆ្នាំ​២០២០​នេះ​។​អំណោយ​ទាំង នេះ​ត្រូវបាន​ដឹកនាំ​ដោយ​លោក​អ៊ុច បូរ​រិ​ទ្ធ រដ្ឋមន្ត្រី​ប្រតិភូ​អម​នាយករដ្ឋមន្ត្រី​និង​ជា​រដ្ឋលេខាធិការ​ប្រចាំការ​ក្រសួងការបរទេស​និង​សហប្រតិបត្តិការ​អន្តរជាតិ​តំ​ណា ង​ដ៏​ខ្ពង់ខ្ពស់​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជណាចក្រ​កម្ពុជា​។​

​ជំនួយ​របស់​កម្ពុជា​ផ្តល់ជូន​ប្រទេស​ទី​ម័​រ​ឡេ​ស្ត​នាពេលនេះ​រួមមាន​៖ ៖ ម៉ាស​ចំនួន​១​លាន​, ម៉ាស​ក្រណាត់​៥​ពាន់​, ម៉ាស N95 ចំនួន​១​ម៉ឺន​, វែ​នតា​សុវត្ថិភាព​ចំនួន ១​ម៉ឺន​,​សំលៀកបំពាក់​សុវត្ថិភាព​សម្រាប់​មន្ត្រី​សុខាភិបាល (​ជា​ឈុត​)​ចំនួន​១​ម៉ឺន​ឈុត​,​ឧបករណ៍​វាស់​កំដៅ​ចំនួន​២៥០, របាំងមុខ​ចំនួន​១​ម៉ឺន​,​ម៉ាស៊ីន​ជំនួយ​ដល់ ការដកដង្ហើម​សម្រាប់​ប្រ​យោធ​នក​ម្ម​ចំនួន​១០, ទូរទស្សន៍​តាមដាន​សុខភាព​អ្នកជំងឺ​និង​សម្ភារ​បន្ទាប់បន្សំ​ម៉ូ​ឌែ​ល Vista 120 ចំនួន​១០, ម្សៅ​ថ្នាំ​បាញ់សម្លាប់​មេ រោគ​២៥​គីឡូក្រាម​ក្នុង​១​ធុង (​ក្ល​រ៉ា​មីន​ប្រភេទ​B) ២៥០​កេស​, ស្បែកជើង​ក៏​វែង​សុវត្ថិភាព ៥០០​គូ និង សាប៊ូ​លាងដៃ​១​ពាន់​គូ​។​

​គួរបញ្ជាក់​ផងដែរ​ថា​រាជរដ្ឋាភិបាល​កម្ពុជា​ទើបបាន​ផ្តល់​ម៉ាស​ចំនួន​ជាង​២​លាន​និង​សម្ភារ​ពេទ្យ​មួយចំនួន​ដល់​ប្រទេស​ឡាវ និង ផ្តល់​ម៉ាស​ចំនួន​ជាង​២​លាន​និង សម្ភារ​ពេទ្យ​មួយចំនួនទៀត​ដល់​ប្រទេស​មី​យ៉ាន់​ម៉ា​ដើម្បី​ចូលរួម​ប្រយុទ្ធ​ប្រឆាំងនឹង​ជំងឺ​កូ​វីដ​១៩ នៅក្នុង​ប្រទេស​ទាំងនោះ​៕​

ទីតាំងផ្សាយពាណិជ្ជកម្ម

- Advertisment -

Most Popular