Home ព័ត៌មានជាតិ សង្គម អភិបាល​រាជធាន...

អភិបាល​រាជធានី​ថ្លែងអំណរគុណ​សម្ដេច​តេ​ជោ ហ៊ុន សែន ដែល​ផ្ដល់​អំណោយ​ម៉ាស​លើក​ទី​២​ចំនួន​១​លាន​ម៉ាស​

ដោយ​៖ រ៉ា​ម៉ន / ភ្នំពេញ​៖ លោក ឃួ​ង ស្រេង អភិបាល​រាជធានី​ភ្នំពេញ នៅ​ថ្ងៃទី​២ ខែវិច្ឆិកា ឆ្នាំ​២០២០​នេះ បាន​ថ្លែងអំណរគុណ​សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា ដែល​ផ្ដល់​អំណោយ​ម៉ាស​លើក​ទី​២ ចំនួន​១​លាន​ម៉ាស សម្រាប់​ចែកជូន​ប្រជាពលរដ្ឋ​រស់នៅក្នុង​រាជធានី​ភ្នំពេញ ដើម្បី​ការពារ​ការឆ្លង​រីក​រាលដាល​ជំងឺ​កូ​វីដ​-១៩ ក្រោយ​ផ្ទុះ​ព្រឹត្តិការណ៍ «​សហគមន៍ ២៨​វិច្ឆិកា​»​។​

​សម្ដេច​តេ​ជោ ហ៊ុន សែន បានប្រកាស នៅ​យប់​ថ្ងៃទី​១ ខែធ្នូ ឆ្នាំ​២០២០ ជូន​សាធារណជន​ឲ្យ​បាន​ជ្រាបថា​៖ សម្តេច​សម្រេច​បញ្ចេញ​ម៉ាស​ចំនួន​២​លាន​បន្ថែមទៀត​, ដោយ​ក្នុងនោះ​មួយ​លាន​សម្រាប់​រាជធានី​ភ្នំពេញ និង​មួយ​លាន​ទៀត​សម្រាប់​ខេត្តសៀមរាប ដើម្បី​ចូលរួម​ប្រើប្រាស់​ជាបន្ទាន់ ក្នុង​ការជួយ​ទប់ស្កាត់​ការរីក​រាលដាល​ជំងឺ​កូ​វីដ​១៩​។​

​លោក ឃួ​ង ស្រេង ក្នុងនាម​កងកម្លាំងប្រដាប់អាវុធ មន្ដ្រីរាជការ និង​ប្រជាពលរដ្ឋ​ទាំងអស់​ក្នុង​រាជធានី​ភ្នំពេញ បាន​គោរព​ថ្លែងអំណរគុណ​យ៉ាង​ជ្រាលជ្រៅ​ជូន​ចំពោះ សម្ដេច​តេ​ជោ ហ៊ុន សែន នាយករដ្ឋមន្ដ្រី​នៃ​កម្ពុជា ដែល​បានផ្ដល់​អំណោយ​ម៉ាស​ចំនួន​១​លាន​ម៉ាស ជូន​ដល់​រដ្ឋបាល​រាជធានី​ភ្នំពេញ សម្រាប់​ចែក​បន្ដ​ជូន​ប្រជាពលរដ្ឋ​។​

​លោក ឃួ​ង ស្រេង បាន​ទុក​ថា​៖ កាយវិការ​នេះ​បានបង្ហាញ​ឲ្យ​ឃើញ​អំពី​ការយកចិត្ត​ទុក្ខ​ដាក់​ខ្ពស់បំផុត​ពី​សំណាក់​ថ្នាក់ដឹកនាំ​កំពូល​របស់​ជាតិ មកលើ​ប្រជាពលរដ្ឋ ខណៈ​ប្រទេស​កម្ពុជា និង​ពិភពលោក​ទាំងមូល​កំពុង​ប្រឈម​ខ្លាំង​ជាមួយ​ជំងឺ​កូ​វីដ​-១៩ ពិសេស​ក្រោយ​កម្ពុជា​ផ្ទុះ​នូវ​ការឆ្លង​ជំងឺ​នេះ​ចូល​សហគមន៍​ជា​លើកដំបូង ដែល​ត្រូវបាន​ហៅថា​ជា​ព្រឹត្តិការណ៍ «​សហគមន៍ ២៨​វិច្ឆិកា​»​។​
​សូម​រំលឹកថា​៖ ការបញ្ចេញ​ម៉ាស​ចំនួន​២​លាន (​លើក​ទី​២) សម្រាប់​រាជធានី​ភ្នំពេញ ១​លាន​ម៉ាស និង​ខេត្តសៀមរាប ១​លាន​ម៉ាស នៅពេលនេះ គឺជា​ការបន្ថែម​ដែល​កាលពីមុន​បាន​បញ្ចេញ​ចំនួន​២​លាន​ម៉ាស ម្តង​រួចមកហើយ សម្រាប់​រាជធានី​ភ្នំពេញ​។​

​គួរ​បញ្ជាក់ថា​៖​គិត​ត្រឹម​ម៉ោង ០៧៖០០​ព្រឹក​ថ្ងៃទី​០២ ខែធ្នូ ឆ្នាំ​២០២០​នេះ នៅ​កម្ពុជា​រកឃើញ​អ្នកមាន​វីរុស​កូ​វីដ​-១៩ មាន​ចំនួន​សរុប ៣២៩​នាក់ (​ស្រី ៧៤​នាក់ និង​បុរស ២៥៥​នាក់​) ក្នុងនោះ​ចំនួន​អ្នក​ព្យាបាល​ជាសះស្បើយ សរុប​ទូទាំងប្រទេស មាន​ចំនួន ៣០៤​នាក់ និង អ្នក​សម្រាក​ព្យាបាល​នៅ​មន្ទីរពេទ្យ​ចំនួន ២៥​នាក់​៕​

ទីតាំងផ្សាយពាណិជ្ជកម្ម

- Advertisment -

Most Popular