Home ព័ត៌មានជាតិ សេដ្ឋកិច្ច សហព័ន្ធ​ស្រូវ...

សហព័ន្ធ​ស្រូវ​អង្ករ​បង្ហាញ​វឌ្ឍនៈភាព​អង្ករ​ឆ្នើម​កម្ពុជា​ទៅកាន់​សន្និសីទ​ស្រូវ​អង្ករ​ពិភពលោក​លើក​ទី​១២

ដោយ: ពៅនិមល/ភ្នំពេញ​: លោកស្រី គឹម ស្រីរ័ត្ន អនុប្រធាន​សហព័ន្ធ​ស្រូវ​អង្ករ​កម្ពុជា (​ស​.​អ​.​ក​) និង​ជា​ប្រធាន គណៈកម្មាធិការ​ប្រតិបត្តិ​ទទួលបន្ទុក​ផ្នែក​ទីផ្សារ​និង​ជំរុញ​ការនាំចេញ រប​ស់ស​.​អ​.​ក កាលពី ថ្ងៃទី​២ ខែធ្នូ ឆ្នាំ​២០២០​កន្លងទៅ បាន​ចូលរួម​ផ្តល់​បទ​បង្ហាញ​អំពី​វិស័យ​ស្រូវ​អង្ករ​កម្ពុជា នៅក្នុង​សន្និសីទ​ស្រូវ​អង្ករ​ពិភពលោក​លើក​ទី​១២ ដែល​ធ្វើឡើង​តាមរយះ​អន​ឡាញ​។

​សូមបញ្ជាក់ថា ជា​រៀងរាល់ឆ្នាំ​សន្និសីទ​ស្រូវ​អង្ករ​ពិភពលោក ត្រូវបាន​រៀបចំឡើង​ដោយ មាន​ជួបជុំ​និង​ការប្រមូលផ្តុំ​នូវ​អ្នកពាក់ព័ន្ធ​នៅក្នុង​ការធ្វើ​ពាណិជ្ជកម្ម​ស្រូវ​អង្ករ​កម្រិត​ពិភពលោក ដោយឡែក​ឆ្នាំនេះ​ដោយសារ​ការរីក​រាលដាល​ជំងឺ​កូ​វីដ​១៩ សន្និសីទ​នេះ​ក៏ត្រូវ​បានរៀបចំ ឡើង​តាមរយៈ​វេទិកា​អន​ឡាញ​ជំនួស​វិញ​។

​ក្នុង​អង្គប្រជុំ​នាឱកាស​នោះ​លោកស្រី គឹម ស្រីរ័ត្ន បានធ្វើ​បទ​បង្ហាញ​ជារួម​អំពី​បច្ចុប្បន្នភាព នៃ​វិស័យ​ស្រូវ​អង្ករ​កម្ពុជា​ដែល​រួមបញ្ចូល ផលិតកម្ម​ស្រូវ និង​វឌ្ឍនភាព​នៃ​ការនាំចេញ​អង្ករ របស់​កម្ពុជា​ទៅកាន់​ទីផ្សារ​ពិភពលោក ដែល​គិត​មក​ត្រឹម​ខែវិច្ឆិកា ឆ្នាំ​២០២០​នេះ ការនាំ ចេញ​ក្នុង​រយៈពេល​១១​ខែ បាន​កើនឡើង​ជិត​១៧​ភាគរយ ដែល​គិត​ជា​បរិមាណ​សរុប​មាន ចំនួន​៦០១. ០៤៥​តោន និង​គិត​ជា​ទឹកប្រាក់​ទទួលបាន​៤១៥​លាន​ដុល្លារ​អាម៉េរិក​។ ជាមួយគ្នានេះ លោកស្រី​ក៏បាន​ឆ្លៀត​រំលេច​អំពី​លក្ខណៈពិសេស​របស់​អង្ករ​ក្រអូប​ប្រណីត របស់​កម្ពុជា “​ម្លិះ​អង្គរ​” និង​ធ្លាប់​បានទទួល​ពានរង្វាន់​អង្ករ​ល្អ​បំផុត​លើ​ពិភពលោក​ចំនួន ៤​ដង​រួចមកហើយ ពី​សន្និសីទ​ស្រូវ​អង្ករ​ពិភពលោក កាលពី​ឆ្នាំ​២០១២- ២០១៣ ២០១៤ និង​២០១៨​។

​លោកស្រី​ក៏បាន​បង្ហាញ​បន្ថែមទៀត​អំពី​ការយកចិត្ត​ទុក​របស់​រដ្ឋាភិបាល​កម្ពុ​ជា ក្នុងការ ជួយ​ពង្រឹង និង​ទ្រទ្រង់​វិស័យនេះ តាមរយៈ​ការផ្តល់​ឥណទាន​ដល់​រោង​ម៉ាស៊ីន​ស្រូវ​ក្នុង អត្រា​ពិសេស ដើម្បី​ជា​ទុន​បង្វិល​ទិញស្រូវ និង​ទុន​រយៈពេល​មធ្យម​និង​វែង​សម្រាប់​សាងសង់ ឡស​ម្ងួ​ត និង​ឃ្លាំង​ស្តុក​ស្រូវ ដែល​កម្មវិធី​នេះ​បាន​អនុវត្ត​ដោយ​ធនាគារ​អភិវឌ្ឍន៍ជនបទ និង​កសិកម្ម​។ លើសពីនេះ​ទៀត លោកស្រី​ក៏​បង្ហាញ​ពី​ភាព​ប្រកួតប្រជែង និង​ការលើក ទឹកចិត្ត​ដល់​ការវិនិយោគ​លើ​វិស័យ​ស្រូវ​អង្ករ​កម្ពុជា​តាមរយៈ​ការទទួលបាន​ការលើក​លែង ពី​រាជរដ្ឋាភិបាល​កម្ពុជា លើ​ពន្ធដារ និង​អាករ​គ្រប់​ប្រភេទ ពន្ធ​នាំចូល ពន្ធ​នាំចេញ​ដល់ វិស័យ​ស្រូវ​អង្ករ និង​អ្នកវិនិយោគ​លើ​វិស័យនេះ​។

​សហព័ន្ធ​ស្រូវ​អង្ករ​កម្ពុជា ក្រោម​ការគាំទ្រ​ពី​រដ្ឋាភិបាល​អូស្ត្រាលី តាមរយៈ​កម្មវិធី​ខ្សែសង្វាក់ តម្លៃ​កសិកម្ម​កម្ពុជា​-​អូស្ត្រាលី បាន​ចូលរួម​ផ្សព្វផ្សាយ​អំពី​ម៉ាក “​ម្លិះ​អង្គរ​” របស់​កម្ពុជា នៅលើ​ទីផ្សារ​សកលលោក​តាមរ​យៈ​ការចូល​រួមសហការ​ឧបត្ថម្ភ​សន្និសីទ​ស្រូវ​អង្ករ​ពិភពលោក លើក​ទី​១២​។ គោលបំណង​នៃ​ការចូលរួម​ឧបត្ថម្ភ​នេះ​គឺ ដើម្បី​លើកស្ទួយ និង​ផ្សព្វ ផ្សាយ​អំពី​វិស័យ​វឌ្ឍនភាព​និង​ការអភិវឌ្ឍ​របស់​វិស័យ​ស្រូវ​អង្ករ​កម្ពុជា ក្នុង​យុគសម័យ​ថ្មី​៕​PC

ទីតាំងផ្សាយពាណិជ្ជកម្ម

- Advertisment -



Most Popular