ដោយៈ បូកគោ/កំពតៈ ប្រជាកសិករ ដែលជាម្ចាស់គោ កំពុងមានការភិតភ័យ ដោយសារ ជំងឺកាចសាហាវ កំពុងរាតត្បាត និងធ្វើឱ្យសត្វគោ ប្រមាណជាង ១០០ ក្បាល បានងាប់ ជាបន្តបន្ទាប់ ដោយមិនទាន់ដឹង ពីមូលហេតុ ច្បាស់លាស់នៅឡើយ ហើយគ្រួសារ កសិករខ្លះ ត្រូវបង្ខំចិត្តលក់គោ ក្នុងតម្លៃទាប ខណៈដែលមន្ត្រីជំនាញ កំពុងប្រឹងប្រែង និងបង្ការទប់ស្កាត់ ការគំរាមកំហែង ពីជំងឺដ៏កាចសាហាវនេះ។
កសិកររស់នៅក្នុងភូមិដូនយ៉យ ឃុំដូនយ៉យ ស្រុកឈូក ខេត្តកំពត បានរៀបរាប់ថាៈ ប៉ុន្មានសប្តាហ៍ ចុងក្រោយនេះ សត្វគោរបស់អ្នកភូមិ មានអាការៈចម្លែក ដូចជាកើតរោគក្តៅ រងាញ័រ មិនស៊ីស្មៅ ឈឺជើង ហៀរទឹកមាត់ និងដើរមិនរួច។ ក្រោយមក ប្រហែលមួយថ្ងៃ ឬពីរថ្ងៃ សត្វគោ ដែលឈឺទាំងនោះ ក៏ចាប់ផ្តើមងាប់ យ៉ាងទាន់ហន់បំផុត។
កសិករដដែល បានបន្តថាៈ ក្នុងស្ថានភាពបែបនោះ ដោយមានការភ័យខ្លាចផង និងមាន ការបញ្ចុះបញ្ចូល ពីឈ្មួញដើរទិញគោថា គោដែលឈឺ មិនអាចព្យាបាលឱ្យជា សះស្បើយ ឡើងវិញ ទើបអ្នកភូមិ នាំគ្នាលក់គោ ក្នុងតម្លៃថោក ព្រោះខ្លាចខាតបង់ច្រើន។
លោក ម៉េង សន្តិភាព ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម ខេត្តកំពត បានបញ្ជាក់ថាៈ កន្លងមក មានករណីគោងាប់ ពិតមែន ហើយប្រជាកសិករ ម្ចាស់គោ ក៏ភិតភ័យទើប នាំគ្នាលក់គោ ចេញជាបន្ទាន់ ប៉ុន្តែមិនដល់ថ្នាក់អស់ ពីក្រោល នោះទេ។ ក្រោយពេលចុះពិនិត្យ ផ្សព្វផ្សាយ អំពីវិធានការទប់ស្កាត់ និងព្យាបាលជំងឺគោ ពិសេសជំងឺអុតក្តាម នៅតាមស្រុកទាំង ៧ ក្នុងខេត្ត គិតមកដល់ថ្ងៃទី២៥ វិច្ឆិកា ឆ្នាំ២០២០ ទូទាំងខេត្តកំពត មានករណីរគោឈឺ ២៦ ករណី ក្នុងនោះគោស្លាប់ជាង ១០០ ក្បាល និងឈឺជាង ១.៥០០ ក្បាល។
លោកប្រធាន បានបញ្ជាក់ទៀតថាៈ នៅចំពោះមុខ មន្ត្រីជំនាញ នឹងបន្តវិធានដំណើរការ តាមររយៈតំបន់ ដែលមិនទាន់មានគោឈឺ ត្រូវចាក់ថ្នាំការពារ។ ចំណែកតំបន់កំពុងមាន គោឈឺ ត្រូវផ្សព្វផ្សាយ អំពីវិធានការអនាម័យ ការការពារ និងធ្វើការព្យាបាលជាបន្ទាន់៕PC
