Home កម្សាន្ត ផលិតកម្ម​ថោ​ន...

ផលិតកម្ម​ថោ​ន​នឹង​បើក​ព្រឹត្តិការណ៍​ថ្មី​ដោយ​រួមគ្នា​ជាមួយ​ផលិតកម្ម​ធំ​មួយ​របស់​ថៃ

ដោយ​: បូ​រិ​ន / ភ្នំពេញ​: ព្រឹត្តិការណ៍​ដ៏​អស្ចារ្យ​និង​មិន​ធ្លាប់មាន​ក្នុង​វិស័យ​សិល្បៈ​គឺ ការចុះ​អនុស្សរណៈ​រវាង​ផលិតកម្ម​ទីក្រុង​ភាពយន្ត ថោ​ន និង​ផលិតកម្ម​ដ៏​ល្បី​របស់​GMM Grammy ដែលមាន​ផ្សាយ​នៅ​ស្ថានីយទូរទស្សន៍ Town Full HD TV នា​ថ្ងៃទី​៣ ខែធ្នូ​នេះ​។​

​លោកស្រី វ៉ា នី​តា ក្រុមហ៊ុន ថោ​ន​អ៊ិន​ធឺ​ធេ​ន​មេន​គ្រុប បាន​ថ្លែងថា ផលិតកម្ម ទីក្រុង​ភាពយន្ត (​ថោ​ន​) ប្រចាំ​ប្រទេស​កម្ពុជា និង​ផលិតកម្ម GMM (GRAMMY) ប្រចាំ​ប្រទេស ថៃ បានរួម​គ្នា ចុះ​កិច្ចព្រមព្រៀង​ពង្រីក​ទីផ្សារ​ផ្នែក​វិស័យ​សិល្បៈ​កម្សាន្ត រួមគ្នា​ផលិត​បទ​ចម្រៀង​បង្កើត​ព្រឹត្តិការណ៍ ប្រគុំ​តន្ត្រី (Concerts) បង្កើត​រសជាតិ​ថ្មី ស្របតាម​តម្រូវការ​ទីផ្សារ នាពេល​បច្ចុប្បន្ន ក៏ដូចជា​ទៅ​អនាគត​។

​លោកស្រី បន្តថា ដើម្បី​បង្ក​ភាពងាយស្រួល ជូន​ពុក​ម៉ែ បងប្អូន មិត្ត​យុវវ័យ ដែល​បាន​គាំទ្រ​ស្នាដៃ​ផលិត ពី​ផលិតកម្ម​យើងខ្ញុំ នៅពេលនេះ ផលិតកម្ម ទីក្រុង​ភាពយន្ត (​ថោ​ន​) និង​ផលិតកម្ម GMM (GRAMMY) បានរួម​គ្នា​បង្កើត​បណ្តា​ញ​សង្គម YouTube ថ្មី​មួយ​ឈ្មោះថា «TOWN x GMM GRAMMY» អាស្រ័យហេតុនេះ សូម​បន្ត​ការគាំទ្រ​បន្ថែមទៀត ជាមួយ​ការចូល​ទស្សនា​កំសាន្ត​ផ្ទាំង​ទស្សនី​ភាព​យ៉ាង​សំបូរបែប​ដោយ​សេរី​។ ការគាំទ្រ​របស់​ពុក​ម៉ែ បងប្អូន មិត្ត​យុវវ័យ គឺជា​កម្លាំងចិត្ត ដ៏​អស្ចារ្យ របស់​យើងខ្ញុំ ឲ្យ​កាន់តែ​ខិតខំ​បង្កើត​ផលិតផល​ថ្មីៗ​ជូន​។​

​លោកស្រី វ៉ា នី​តា បន្ថែមទៀតថា ផលិតកម្ម ទីក្រុង​ភាពយន្ត (​ថោ​ន​) និង​ផលិតកម្ម GMM (GRAMMY) ចាប់ពី​ថ្ងៃនេះ​តទៅ បានរួម​គ្នា​ធ្វើ​ទំនើបកម្ម ដើម្បី​ឆ្លើយតប​ទៅ​និង​តម្រូវការ​ទីផ្សារ ឲ្យ​បាន​ទាន់ពេល និង​កាន់តែ​ទូលំទូលាយ ជាពិសេស ខិតខំ​សំអិតសំអាង ផលិតកម្ម​វិធី​ល្អៗ ឲ្យ​បាន​ច្រើន ដើម្បី​បំពេញ​តាម តម្រូវការ​ទីផ្សារ​ក្នុង​ស្មារតី​ទទួលខុសត្រូវ សំដៅ​រួមគ្នា​លើកកម្ពស់​វិស័យ​សិល្បៈ ឲ្យ​មាន​ភាពល្បីល្បាញ និង​រួមគ្នា​ការពារ​គោរព​គាំទ្រ​លើ​ស្នាដៃ​អ្នកនិពន្ធ និង​ក្រុម​អ្នក​ផលិត ក្នុងន័យ​ការលើកទឹកចិត្ត ផ្តល់​តម្លៃ​ម្ចាស់​កម្ម​សិទ្ធ​។​

​នាយក​គ្រប់គ្រង​ទូទៅ​ប្រចាំ​ផលិតកម្ម​ថោ​ន លោក អ៊ិន រិទ្ធី​ចិត្រ បាន​មានប្រសាសន៍ថា នៅថ្ងៃនេះ ថោ​ន​បាន​បោះជំហាន​ទៅមុខ មួយ​ជំហាន​ទៀត ដោយបាន​សហការ ជាមួយ​ផលិតកម្ម​ល្បី របស់​ប្រទេស​ថៃ ដោយ​ការចុះ​អនុស្សារណៈ​រវាង​ផលិតកម្ម​ថោ​ន និង​ផលិតកម្ម​របស់​ប្រទេស​ថា Grammy​។​

​សូមបញ្ជាក់ថា គិត​មកដល់​ថ្ងៃនេះ ផលិតកម្ម ទីក្រុង​ភាពយន្ត (​ថោ​ន​) មាន​អាយុកាល ១០​ឆ្នាំ មាន​តារាចម្រៀង ប្រុស ស្រី និង​តារា​សម្តែង​ល្បីៗ ជាច្រើន បានរស់នៅ​ជាមួយ ថោ​ន បង្កើតបានជា​ផ្ទាំងទស្សនីយភាព ដ៏​ជក់ចិត្ត បំរើ​ដល់​សាធារណៈជន​។ រាប់​ចាប់តាំងពី ថោ​ន បានចាប់កំណើត ជាមួយ​ការទទួលបាន ការគាំទ្រ​ពី​មហាជន​ទាំង​ក្នុង និង​ក្រៅប្រទេស ផលិតកម្ម ទីក្រុង​ភាពយន្ត (​ថោ​ន​) បាន​ពង្រីក​អាជីវកម្ម​របស់ខ្លួន ដើម្បី​ចូលរួមចំណែក​ការកសាង​អភិវឌ្ឍន៍​សង្គមជាតិ​។​

​ជាការ​ពិត​ភាព​រីកចំរើន និង​ការគាំទ្រ​ពី​មហាជន​ធ្វើ​ឲ្យ ផលិតកម្ម​ទីក្រុង​ភាពយន្ត (​ថោ​ន​) បាន​ពង្រីក​សេវាកម្ម របស់ខ្លួន​ជា​បន្តបន្ទាប់ រហូត​បង្កើតជា​ក្រុមហ៊ុន ថោ​ន​អ៊ិន​ធឺ​ធេ​ន​មែន​គ្រុប ដោយមាន​បុត្រ​សម្ព័ន្ធ​ចំនួន ៥ រួមមាន ៖ ផលិតកម្ម​ទីក្រុង​ភាពយន្ត (​ថោ​ន​) ,​ស្ថានីយ​វិទ្យុ ថោ​ន FM102.25MHz ,​ស្ថានីយ​វិទ្យុ ថប FM92.30MHz ស្ថានីយទូរទស្សន៍ TOWN FULLHD TV ,​ផលិតកម្ម TOP MUSIC៕​

ទីតាំងផ្សាយពាណិជ្ជកម្ម

- Advertisment -

Most Popular