Home ព័ត៌មានជាតិ សុខាភិបាល វេជ្ជបណ្ឌិត ឱ...

វេជ្ជបណ្ឌិត ឱ វណ្ណឌី​ន​៖ អត្រា​លាប់​កូ​វីដ​១៩​និង​លទ្ធភាព​ចម្លង មាន​ភាគរយ​ទាប​

​ដោយៈ​សុផល​/​ភ្នំពេញ​: គិត​មក​នៅត្រឹម​ថ្ងៃទី​៣ ខែធ្នូ ឆ្នាំ​២០២០ មាន​អ្នកជំងឺ​កូ​វីដ​-១៩ ចំនួន​៣៣១​នាក់​។ ក្នុងនោះ​៣០៤​នាក់​ត្រូវបាន​ព្យាបាល​ជាសះស្បើយ (​ជាង​៩១​ភាគរយ​) តែ​ក្នុងនោះ​៨​នាក់​បាន​បាន​លាប់​មកវិញ តែ​ភាគរយ​លាប់​មកវិញ​នេះ មាន​អត្រា​ទាប​បំផុត គឺ​ប្រមាណ​២,៦៣​ភាគរយ​ប៉ុណ្ណោះ​។ នេះ​បើតាម​ការពន្យល់​របស់​លោកស្រី​វេជ្ជបណ្ឌិត ឱ វណ្ណឌី​ន រដ្ឋលេខាធិការ និង​ជា​អ្នកនាំពាក្យ​ក្រសួងសុខាភិបាល​។​

​សូមជម្រាបថា លោក​សួស យ៉ា​រ៉ា តំណាងរាស្ត្រ ដែល​បាន​ព្យាបាល​ជាសះស្បើយ​ហើយ​នោះ បាន​លាប់​ឡើងវិញ​ហើយ​កំពុង​សម្រាក​ព្យា​ល​នៅ​មន្ទីរពេទ្យ​។​
​ទន្ទឹមនឹងនេះ លោកស្រី​វេជ្ជបណ្ឌិត បាន​បញ្ជាក់ថា​៖ «​អ្នកជំងឺ​ដែល​ត្រូវបាន​ព្យាបាល​ជាសះស្បើយ អាចមាន​លទ្ធភាព​លាប់​ឡើងវិញ​ពី​អត្រា​១០​ទៅ​១៥​ភាគរយ តែ​ការ​លាប់ និង​អត្រា​ឆ្លង​នេះ មាន​ភាគរយ​ទាប​បំផុត ដោយសារ​មេរោគ​បាន​ថមថយ​ឥទ្ធិពល​ចម្លង​»​។​

​លោកស្រី​បានបញ្ជាក់​បន្ថែមថា​៖ «​វា​មិនមែន​មិន​ឆ្លង​សោះ​នោះទេ តែមាន​អត្រា​ទាប​មែនទែន មិន​ដូច​នៅពេល​អ្នកជំងឺ​ទើប​ឆ្លង​ដំបូង​និង​ចេញ​រោគសញ្ញា​នោះទេ ។ តែ​ទោះជា​យ៉ាងណាក៏ដោយ​អ្នក​ដែលជា​សះស្បើយ​ហើយ គឺ​នៅតែ​ត្រូវ​នៅ​ដាក់​ដាច់ដោយឡែក​សិន​ក្នុង​រយៈពេល​១៤​ថ្ងៃ ហើយ​ត្រូវ​តាមដាន​សុខភាព​និង​មិន​អនុញ្ញាតឱ្យ​ចេញទៅ​ក្រៅ​ទៅ​ជួប​អ្នកនេះ​អ្នកនោះ​ឡើយ​។​ជាពិសេស​ត្រូវអនុវត្ត​វិធានការ​ការពារ​ខ្លួន​ជាប់​ជានិច្ច​»​។​

​ហេតុអ្វី​បានជា​កូ​វីដ​១៩​លាប់​ឡើងវិញ​? លោកស្រី​វេជ្ជបណ្ឌិត បាន​ពន្យល់ថា​៖ «​នៅពេល​បុគ្គល​ចូល​សម្រាក​ព្យាបាល​នៅ​មន្ទីរពេទ្យ វីរុស ដែល​នៅក្នុង​ខ្លួន​គាត់​នោះ ខិតខំ​វ៉ៃ​លុក​ក្នុង​សរីរាង្គ​របស់​បុគ្គល ហើយ​សរីរាង្គ​របស់​អ្នកជំងឺ ក៏​ខិតខំ​ទប់ទល់​តបត​ទៅ​កូ​វីដ​-១៩​វិញ​។ ដូច្នេះ ការថែទាំ ការព្យាបាល របស់​ក្រុមគ្រូពេទ្យ របប​ម្ហូបអាហារ (​ពិសារ​ឱ្យបាន​គ្រប់គ្រាន់ ជីវជាតិ​ឱ្យបាន​គ្រប់គ្រាន់ និង​ការ​សំរាន្ត​ឱ្យបាន​គ្រប់គ្រាន់​)​ទាំងអស់នេះ​មាន​សារៈសំខាន់​ណាស់​»​។​

​លោកស្រី​រដ្ឋលេខាធិការ បាន​បន្ថែមថា​៖ ការ​សំរាន្ត​របស់​មនុស្ស សំខាន់​ណាស់ គឺ​ដើម្បី​កុំឱ្យ​សរីរាង្គ​យើង​ថមថយ និង​បាន​វាយ​ឈ្នះ​វីរុស​កូ​វីដ​១៩​និង​ធ្វើឱ្យ​កូ​វីដ​១៩​ថមថយ​ឥទ្ធិ​ល​រប​ស់វា​។ ដោយសារ​យើង​ខ្លាំង វីរុស​ចុះខ្សោយ ហើយ​បែកខ្ញែក​(​ងាប់​) វា​នៅសល់តែ​កំទេចកំទី​តូចតាច ដែលជា​ប្រភេទ​ប្រូតេអ៊ីន​នៅសល់​ក្នុង​ខ្លួន​របស់​យើង (​ពេលធ្វើ​តេស្ត​មើលមិនឃើញ​វីរុស​ទេ​)​។ តែ​នៅពេល​ណាមួយ​នោះ វីរុស​អាច​កម្រើក​ឡើង​វិញ​។ វា​ខិតខំ​ងើប​មកវិញ នៅពេលនោះ​ហើយ​ដែល​យើង​ធ្វើតេស្ត​ឃើញ​វីរុស​នោះ តែ​វីរុស​លើក​នេះ វា​អត់​ដូច​វីរុស​ពីដំបូង​ទេ​។ វីរុស​នេះហើយ​ដែល​គេ​ហៅថា «​លាប់​» ហើយ​អ្នកជំងឺ​ត្រូវ​វិលត្រឡប់​ទៅ​ព្យាបាល​ម្តងទៀត ដើម្បីឱ្យ​សរីរាង្គ​យើង​សង្កត់​វីរុស​នេះ​ងាប់​តែម្តង​»៕​

ទីតាំងផ្សាយពាណិជ្ជកម្ម

- Advertisment -

Most Popular