Home ព័ត៌មានជាតិ សេដ្ឋកិច្ច ​ក្រសួងសុខាភិ...

​ក្រសួងសុខាភិបាល​ណែនាំ​ពង្រឹង​វិធានការ​អនាម័យ​បន្ថែម​នៅ​ផ្សារ​ទំនើប​,​ធនាគារ​និង​អាជីវកម្ម​ផ្សេងៗ​

ដោយ​៖​តារា​រិ​ទ្ធ​/​ភ្នំពេញ ៖​ដើម្បី​ទប់ស្កាត់​ការរីក​រាក​ដាល​និង​ឆ្លង​ជំងឺ​កូ​វីដ​១៩ ក្រសួងសុខាភិបាល​ណែនាំ​ឲ្យ​មានការ​ពង្រឹង​ការអនុវត្ត​វិធានការ​អនាម័យ​បន្ថែម​និង​ជាពិសេស​នៅតាម​ផ្សារ​ទំនើប ធនាគារ និង កន្លែង​ប្រកប​អាជីវកម្ម​ផ្សេងៗ ។​

​យោងតាម​សេចក្តីណែនាំ​របស់​ក្រសួងសុខាភិបាល​ចេញ​នៅ​ថ្ងៃទី​៤ វិច្ឆិកា ឆ្នាំ​២០២០ បាន​លើកឡើងថា​ដើម្បី​ទប់ស្កាត់​ការចម្លង​វីរុស​កូ​វីដ​-១៩ ឱ្យមាន​ប្រសិទ្ធភាព​ខ្ពស់​បង្ការ​ការរីក​រាល​ដាល​ច្រើន​ចូលទៅក្នុង​សហគមន៍​ក្រសួងសុខាភិបាល​សូម​ធ្វើការ​ណែនាំ​បន្ថែម​ជូន​ដល់​អាជីវករ​នៅ​ផ្សារ​ទំនើប​តាម​ធនាគារ និង​កន្លែង​ប្រកប​អាជីវកម្ម​ផ្សេងៗ​ទៀត​ត្រូវ​ពង្រឹង​និង​យកចិត្តទុកដាក់​បន្ថែម​ទៅលើ​ការការពារ បង្ការ​ការឆ្លង​ជាយថាហេតុ​នូវ​វីរុស​កូ​វីដ -១៩ នៅពេល​ជួប​ជាមួយ​អតិថិជន​ទូទៅ​នៅក្នុង​ទីតាំង​អាជីវកម្ម​របស់ខ្លួន ដូចខាងក្រោម​៖

​បុគ្គលិក​បម្រើ​ការងារ​ទាំងអស់គ្នា​ត្រូវ​ពាក់​ម៉ាស​និង​របាំងមុខ​ការពារ​ឱ្យបាន​ត្រឹមត្រូវ​និង​ជាប់​ជាប្រចាំ ។​អតិថិជន​ទាំងអស់​ត្រូវ​ពាក់​ម៉ាស​វេជ្ជសាស្ត្រ​ឬ​ម៉ា​ក្រណាត់​ឱ្យ បាន​ត្រឹមត្រូវ​និង​ជាប់​ជានិច្ច​ទាំងអស់គ្នា​។​

​ធនាគារ ផ្សារ​ទំនើប និង​ហាង​នីមួយៗ​ត្រូវ​៖ បំពាក់​ម៉ាស៊ីន​វាស់​កំដៅ​ស្វ័យប្រវត្តិ​ឬ​ទែ​ម៉ូ​ម៉ែត្រ​វាស់​កំដៅ​ដោយ​ដៃ​និង​អាល់កុល​ឬ​ជែ​ល​លាងដៃ​នៅ គ្រប់​ច្រកចូល និង​ដាក់​អាល់កុល ឬ​ជែ​ល​លាងដៃ​នៅក្នុង​ទីតាំង​ប្រតិបត្តិការ​របស់ខ្លួន​និង​តម្រូវឱ្យ​លាងដៃ​ជា​ញឹកញាប់ ជាពិសេស​បន្ទាប់ពី​បាន​ប៉ះពាល់​វត្ថុ​ផ្សេងៗ ក្រោយពេល​ចូល​ប​ន្ទ័​ប់​ទឹក និង​មុនពេល​បរិភោគ​អាហារ ។​ល​។ រៀបចំ​ទីតាំង​ឈរ ឬ​អង្គុយ​សម្រាប់​បុគ្គលិក​និង​អតិថិជន​របស់ខ្លួន​ដោយ​រក្សា​គម្លាត​សុវត្ថិភាព​យ៉ាងតិច ១.៥ ម៉ែត្រ ពី​បុគ្គល​ម្នាក់​ទៅ​បុគ្គល​ម្នាក់ ។ ដាក់​បង្ហាញ​នូវ​ស្លាក​សញ្ញា​ណែនាំ​ការពាក់​ម៉ាស់​និង​រក្សា​អនាម័យ​ដៃ​ស្អាត​និង​ការណែនាំ​អនាម័យ​ពេល​ក្អក​កណ្តាស នៅ​គ្រប់​ច្រកចូល និង​ទីតាំង​ដែល​អាច​មើលឃើញ​ទាំងអស់គ្នា​។ ធ្វើការ​តាមដាន​សីតុណ្ហភាព​រាងកាយ​បុគ្គលិក​របស់ខ្លួន​ជា​រៀងរាល់ថ្ងៃ យ៉ាងតិច ៣​ដង ក្នុង​១​ថ្ងៃ​។​

​ការធ្វើ​បដិសណ្ឋារកិច្ច​ត្រូវ​ធ្វើតាម​ទំនៀម​ទំលាប់​ប្រពៃណី​ខ្មែរ​ដោយ​លើកដៃ​សំពះ ចៀសវាង​ការ​ចាប់ដៃគ្នា​។ ម្ចាស់​អាជីវកម្ម អ្នកគ្រប់គ្រង និង​បុគ្គលិក​បម្រើការ​ងារ​ទាំង​អស់​ត្រូវ​រាយការណ៍​ឱ្យបាន​ឆាប់រហ័ស​ជូន​ដល់ អាជ្ញាធរ​ពាក់ព័ន្ធ ឬ​ក្រុម​ឆ្លើយតប​បន្ទាន់​តាម​ប្រព័ន្ធ​ទូរស័ព្ទ​ទាន់​ហេតុការណ៍ ១១៥ ដោយ​មិន​គិតថ្លៃ រាល់ពេល សង្កេតឃើញ​មាន​ករ​ណ៏​សង្ស័យ​ចូលក្នុង​និយមន័យ​នៃ​ជំងឺ​កូ​វីដ​-១៩ (​ដែលមាន​ជូន​ភ្ជាប់​មកជា​មួយ​)​។​

​ជាមួយគ្នា​នោះដែរ​ក្រសួងសុខាភិបាល​សូម​អរគុណ​ចំពោះ​បងប្អូន​អាជីវករ និង​អតិថិជន​ទាំងអស់​ដែល​បាន​យល់ដឹង និង​សហការ​ជាមួយ​អាជ្ញាធរ​ពាក់ព័ន្ធ​ក្នុងពេល​កន្លងមក ហើយនឹង​បន្ត​យកចិត្តទុកដាក់​ទៅលើ​វិធានការ​ណែនាំ​ខាងលើ ដើម្បី​ចូលរួម​ទប់ស្កាត់​ការឆ្លង​រាលដាល​វីរុស​កូ​វីដ​-១៩ ជាយថាហេតុ ។​

​គួរបញ្ជាក់​ជូន​ថា​អ្នកពាក់ព័ន្ធ​នឹង​ព្រឹ​តិ​ការណ៍​២៨​វិច្ឆិកា​ដែលមាន​ផ្ទុក​វីរុស​កូ​វីដ​-១៩ ត្រូវបាន​រកឃើញ​ចំនួន​៤​នាក់​ទៀតហើយ​នៅថ្ងៃនេះ ។ សរុប​ទាំង​០៤​ករណីនេះ​ទៀត​អ្នកពាក់ព័ន្ធ​នឹង​ព្រឹត្តិការណ៍​២៨​វិច្ឆិកា​មាន​ចំនួន​សរុប​២៣​នាក់ ។ នេះ​បើតាម​សេចក្ដីប្រកាស​ព័ត៌មាន​ពី​ក្រសួងសុខាភិបាល​នៅ​ព្រឹក​ថ្ងៃទី​០៤​ខែធ្នូ​នេះ​។​

​ក្នុងចំណោម​អ្នកមាន​ផ្ទុក​កូ​វីដ​-១៩​ដែល​ទើប​រកឃើញ​ថ្មី​ចំនួន​៤​នាក់​មាន​៣​នាក់​ជា​សាច់ញាតិ​នឹង​បុរស​អាយុ ២៣ ឆ្នាំ​ធ្វើការ​នៅ​ធនាគារ​ចិន​ដែល​បាន​រកឃើញ​មាន​វីរុស​កូ​វីដ​-១៩​នៅ​ថ្ងៃទី​០២​ខែធ្នូ ។ អ្នក​ទាំង​៣ នោះ​រួមមាន​៖​បុរស​ជនជាតិខ្មែរ​អា​យុ​៣៩​ឆ្នាំ​,​ស្ដ្រីជន​ជាតិខ្មែរ​អាយុ​៣២​ឆ្នាំ​,​និង​កុមារា​ជនជាតិខ្មែរ​អាយុ​៣​ឆ្នាំ​។​អ្នក​ទាំង បី​រស់នៅ​លឹម​ឈាង​ហាក់​សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ​។​

​ចំណែក​អ្នកមាន​ផ្ទុក​កូ​វីដ​-១៩ ថ្មី​ដែល​ទើប​រកឃើញ​មួយ​ករណី​ទៀត​កើត​លើ​បុរស​ជនជាតិខ្មែរ​អាយុ ២២ ឆ្នាំមាន​អាសយដ្ឋាន​នៅ​សង្កាត់​ចាក់អង្រែលើ​ខណ្ឌមានជ័យ​រាជធានី​ភ្នំពេញ ។ បុរស​រូបនេះ​ធ្វើការ​នៅ​ហាង Pedro ផ្លូវ​ព្រះសីហនុ​ជា​អ្នក​ប៉ះពាល់​ផ្ទាល់​ជាមួយ​អ្នកជំងឺ​អាយុ ២១ ឆ្នាំ​ដែល​បាន​ចូលទៅ​ហាង​នោះដែរ​។​

​បើតាម​ក្រសួងសុខាភិបាល​បច្ចុប្បន្ន​អ្នក​ទាំង​៤​នាក់​នេះ​ត្រូវបាន​ដាក់​ឲ្យ​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ​-​សូ​វៀត រាជធានី​ភ្នំពេញ​។​

​គួរកត់សម្គាល់​ដែរ​ថា​នៅក្នុង​ខែធ្នូ​នេះ​ក្រសួងសុខាភិបាល​បាន​បើក​ការធ្វើ​តេស្ត​ទ្រង់ទ្រាយ​ធំ​ដោយ​ក្នុងនោះ​មាន​វត្ថុ​សំណាក​នៅសល់​ពីថ្ងៃ​ទី ០១​ខែធ្នូ ចំនួន​៩៦​នាក់ បន្ថែម​លើ​សំណាក​ទទួលបាន​បន្ថែម​នៅ​ថ្ងៃ​ដដែល​ពី​ខេត្ត​និង​រាជធានី​ភ្នំពេញ​សរុប​មាន​ចំនួន​ជាង​១​ពាន់​នាក់​ទទួលបាន​លទ្ធផល​វិជ្ជមាន​ចំនួន​០៤​ករណី​គឺ​ករណី ខាងដើម​។ ចំណែក​សំណាក​ដែល​នៅ​សេសសល់​ក្រសួង​នឹង​បន្ត​ធ្វើតេស្ត​បន្ថែមទៀត​។​

​ដោយឡែក​បើ​គិត​សរុប​ចាប់តាំងពី​ថ្ងៃទី​២៩ វិច្ឆិកា​រហូតដល់​ថ្ងៃទី ០៣​ខែធ្នូ ក្រសួង​សុខ​ភិ​បាល​បានធ្វើ​តេស្ត​អ្នក​ប៉ះពាល់​សរុប​ទាំងអស់​បាន​ចំនួន​ជិត​៩​ពាន់​៨​រយ​នាក់​ដែល​ក្នុងនោះ​រកឃើញ​មាន​ករណី​វិជ្ជមាន​កូ​វីដ​-១៩​សរុប​ចំនួន​២៣​ករណី​។​

​ចំពោះ​ចំនួន​សរុប​នៃ​ករណី​កូ​វីដ​-១៩​វិញ រហូតមកទល់​ពេលនេះ​កម្ពុជា​រកឃើញ​មាន​ចំនួន​៣៣៥​ករណី​ក្នុងនោះ​៣០៤​ករណី​បានជា​សះស្បើយ​ចំណែករ​ណី​ដែល​កំពុង​សម្រាក​ព្យាបាល​មាន​ចំនួន​៣១​ករណី​៕​

ទីតាំងផ្សាយពាណិជ្ជកម្ម

- Advertisment -

Most Popular