Home ព័ត៌មានជាតិ សេដ្ឋកិច្ច លទ្ធភាព​ទឹក​ផ...

លទ្ធភាព​ទឹក​ផ្គត់ផ្គង់​ស្រូវប្រាំង​ឆ្នាំ​២០២០-២០២១​បាន​ជាង​៥០​ម៉ឺន​ហិកតា​

​ដោយៈ​ប​.​ខុន​/​ភ្នំពេញៈលោក​ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក និង​ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៤​ខែធ្នូ​ឆ្នាំ​២០២០​នេះ​ថា ទឹក​នៅសល់​តាម​ប្រព័ន្ធធារាសាស្ត្រ​សំខាន់ៗ បន្ទាប់ពី​ដំណាំ​ស្រូវវស្សា​លែង​ត្រូវការ មាន​សក្តានុពល​អាច​ផ្គត់ផ្គង់​ដល់​ការងារ​បង្កបង្កើនផល​ស្រូវប្រាំង​ឆ្នាំ​២០២០-២០២១ លើ​ផ្ទៃដី​ប្រមាណ​ជាង​៥០​ម៉ឺន​ហិកតា នៅ​ទូទាំងប្រទេស​។

​អ្នកនាំពាក្យ​ក្រសួង​ជំនាញ​ខាងលើ​និយាយ​ឱ្យដឹងថា​នៅ​ចុងរដូវ​វស្សា នេះ​មាន​ភ្លៀង​ធ្លាក់​គ្រប់គ្រាន់ ធ្វើឱ្យ​ទឹក​ដែល​រក្សាទុក​នៅក្នុង​ប្រព័ន្ធធារាសាស្ត្រ​នានា​មាន នៅសល់​ច្រើន​សម្រាប់​ការប្រើប្រាស់​ប្រចាំថ្ងៃ និង​ការដាំដុះ​ស្រូវប្រាំង​នៅពេល​ខាងមុខ​។ ទោះជា​យ៉ាងណា ការធ្វើ​ស្រូវប្រាំង​ត្រូវបាន​អនុ​ញ្ញា​ត្តិ​ឱ្យ​ធ្វើទៅ តាម​បរិ​មាណទឹក​ដែលមាន​នៅសល់​ក្នុង​តំបន់​នីមួយៗ​។​

​លោក​ចាន់ យុ​ត្ថា និយាយ​ឱ្យដឹងថា​ដំណាំ​ស្រូវវស្សា​ឆ្នាំ​២០២០​ជួប​បញ្ហា​ខ្វះ​ទឹកបាន​កើតមាន​នៅ​ដើមរដូវ និង​កណ្តាល​រដូវ តែ​នៅ​ចុងរដូវ​ខេត្ត​ខ្លះ​លើស​ទឹក ធ្វើ ឱ្យ​សល់​ទឹក​សម្រាប់ធ្វើ​ស្រូវប្រាំង​បន្ត​ដោយ​មិនចាំបាច់​អន្តរាគមន៍ ។ តែ​នៅពេល នេះ​ការងារ​អន្តរាគមន៍​បូមទឹក បានចាប់ផ្តើម​បញ្ជូន​ទឹក​ចេញពី​ប្រព័ន្ធ​ដាក់​ចូលទៅ តំបន់​ដែល​មិនទាន់មាន​ប្រឡាយ​គ្រប់គ្រាន់​ដើម្បី​ផ្គត់ផ្គង់​ការដាំដុះ​ស្រូវប្រាំង​។​

​ការងារ​បង្កប​ង្កើ​ផល​ស្រូវប្រាំង​សម្រាប់​ឆ្នាំ​២០២០-២០២១ ដែល​បាន​ដាក់ចេញ​ដោយ​រដ្ឋបាល​រាជ​-​ធានី ខេត្ត ចំនួន​២១​មាន​ចំនួន ៤៤២.៤៩៥​ហិកតា​គិត​មក ដល់​ត្រឹម​ដំណាច់ខែ​វិច្ឆិកា អនុវត្តបាន​២១០.១៦០​ហិកតា​ស្មើ​ប្រមាណ​ជា​៤៧,៤៩ ភាគរយ​នៃ​ផែនការ​ហើយ​។​

​តា​កែវជា​ខេត្ត​មាន​ផ្ទៃដី​ផលិត​ស្រូវប្រាំង​ច្រើនជាងគេ​រហូតដល់​ចំនួន​៨​ម៉ឺន​ហិកតា បន្ទាប់​គឺ​ខេត្តព្រៃវែង ចំនួន​៧៥.០០០​ហិកតា ខេត្តកណ្តាល​មាន​ចំនួន ៥៥.៤០០​ហិកតា និង​ខេត្តកំពង់ចាម​ចំនួន​៤២.០០០​ហិកតា ក្រៅពីនេះ​មាន​ចំនួន​ក្រោម​បី​ម៉ឺន​ហិកតា​៕​

 

ទីតាំងផ្សាយពាណិជ្ជកម្ម

- Advertisment -



Most Popular