Home ព័ត៌មានជាតិ សង្គម ​យក​សំណាក​ចំន...

​យក​សំណាក​ចំនួន ៣៦ នាក់ ដែល​ប៉ះពាល់​ផ្ទាល់ និង​ប្រយោល នៅ​ទីតាំង​ផេ​ត្រូ សប ទៅពិនិត្យ​

​ដោយៈ ស​រិ​ទ្ធ / ភ្នំពេញៈ កម្លាំងចម្រុះ​របស់​ខណ្ឌ​បឹង​កេងកង បាន​សហការ​ជាមួយ កម្លាំង​ក្រសួងសុខាភិបាល និង​កម្លាំង​អគ្គស្នងការដ្ឋាន នគរបាលជាតិ នៅ​ព្រឹក​ថ្ងៃទី​៤ ខែធ្នូ ឆ្នាំ​២០២០ បាន​ចុះ​ពិនិត្យ​ស្រាវជ្រាវ រក​អ្នក​ប៉ះពាល់​ផ្ទាល់ និង​ប្រយោល នៅ​ទីតាំង​លក់​សម្ភារ​ប្រើប្រាស់ ឈ្មោះ ផេ​ត្រូ សប (Pedro) ស្ថិតនៅ​ផ្លូវ​ព្រះសីហនុ កែង​ផ្លូវ​លេខ​៥៧ ភូមិ​៤ សង្កាត់​បឹង​កេងកង​ទី​១ ខណ្ឌ​បឹង​កេងកង ។​

​ជា​លទ្ធផល នៅក្នុង​សកម្មភាព ចុះ​ពិនិត្យ​ស្រាវជ្រាវ រក​អ្នក​ប៉ះពាល់​ផ្ទាល់ និង​ប្រយោល នៅ​ទីតាំង​នេះ គឺ​ធ្វើតេស្ត​យក​សំណាក បាន​ចំនួន ៣៦ នាក់ ស្រី​១៤​នាក់ ហើយ​អ្នក​ធ្វើតេស្ត​ទាំងអស់ ត្រូវបាន​ក្រសួងសុខាភិបាល ធ្វើ​ច​ត្តា​ឡី​ស័ក​។ ចំពោះ​ទីតាំង ខាងលើ ត្រូវបាន​ផ្អាក ជា​បណ្ដោះអាសន្ន និង​រង់ចាំ​ការអនុញ្ញាត ពី​ក្រសួងសុខាភិបាល ទើប​អាច​បើក​ដំណើរការ​វិញ​បាន​។​

​សូមបញ្ជាក់ថា នៅ​ព្រឹក​ថ្ងៃទី​៤ ខែធ្នូ ឆ្នាំ​២០២០ នេះ ក្រសួងសុខាភិបាល បាន​រកឃើញ​មនុស្ស ចំនួន ៤ នាក់​បន្ថែមទៀត ដែល​ពាក់ព័ន្ធ​ក្នុង​ព្រឹត្តិការណ៍ “​សហគមន៍ ២៨ វិច្ឆិកា​” គឺ​ទី​១, បុរស​ជនជាតិខ្មែរ អាយុ ៣៩​ឆ្នាំ មាន​អាសយដ្ឋាន​ស្នាក់នៅ បូរី​លឹម​ឈាង​ហាក់ សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ ជា​បុគ្គលិក នៅ​ហាង​លក់​កុំព្យូទ័រ ឈ្មោះ ឌី​ម​កុំព្យូទ័រ ផ្លូវ​ព្រះសីហនុ រាជធានី​ភ្នំពេញ ដែល​ត្រូវជា​បងថ្លៃ​ជីដូនមួយ របស់​បុរស​អាយុ ២៣ ឆ្នាំ ដែល​បាន​រកឃើញ មាន​វីរុស​កូ​វីដ​-១៩ កាលពី​ថ្ងៃទី​២ ខែធ្នូ ឆ្នាំ​២០២០​។ ទី​២. ស្ត្រីជន​ជាតិខ្មែរ អាយុ ៣២ ឆ្នាំ ជា​ភរិយា​បុរស អាយុ ៣៩ ឆ្នាំ ខាងលើ មាន​អាសយដ្ឋាន​ស្នាក់នៅ បូរី​លឹម​ឈាង​ហាក់ សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ ដែល​ត្រូវជា​បងប្អូន​ជីដូនមួយ បុរស​អាយុ ២៣ ឆ្នាំ ដែល​បាន​រកឃើញ​វីរុស​កូ​វីដ​-១៥ កាលពី​ថ្ងៃទី​២ ខែធ្នូ ឆ្នាំ​២០២០​។ ទី​៣. កុមារា ជនជាតិខ្មែរ អាយុ ៣ ឆ្នាំ ជា​កូនប្រុស របស់​បុរស អាយុ ៣៩​ឆ្នាំ និង​ស្ត្រី​អាយុ ៣២​ឆ្នាំ ខាងលើ មាន​អាសយដ្ឋាន ស្នាក់នៅ បូរី​លឹម ឈាង​ហាក់ សង្កាត់​វាល​ស្បូវ ខណ្ឌ​ច្បារអំពៅ រាជធានី​ភ្នំពេញ ត្រូវជា​ក្មួយប្រុស បុរស​អាយុ ២៣ ឆ្នាំ ដែល​បាន​រកឃើញ វីរុស​កូ​វីដ​-១៥ កាលពី​ថ្ងៃទី​០២ ខែធ្នូ ឆ្នាំ​២០២០​។ ទី​៤. បុរស​ជនជាតិខ្មែរ អាយុ​២២​ឆ្នាំ មាន​អាសយដ្ឋាន នៅ​សង្កាត់​ចាក់អង្រែលើ ខណ្ឌមានជ័យ រាជធានី​ភ្នំពេញ ជា​បុគ្គលិក​ហាង Pedro នៅ​ផ្លូវ​ព្រះសីហនុ ជា​អ្នក​ប៉ះពាល់​ជាមួយ​អ្នកជំងឺ​ជា​ស្ត្រី​អាយុ​២១​ឆ្នាំ ដែល​បាន​ចូលទៅ​ហាង​នោះដែរ​។ បច្ចុប្បន្ន អ្នកជំងឺ ដាក់​ឲ្យ​សម្រាក​ព្យាបាល នៅ​មន្ទីរពេទ្យ​មិត្តភាព ខ្មែរ​-​សូ​វៀត​៕/V

ទីតាំងផ្សាយពាណិជ្ជកម្ម

- Advertisment -

Most Popular