Home ព័ត៌មានជាតិ សេដ្ឋកិច្ច អាជ្ញាធរ​ស្រុ...

អាជ្ញាធរ​ស្រុក​មេមត់ រកឃើញ​រណ្តៅ ជីក​រក​រ៉ែ ចំនួន ១០ ម្ចាស់ និង​រឹបអូស​វត្ថុតាង ជាច្រើន​គ្រឿង​

ដោយៈ គង់​ហេង/ត្បូងឃ្មុំៈ អាជ្ញាធរ​ស្រុក​មេមត់ បាន​ដឹកនាំ​មន្ត្រី​ជំនាញ និង​សមត្ថកិច្ច ពាក់ព័ន្ធ ចុះ​ទប់ស្កាត់ និង​ហាមឃាត់​សកម្មភាព ធ្វើ​អាជីវកម្ម​រុករក​រ៉ែ​លោហៈ ខុសច្បាប់ នៅ​តំបន់​សំពៅ​លូ ឃុំ​ជាំ​តា​ម៉ៅ គឺ​បាន​រកឃើញ​រណ្តៅ​ដី ចំនួន ១០ ម្ចាស់ និង​បាន​រឹបអូស វត្ថុតាង ចំនួន ប្រាំបួន​មុខ រយ​:​ពេល​ពីរ​ថ្ងៃ​។ ប៉ុន្តែ​ចាប់​មិនបាន អ្នក​ជីក​រក​រ៉ែ ទាំង​នោះទេ ដោយ​ពួកគេ បាន​រត់គេចខ្លួន​។​

​លោក ស្រេង លី អភិបាលស្រុក​មេមត់ បាន​ប្រាប់​សារព័ត៌មាន​រស្មី​កម្ពុជា នៅ​ថ្ងៃទី​៥ ខែធ្នូ​ថាៈ ក្រោយពី​បានទទួល​បញ្ជា​ពី​លោក ជាម ចាន់​សោ​ភណ្ឌ ជា​អភិបាលខេត្ត​ត្បូងឃ្មុំ លោក​បាន ដឹកនាំ​កម្លាំង ចុះទៅ​ទប់ស្កាត់ ហាមឃាត់​សកម្មភាព ជីក​រក​រ៉ែ​លោហៈ គ្មាន​ការអនុញ្ញាត ដែលមាន​ទីតាំង​ខាងលើ នា​ថ្ងៃទី ៣ ដល់​ថ្ងៃទី ៤ ខែធ្នូ ។​

​លោក​អភិបាលស្រុក​មេមត់ បានឱ្យដឹង​ទៀតថាៈ ជា​លទ្ធផល យើង​បាន​រកឃើញ អត្តសញ្ញាណ ម្ចាស់​រណ្តៅ​ដី ជីក​រក​រ៉ែ​ខ្នាត​ធំ ចំនួន ១០ កន្លែង ស្ថិតក្នុង​ភូមិ​សំពៅ​លូ ឃុំ​ជាំ​តា​ម៉ៅ ស្រុក​មេមត់ ដោយ​ម្ចាស់​អាជីវកម្ម​ខុសច្បាប់​ទាំងនោះ បានគេច​ខ្លួន​មុនពេល យើង​ទៅដល់ ហើយ​យើង​បាន​រឹបអូស វត្ថុតាង​រួមមាន ធុង​ខ្យល់ បួន​គូ , ម៉ាស៊ីន​កិន​ថ្ម​បំបែក ពីរ​គ្រឿង​, ឧបករណ៍​បំបែក​ថ្ម មួយគ្រឿង ម៉ាស៊ីនបូមទឹក បី​គ្រឿង , ម៉ាស៊ីន ប្រាំពីរ គ្រឿង , ម៉ាស៊ីន និង​ឌី​ណា​ម៉ូ ពីរ គ្រឿង​, ឌី​ណា​ម៉ូ មួយ គ្រឿង​, ក្បាល​ទាញ​ខ្សែកាប មួយ គ្រឿង និង​កម្ទេច​រ៉ែ មួយ​ធុង​។​

​លោក ស្រេង លី បាន​បន្តថាៈ វត្ថុតាង​ទាំងអស់ យើង​បាន​ដឹកជញ្ជូន​នាំយកទៅ​រក្សាទុក នៅ​អធិការដ្ឋាន​នគរបាល ស្រុក​មេមត់ ដើម្បី​រង់ចាំ​ការសម្រេច​ពី លោក​អភិបាលខេត្ត ត្បូងឃ្មុំ​។​

​លោក ប៉ុន ប៊ុនធឿន ប្រធាន​មន្ទីរ​រ៉ែ និង​ថាមពល ខេត្ត​ត្បូងឃ្មុំ បានឱ្យដឹង​នៅ​ថ្ងៃទី​៤ ខែធ្នូ​ថាៈ ទីតាំង​រុករក​រ៉ែ​ខុសច្បាប់​នេះ ដើមឡើយ វា​ស្ថិតក្រោម​ការគ្រប់គ្រង របស់​ក្រុមហ៊ុន​រុករក រ៉ែ​មួយ មានការ​អនុញ្ញាត ពី​រាជរដ្ឋាភិបាល​។ មកដល់​ចុងឆ្នាំ​២០១៤ មិនដឹងថា ក្រុមហ៊ុន​នោះ ផុត​សុពលភាព​អាជ្ញាប័ណ្ណ ឬ​ក្ស័យធន យ៉ាងណា​នោះទេ ក៏បាន​បោះបង់​ទីនោះ​ចោល និង​ក៏បាន​ចាប់ផ្តើម មាន​សកម្មភាព​អាជីវកម្ម ខុសច្បាប់ ដូចដែល​បាន​បង្ក្រាប ខាងលើ​។​

​លោក​ប្រធាន​មន្ទីរ បាន​បន្តថាៈ ពិសេស​កន្លងមក តំបន់​នោះ គឺ​ពុំមាន​អ្នកគ្រប់គ្រង ច្បាស់លាស់​ផង​។ ប៉ុន្តែ​ខាង​លោក បាន​ចុះទៅ​បង្ក្រាប​ជា​ហូរហែ និង​ណែនាំ ដល់​ក្រុម អ្នក​ជីក​រ៉ែ ចន្លោះ​ពី ៣០ ទៅជិត ១០០ ម៉ាស៊ីន ក៏មានដែរ​។ ប៉ុន្តែ​មួយរយ​:​ចុងក្រោយ សកម្មភាព​អនាធិបតេយ្យ​នេះ ហាក់​រីក​កើនឡើង ជា​ទ្រង់ទ្រាយ​ធំ គឺ​ជីក​ជា​រណ្តៅ ប្រើ​រំសេវ​បំផ្ទុះ តែ​យើង​ចុះបង្ក្រាប មិនទាន់​ឃើញ តែ​ស្នាម​រណ្តៅ​បំផ្ទុះ​នោះ គឺ​គេ​ប្រើ​រំសេវ មែន​៕​PC

ទីតាំងផ្សាយពាណិជ្ជកម្ម

- Advertisment -

Most Popular