Home ព័ត៌មានជាតិ សន្តិសុខ ក្មេងប្រុស​ម្...

ក្មេងប្រុស​ម្នាក់ ធ្លាក់ចូល​ឆ្នាំង​បបរ អាច​នឹង​ពិការ​អស់​មួយជីវិត​

ដោយៈ សុខុម​/​ស្ទឹងត្រែងៈ គួរអោយ​អាសូរ​ណាស់ ក្មេងប្រុស​ម្នាក់ បាន​វារ​ធ្លាក់ចូល​ឆ្នាំង​បបរ តាំងពី​នៅ​អាយុ ៥ ទៅ ៦ ខែ​មកម្ល៉េះ​។ ឥឡូវនេះ ក្មេងប្រុស​នោះ មាន​អាយុ​ជាង ២ ខួប​ហើយ ក៏ប៉ុន្តែ​បាន​ពិការ​មួយ​កំណាត់​ក្រោម ពិបាក​ក្នុង​ការរស់នៅ​។​

​គ្រួសារ​ខ្វះខាត​នោះ រស់​នៅលើ​តំបន់​ដី​កោះ ដាច់ស្រយាល ស្ថិតក្នុង​ភូមិ​កោះ​ហិប ឃុំ​អូរ​ស្វាយ ស្រុក​បុរី​អូរ​ស្វាយ​សែន​ជ័យ ខេត្តស្ទឹងត្រែង​។ ឪពុក​ក្មេង​នោះ ឈ្មោះ លិ​ប វាសនា ម្ដាយ​ឈ្មោះ សារឿន​តូច មានកូន​ចំនួន ២ នាក់ គឺ​ស្រី​ម្នាក់ ប្រុស​ម្នាក់​។ កូនស្រី គឺជា​កូនច្បង រីឯ​ក្មេង​ដែល​រលាក​ទឹក​បបរ ពិការ​គឺជា​កូនប្រុស​ពៅ​។​

​លោក សៃ វាសនា គឺជា​គ្រូពេទ្យ កំពុង​បម្រើ​ការងារ នៅ​មណ្ឌល​សុខភាព ព្រះ​រំកិល ឃុំ​ព្រះ​រំកិល ស្រុក​បុរី​អូរ​ស្វាយ សព្វថ្ងៃ បាន​ប្រាប់​ឲ្យ​ដឹង នៅ​ថ្ងៃទី​៥ ខែធ្នូ ឆ្នាំ ២០២០​នេះ​ថាៈ ពីដំបូង​ឡើយ ក្រុមគ្រូពេទ្យ បាន​ចុះ​តាម​មូលដ្ឋាន ដើម្បី​ផ្ដល់​សេវា​ថ្នាំ​បង្កា តាម​ភូមិ​ឆ្ងាយ​ដាច់ស្រយាល ហើយ​បានធ្វើ​ដំណើរ ដែលមាន​ចម្ងាយ​ប្រមាណ​ជា ៣០ គីឡូម៉ែត្រ តាមផ្លូវ​ទឹក ទៅដល់​ភូមិ​កោះ​ហិប ក៏បាន​ជួប​គ្រួសារ​ក្រីក្រ​មួយ ដែលមាន​កូនតូច ពិការភាព ដោយសារ​ធ្លាក់ចូល​ឆ្នាំង​បបរ​។​

​ពេលនោះ គ្រូពេទ្យ វាសនា ពិតជា​អាណិត ក្មេងប្រុស​នោះ​ខ្លាំងណាស់ ដោយសារតែ ការរស់នៅ របស់​ក្មេង ពិបាក​ខុស​ជាង​ក្មេង​ដទៃទៀត នៅក្នុង​ភូមិ​។ ក្មេង​នោះ កើត​នៅ ថ្ងៃទី​១០ ខែសីហា ឆ្នាំ​២០១៨ ហើយ​បាន​ធ្លាក់ចូល​ឆ្នាំង​បបរ ខណៈពេល​ម្ដាយ កំពុងតែ សំរាន្ត​នៅលើផ្ទះ​តូច​មួយ​។ កាលនោះ ក្មេងប្រុស​នេះ ទើបតែ​មាន​អាយុ ៥ ទៅ ៦ ខែ​ប៉ុណ្ណោះ ដែល​ចេះ​វារ​តិចតួច ហើយ​បាន​ធ្លាក់ចូល​ឆ្នាំង​បបរ រហូត​ពិការ​។ ឥឡូវនេះ ក្មេងប្រុស​នោះ មាន​អាយុ​ជាង ២ ខួប​ទៅហើយ ប៉ុន្តែ​ពិតជា​ពិបាក គួរឱ្យ​អាណិត​ណាស់​។​

​លោកគ្រូ​ពេទ្យ បានបញ្ជាក់​ទៀតថាៈ បើសិនជា​ចង់​ជួប​ក្មេង​នោះ ទាល់តែ​ធ្វើដំណើរ ដោយផ្ទាល់​ទើបបាន​។ ពីព្រោះថា ពី​ទីប្រជុំជន ទៅ​កោះ​ហិប មិនមាន​សេវា​ទូរស័ព្ទ ទំនាក់ទំនង​គ្រប់គ្រាន់​ឡើយ​។​

​អ្នករស់នៅ​ក្នុងភូមិ សុំ​អង្វរ​ដល់​សប្បុរសជន ជួយ​ដល់​ក្មេងប្រុស​នោះ​ផង ក្រែង​មានសង្ឃឹម ព្យាបាល​ដល់​ក្មេង​នោះ អាចមាន​លក្ខណៈ​ប្រសើរ បាន​ដូច​ក្មេង​ដទៃទៀត​៕PC

ទីតាំងផ្សាយពាណិជ្ជកម្ម

- Advertisment -

Most Popular