Home ព័ត៌មានជាតិ សន្តិសុខ ស្ត្រី​មួយរូប...

ស្ត្រី​មួយរូប​មានមុខ​នាទី ជា​មេធាវី​ផង និង ជា​សមាជិក​ក្រុមប្រឹក្សា​ខេត្តកំពង់ធំ ផង កើតជា​រឿង​សង្ស័យ បញ្ហា​វិសមិតភាព​

​ដោយ​:​ស​រិ​ទ្ធ​/​កំពង់ធំ​: លោកស្រី ស៊ឹម សុវណ្ណារិទ្ធ ជា​មេធាវី​មាន​អត្តលេខ​៤៣៦ និង មាន​តួនាទី ជា​សមាជិក​ក្រុមប្រឹក្សា​ខេត្តកំពង់ធំ លេខ​រៀង​ទី​១០ កំពុងមាន​បញ្ហា​សង្ស័យ វិសមិតភាព ដែល​ប្រធាន​សាលាដំបូង​ខេត្តកំពង់ធំ បានស្នើ​ទៅ​ប្រធាន​គណៈមេធាវី ដើម្បី​បញ្ជាក់​បញ្ហា​នេះ ។​

​យោងតាម​លិខិត​មួយច្បាប់ កាលពី​ថ្ងៃទី​២៨ ខែតុលា ឆ្នាំ​២០២០ កន្លងទៅ ដែល​ទើប​ទទួលបាន នៅ​ថ្ងៃទី​៦ ខែធ្នូ ឆ្នាំ​២០២០ នេះ លោក លាង សួគ៌ ប្រធាន​សាលាដំបូង​ខេត្តកំពង់ធំ បាន​ជម្រាបជូន​ប្រធាន​គណៈមេធាវី​នៃ​ព្រះរាជាណាចក្រ​កម្ពុជា ថា សាលាដំបូង​ខេត្តកំពង់ធំ បានទទួល​ជំនុំជម្រះ​លើ​សំណុំរឿង​ព្រហ្មទណ្ឌ​លេខ ២០៣ ចុះ​ថ្ងៃទី​១២ ខែមីនា ឆ្នាំ​២០១៣ ដែលមាន​ជនជាប់ចោទ​២​នាក់ ម្នាក់​នៅក្នុង​ឃុំ ហើយ​ដែល​ជនជាប់ចោទ​ទាំង​២​នាក់ នេះ ត្រូវបាន​ចោទប្រកាន់ ថា បាន​ប្រព្រឹត្ត​បទឧក្រិដ្ឋ (​បទ​ឃាតកម្ម​) ។​

 

​នៅពេល​ចាប់ផ្តើម​ពិភាក្សា​ដេញដោល តំណាង​អយ្យការ​បានស្នើ​សុំអោយ​ក្រុមប្រឹក្សា​ជំនុំជម្រះ ធ្វើការ​ពិចារណា​អំពី​វិសមិតភាព​ក្នុងការ​បំពេញ​វិជ្ជាជីវៈ​ជា​មេធាវី ការពារ​សិទ្ធិ​អោយ​ជនជាប់ចោទ ដោយ​ជនជាប់ចោទ​ខាងលើ មាន​មេធាវី​ការពារ​សិទ្ធិ ឈ្មោះ ស៊ឹម សុ​វណ្ណា​រិ​ទ្ធិ អត្តលេខ​៤៣៦ ដែលជា​មេធាវី​កំពុង​ប្រកប​វិជ្ជាជីវៈ ហើយ​ទន្ទឹមគ្នានេះ មេធាវី​រូបនេះ ក៏​កំពុង​កាន់តំណែង​ជា​សមាជិក​ក្រុមប្រឹក្សា​ខេត្តកំពង់ធំ លេខ​រៀង​ទី​១០ ។​

​លោក លាង សួគ៌ ប្រធាន​សាលាដំបូង​ខេត្តកំពង់ធំ បន្តថា ក្រុមប្រឹក្សា​ជំនុំជម្រះ​បាន​ជួប​បញ្ហា​ដូចខាងលើ ពាក់ព័ន្ធ​នឹង​សេចក្តីណែនាំ​លេខ ០២៧ ស​ណន ចុះ​ថ្ងៃទី​៥ ខែសីហា ឆ្នាំ​២០២០ របស់​ក្រសួងមហាផ្ទៃ ដែល​ណែនាំ​អំពី​វិសមិតភាព ក្នុងការ​បំពេញ​តួនាទី​ជា​មេធាវី​ការពារ​សិទ្ធិ​អោយ​ជនជាប់ចោទ ឬ មេធាវី​តំណាង​ដោយ​អាណត្តិ នៅក្នុង​សំណុំរឿង​ព្រហ្មទណ្ឌ និង សំណុំរឿង​រដ្ឋប្បវេណី ។

​ប្រធាន​សាលាដំបូង​ខេត្តកំពង់ធំ សូមអោយ​លោក​ប្រធាន​គណៈមេធាវី មេត្តា​ពិនិត្យ​និង​ផ្តល់​ការបញ្ជាក់​អំពី​វិសមិតភាព​ក្នុងការ​បំពេញ​តួនាទី​ជា​សមាជិក​ក្រុមប្រឹក្សា​ខេត្តកំពង់ធំ និង ការបំពេញ​តួនាទី​ជា​មេធាវី​ការពារ​សិទ្ធិ ឬ មេធាវី​តំណាង​ដោយ​អាណត្តិ នៅក្នុង​សំណុំរឿង​ព្រហ្មទណ្ឌ និង សំណុំរឿង​រដ្ឋប្បវេណី ។

​ជុំវិញ​បញ្ហា​នេះ នៅ​ថ្ងៃទី​៦ ខែធ្នូ ឆ្នាំ​២០២០ នេះ​អ្នកសារព័ត៌មាន​យើង បាន​សួរ​សំណួរ​តាម Telegram ទៅ​លោក​មេធាវី លី ច័ន្ទ​តុលា ប្រធាន​គណៈមេធាវី ដោយ​លោក​បានទទួល​ហើយ តែ​មិនទាន់មាន​ការឆ្លើយតប​នៅឡើយ​ទេ ។

​តាម​ប្រភពព័ត៌មាន បានអោយដឹងថា លោកស្រី ស៊ឹម សុ​វណ្ណា​រិ​ទ្ធិ ត្រូវជា​ភរិយា​របស់លោក ម៉ៅ ប៊ុន​ធូ នាយក​ទីចាត់ការ​អន្តរ​វិស័យ​នៃ​សាលាខេត្ត​កំពង់ធំ ផងដែរ ដែល​កំពុង​ជាប់ពន្ធនាគារ​នៅ​ខេត្តសៀមរាប ពាក់ព័ន្ធ​ករណី​យក​កាំបិត​ចាក់​បំពង់​.​ក ប៉ុនប៉ង​ឃាតកម្ម លើ​លោក សាយ វាសនា ព្រះរាជអាជ្ញារង​អម​សាលាដំបូង​ខេត្តកំពង់ធំ ៕​

ទីតាំងផ្សាយពាណិជ្ជកម្ម

- Advertisment -

Most Popular