Home ព័ត៌មានអន្តរជាតិ អាម៉េរិក​ដាក់...

អាម៉េរិក​ដាក់​ទណ្ឌកម្ម​លើ​មន្ត្រី​ចិន​១៤​នាក់​និង​យល់ព្រម​លក់​ឧបករណ៍​យោធា​ឱ្យទៅ​កោះ​តៃវ៉ាន់​

​ប្រែ​សម្រួល : កញ្ញា​ដា​លី​ស​/​វ៉ាស៊ីនតោន ៖​រដ្ឋបាល​ត្រាំ​កាលពី​ថ្ងៃ​ចន្ទ​ទី​៧​ធ្នូ​បាន​អនុម័ត​ការលក់​អាវុធ​ទ្រង់ទ្រាយ​ធំ​ថ្មី​ទៅអោយ​កោះ​តៃវ៉ាន់​និង​ដាក់​ទណ្ឌកម្ម​ថ្មី​ទៅ​លើ​ក្រុមមន្ត្រី​ចិន​ជុំវិញ​អ្វីដែល​ខ្លួន​អះអាងថា​​ជា​ការបង្ក្រាប​អ្នកតស៊ូ​មតិ​គាំទ្រ​លទ្ធិប្រជាធិបតេយ្យ​នៅ​ហុងកុង​។​

​វិធានការ​នេះ​ប្រាកដ​ណាស់​នឹង​នាំឱ្យ​មាន​ការ​ថ្កោលទោស​យ៉ាង​ខ្លាំងក្លា​ពី​ចិន ដែល​ចាត់ទុក​កោះ​តៃវ៉ាន់​ជា​ខេត្ត​ផ្តាច់ខ្លួន និង​ច្រានចោល​វិធានការ​នានា​ដែល​ទាក់ទង​នឹង​ហុងកុង​ថា​ជាការ​ជ្រៀត​​ជ្រែកចូល​កិច្ចការ​ផ្ទៃក្នុង​របស់​ខ្លួន​។​

​ក្រសួងការបរទេស​អាម៉េរិក​និយាយថា ខ្លួន​បាន​យល់ព្រម​លើ​ការលក់​ឧបករណ៍​ទំនាក់ទំនង​យោធា​ទំនើបៗ​តម្លៃ ២៨០ លាន​ដុល្លារ​ឱ្យ​ទៅ​កោះ​តៃវ៉ាន់ ។ មុននេះ ក្រសួង​និយាយថា​ខ្លួន​បាន​ដាក់​ទណ្ឌកម្ម​​លើ​សមាជិក​១៤ នាក់​នៃ​គណៈកម្មាធិការ​អចិន្ត្រៃយ៍​សភា​ចិន​ខណៈ​ដែល​រដ្ឋបាល​ត្រាំ​បង្កើន​វិធានការ​ដាក់​ទណ្ឌកម្ម​ប្រឆាំង​នឹង​ប្រទេស​ចិន នៅពេល​ដែល​អាណត្តិ​ខ្លួន​កាន់តែ​ហោចទៅៗ​។​

​នៅក្នុង​សេចក្តីថ្លែងការណ៍​មួយ ក្រសួង​និយាយថា ខ្លួន​បាន​យល់ព្រម​លើ​ការលក់​ឧបករណ៍​ទំនាក់ទំនង​ដើម្បី “​ជួយ​ធ្វើឱ្យ​ប្រសើរឡើង​នូវ​សន្តិសុខ​របស់​អ្នក​ទទួល​និង​ជួយ​ក្នុង​ការរក្សា​ស្ថិរភាព​នយោបាយ តុល្យភាព​យោធា តុល្យភាព​សេដ្ឋកិច្ច​និង​វឌ្ឍនភាព​នៅក្នុង​តំបន់​” និង​”​រួមចំណែក​ដល់​គោលដៅ​របស់​អ្នកទទួល​ដើម្បី​ធ្វើ​ទំនើបកម្ម​សមត្ថភាព​ទំនាក់ទំនង​យោធា​របស់​ខ្លួន​ក្នុង​ការគាំទ្រ​បេសកកម្ម​​និង​តម្រូវការ​ប្រតិបត្តិការ​របស់​ពួកគេ​”​។​

​ការអនុម័ត​នេះ​គ្រាន់តែ​ជា​ជំហាន​ចុងក្រោយបង្អស់​មួយចំនួន​ប៉ុណ្ណោះ ដែល​រដ្ឋបាល​ត្រាំ​ធ្វើឡើង​ដើម្បី​ជំរុញ​ការការពារ​របស់​តៃវ៉ាន់​ក្នុង​រយៈពេល​ជា​ច្រើន​ខែ​ចុងក្រោយ​នេះ​។​

​ទន្ទឹមនេះដែរ កាលពី​ថ្ងៃ​ចន្ទ​ក្រសួងការបរទេស​និង​ក្រសួង​រតនាគារ​អាម៉េរិក​បាន​និយាយថា ពួកគេ​កំពុង​ធ្វើ​សកម្មភាព​ប្រឆាំង​នឹង​សមាជិក​គណៈកម្មាធិការ​អចិន្ត្រៃយ៍​ចំនួន ១៤​នាក់​ដោយ​បង្កក​ទ្រព្យ​​សម្បត្តិ​ទាំងឡាយ​ដែល​ពួកគេ​អាច​មាន​នៅក្នុង​ដែន​សមត្ថកិច្ច​របស់​ស​ហ​រដ្ឋ​អាម៉េរិក​និង​រារាំង​ពួកគេ​និង​ក្រុមគ្រួសារ​របស់​ពួកគេ​ពី​ការធ្វើដំណើរ​ទៅកាន់​សហរដ្ឋ​អាម៉េរិក​៕

ទីតាំងផ្សាយពាណិជ្ជកម្ម

- Advertisment -

Most Popular