Home ព័ត៌មានអន្តរជាតិ ក្រុមហ៊ុន​ផលិ...

ក្រុមហ៊ុន​ផលិត​វ៉ាក់សាំង​កូវី​ដ​១៩​របស់​ឥណ្ឌា​ដាក់​ពាក្យ​សុំ​ការអនុញ្ញាត​ប្រើប្រាស់​បន្ទាន់​

​ប្រែ​សម្រួល : កញ្ញា​ដា​លី​ស​/ ៖ ក្រុមហ៊ុន​ផលិត​ឱសថ​ឥណ្ឌា​ចំនួន​ពីរ​រួម​ទាំង​ក្រុមហ៊ុន​ផលិត​វ៉ាក់សាំង​ធំ​បំផុត​លើ​ពិភពលោក កាលពី​ថ្ងៃ​ចន្ទ​ទី​៧​ធ្នូ​បាន​ស្វែងរក​ការអនុម័ត​យ៉ាង​ឆាប់រហ័ស​​សម្រាប់​វ៉ាក់សាំង​ការពារ​វីរុស​កូរ៉ូណា​នៅក្នុង​ប្រទេស​ដែល​មាន​ប្រជាជន​ច្រើន​បំផុត​ទី ២ នៅលើ​ពិភពលោក​។​

​ប្រទេស ដែល​មាន​ប្រជាជន​ចំនួន ១,៣ ពាន់​លាន​នាក់​នេះ​គឺជា​ប្រទេស​រងគ្រោះ​ធ្ងន់ធ្ងរ​ជាងគេ​ទី​២​ផងដែរ​នៅលើ​ពិភពលោក​ដោយសារ​ជំងឺ​រាតត្បាត​បន្ទាប់​ពី​សហរដ្ឋអាម៉េរិក និង​កត់ត្រា​ការឆ្លង​ជិត ៩,៧ លាន​នាក់​និង​អ្នកស្លាប់​ជាង ១៤០.០០០ នាក់​។​

​នាយក​ប្រតិបត្តិ​វិទ្យាស្ថាន​សេ​រ៉ាំ​នៃ​ប្រទេស​ឥណ្ឌា​លោក អា​ដា ពូ​ណា​វ៉ាល់​ឡា និយាយថា ការយល់ព្រម​សម្រាប់​ការ​ចែកចាយ​វ៉ាក់សាំង​របស់​ក្រុមហ៊ុន AstraZeneca /Oxford​ដែល​ក្នុងនោះ​ក្រុមហ៊ុន​កំពុង​​ផលិត​វ៉ាក់សាំង ៥០-៦០ លាន​ដូស​ក្នុង​មួយ​ខែ​រួច​ទៅ​ហើយ​នោះ “​នឹង​ជួយ​សង្គ្រោះ​ជីវិត​មនុស្ស​រាប់មិនអស់​” ។​

​លោកពូ​ណា​វ៉ាល់​ឡា​និយាយ​កាលពី​ខែ​មុន​ថា ដូសនី​មួយៗ​នឹង​ត្រូវ​លក់​ឱ្យ​ទៅ​រដ្ឋាភិបាល​ឥណ្ឌា​ក្នុងតម្លៃ​ប្រហែល ២៥០ រូ​ពី (៣ ដុល្លារ​)​។​

​លោកពូ​ណា​វ៉ាល់​ឡា​បាន​បន្ថែមទៀតថា “​ដូចដែល​បាន​សន្យា​ចឹង មុន​ដំណាច់ឆ្នាំ ២០២០ វិទ្យាស្ថាន​សេ​រ៉ាំ​បាន​ដាក់​ពាក្យ​ស្នើសុំ​ការអនុញ្ញាត​ឱ្យ​ប្រើ​ជាបន្ទាន់​សម្រាប់​វ៉ាក់សាំង​ផលិត​នៅ​ឥណ្ឌា​ទីមួយ​ឈ្មោះ PAISHIELD”​។​

​សារព័ត៌មាន Press Trust of India និង​ប្រព័ន្ធ​ផ្សព្វផ្សាយ​ក្នុងស្រុក​ដទៃ​ទៀត​បាន​រាយ​ការណ៍​ថា ក្រុមហ៊ុន Bharat Biotech​កាលពី​ថ្ងៃ​ចន្ទ​ក៏​បាន​ដាក់​ពាក្យសុំ​ការអនុញ្ញាត​ឱ្យ​ប្រើ​ជា​បន្ទាន់​​សម្រាប់​វ៉ាក់សាំង​ដែល​បង្កើត​ដោយ​ខ្លួនឯង​ផង​ដែរ​។​

​សេចក្តីប្រកាស​នេះ​ធ្វើឡើង​បន្ទាប់​ពី​ក្រុមហ៊ុន​ឱសថ Pfizer ដ៏​ធំ​របស់​អាម៉េរិក​និង​ក្រុមហ៊ុន BioNTech របស់​អាល្លឺម៉ង់​កាលពី​សប្តាហ៍​មុន​បាន​ស្វែងរក​ការយល់ព្រម​សម្រាប់​វ៉ាក់សាំង​កូ​វីដ​របស់ខ្លួន​។​

​វ៉ាក់សាំង​របស់​ក្រុមហ៊ុន AstraZeneca អាច​រក្សាទុក​នៅ​សីតុណ្ហភាព​នៃ​ទូទឹកកក​ធម្មតា ខណៈ​វ៉ាក់សាំង​របស់​ក្រុមហ៊ុន Pfizer ត្រូវ​រក្សាទុក​នៅ​សីតុណ្ហភាព​ដក ៧០ អង្សា​សេ​។​

​រដ្ឋ​មន្ត្រី​សុខាភិបាល​ឥណ្ឌា​លោកហាស វ៉ា​ដាន បាន​ប្រាប់​បណ្តាញ​ព័ត៌មាន​ក្នុងស្រុក​កាលពី​ខែ​មុន​ថា អ្នក​ដំបូង​គេ​ដែល​នឹង​ទទួលបាន​វ៉ាក់សាំង​គឺ​បុគ្គលិក​សុខាភិបាល បុគ្គលិក​ជួរមុខ​ផ្សេង​ទៀត​រួមមាន​​ប៉ូលិស កង​អាវុធហត្ថ និង អ្នក​ដែល​ធ្វើ​ការងារ​ផ្នែក​អនាម័យ​ក៏​ដូចជា​មនុស្ស​ដែល​មាន​អាយុ​លើសពី ៦៥ ឆ្នាំ​៕

ឥណ្ឌា​កត់ត្រា​ការឆ្លង​ជិត ៩,៧ លាន​នាក់​និង​អ្នកស្លាប់​ជាង ១៤០.០០០ នាក់​

ទីតាំងផ្សាយពាណិជ្ជកម្ម

- Advertisment -

Most Popular