Home ព័ត៌មានជាតិ សេដ្ឋកិច្ច រដ្ឋបាល​ស្រុក...

រដ្ឋបាល​ស្រុក​បរិបូរណ៍ និង​មន្ទីរ មិនឱ្យ​សង់​ធ្នស់​ថ្មី លើ​ដងស្ទឹង​បរិបូរណ៍ ព្រោះ​ខុស​បច្ចេកទេស​

ដោយៈ ប​.​ខុន​/​ភ្នំពេញៈ សំណង់​ធ្នស់ ដែល​អាជ្ញាធរ​ឃុំ​មេលំ គ្រោង​សាងសង់​រឹងមាំ ដោយ​ប្រើប្រាស់​ថវិកា ប្រមូលបាន​ពី​ប្រជាពលរដ្ឋ ក្នុង​មូលដ្ឋានចំនួន ៣៨ លាន​រៀល មិន​ត្រូវបាន​រដ្ឋបាល​ស្រុក​បរិបូរណ៍ និង​មន្ទីរ​ធនធានទឹក និង​ឧតុនិយម ខេត្តកំពង់ឆ្នាំង អនុញ្ញាត​ឱ្យធ្វើ​ទេ ដោយសារ​ខុស​បច្ចេកទេស ដែលនាំឱ្យ​មាន ប្រែប្រួល​ចរន្តទឹក ធ្វើឱ្យ​តួ​ស្ទឹង នៅ​ផ្នែក​ខាងក្រោម​ធ្នស់ គោក​រាក់ និង បាក់​ដីស្រែ នៅតាម​សងខាង​ប្រឡាយ​អាច​ក្លាយ ជា​ស្ទឹង​ថ្មី ក្នុង​រដូវវស្សា មាន​ទឹកជំនន់​មកដល់​។​

​លោក ដោក ប៊ុន​ថុ​ន ប្រធាន​មន្ទីរ​ធនធានទឹក និង​ឧតុនិយម ខេត្តកំពង់ឆ្នាំង បាន​ប្រាប់​ឱ្យ រស្មី​កម្ពុជា​ដឹង នៅ​ថ្ងៃទី​៨ ខែធ្នូ ឆ្នាំ​២០២០​ថាៈ ការសាងសង់​ធ្នស់ ដោយ លក្ខណៈ​រឹងមាំ កាត់​ដងស្ទឹង​បរិបូរណ៍ ដែល​ដឹកនាំ​ធ្វើ​ដោយ​អាជ្ញាធរ​ឃុំ​មេលំ ដែល​មិនបាន​សុំ​ការអនុញ្ញាត ពី​រដ្ឋបាល​ស្រុក​បរិបូរណ៍ និង​សុំ​ជំនួយ​បច្ចេកទេស ពី​មន្ទីរ​ធនធានទឹក និង​ឧតុនិយម ខេត្តកំពង់ឆ្នាំង​នោះ គឺ​បានឱ្យ​ផ្អាក​សកម្មភាព​ទៅវិញ ហើយដោយ​សារ​ស្ថានភាព​ទីតាំង ត្រូវ​សាងសង់ មិន​សមស្រប តាម​លក្ខណៈ​បច្ចេកទេស​។​

​ទីតាំង​ដែល​អាជ្ញាធរ​ឃុំ​មេលំ គ្រោង​សាងសង់​សំណង់​ធ្នស់​រឹងមាំ​នេះ លោក ដោក ប៊ុន​ថុ​ន បកស្រាយ​ថា ជា​កន្លែង​តួ​ស្ទឹង មាន​ទំហំ​តូច និង​ជ្រៅ បើ​សង់​បង្គោល ធ្នស់​ដោយ​សសរ បេតុង បុក​ចូល​ដី និង​បន្ថែម​ដោយ​បង្គោល​ឈើ មាន​គម្លាត​ពីគ្នា ត្រឹម​មួយ​តឹក​កន្លះ ដូចជា បិទ​ផ្លូវទឹក​ទាំងស្រុង​នោះ នឹង​ធ្វើឱ្យ​ចរន្តទឹក​ស្ទឹង​នេះ​ប្រែ ប្រួល នៅក្នុង​រដូវវស្សា​ពេល​មាន ជំនន់​កើតឡើង ដោយសារ​ទឹក ត្រូវ​ហូរ​ទៅតាម​ប្រឡាយ​ដីខ្សាច់ ងាយ​ដាច់ ដល់​ដីស្រែ នៅ​សងខាង​ប្រឡាយ អាច​និយាយបានថា ប្រឡាយ​នោះ នឹង​ក្លាយ​ទៅ ជា​ស្ទឹង​ថ្មី​ឯ​តួ​ស្ទឹង នៅក្រោម​ធ្នស់ អាច​នឹង​គោក​រាក់ នៅពេល​បង្គោលធ្នស់ មិនអាច​ដកចេញ​វិញ​បាន ពេល​រដូវវស្សា មកដល់​នោះ​។​

​លោក ដោក ប៊ុន​ថុ​ន បាន​ពន្យល់​ទៀតថាៈ ការពិត ផ្ទៃដី​បង្កបង្កើនផល ចំនួន​ជាង ៨០០ ហិកតា នៅក្នុង​ឃុំ​មេលំ និង​ឃុំ​ផ្សារ ស្រុក​បរិបូរណ៍​នេះ បាន​ប្រើប្រាស់​ទឹក ពី​សំណង់​ធ្នស់ ចាស់​មួយ ដែល​មន្ទីរ​បាន​ចូលរួម​សាងសង់ កាលពី​ឆ្នាំ​២០១៩ មាន​ចម្ងាយ​ប្រមាណ​ជា ៤៥០ ម៉ែត្រ ពី​ទីតាំង​ដែល​គេ​គ្រោង​សាងសង់​ធ្នស់​ថ្មី​នេះ ។ ក្នុងករណី​ទឹក ប្រើប្រាស់​មិន​គ្រប់ គេ​អាច​តម្លើង​កម្ពស់​ធ្នស់ បញ្ចាល់​ទឹកតែ​បន្តិច គឺ​អស់​បញ្ហា​ហើយ​។ ស្អែក​នេះ (៩​ធ្នូ​) មន្ទីរ​នឹង​បញ្ជូន​គ្រឿងចក្រ ជាមួយនឹង​មន្ត្រី អ្នកបច្ចេកទេស ទៅ​ព​ង្រឹ​ក​ធ្នស់​ចាស់​ថែមទៀត ដោយ​មិន​អនុញ្ញាត ឱ្យធ្វើ​នៅ​កន្លែង​ថ្មី​ទេ​។ តួ​ស្ទឹង​នៅ​កន្លែង​ធ្នស់​ចាស់ មាន​ទំហំ​ធំ និង​រាក់ មិន​ធ្វើឱ្យមាន​ការប្រែប្រួល​ចរន្តទឹក នៅក្នុង​រដូវវស្សា ដូច​ទីតាំង​ថ្មី​នោះទេ​។​

​ប្រធាន​មន្ទីរ​ខាងលើ បានបញ្ជាក់​ទៀតថាៈ មូល​ហេតុដែល​អាជ្ញាធរ​ឃុំ បាន​ប្រមូល​ថវិកា សង់​ធ្នស់​រឹងមាំ នៅ​ទីតាំង​ថ្មី​នេះ ដោយមាន​ហេតុផល​ថា នៅ​ធ្នស់ ចាស់ បើ​គេ​បញ្ចាល់ទឹក ឡើង​ខ្ពស់​បន្តិច​នោះ គ្រឿងចក្រ​កសិកម្ម មិនអាច​បើកបរ ឆ្លងកាត់​ប្រឡាយ នៅ​សងខាង ធ្នស់​បាន ដោយសារ​ប្រឡាយ​តូច និង​មានទឹក​ជ្រៅ តែ​បញ្ហា​នេះ អាច​ដោះស្រាយបាន ដោយ​បើក​ទំហំ​ប្រឡាយ ក្បែរ​ធ្នស់​ឱ្យ​ធំ តែមាន​ជម្រៅ​រាក់ និង​មាន​ទី​ជម្រាល​វែង (​មិន​ចោទ​) ដើម្បី​ងាយស្រួល​គ្រឿងយន្ត ឡើង​ចុះ និង​មិន​ធ្វើឱ្យ​ចរន្តទឹក​ស្ទឹង​ប្រែប្រួល​។​

​ពាក់ព័ន្ធ​ទៅនឹង​បញ្ហា ខាងលើនេះ លោក ដោក ប៊ុន​ថុ​ន ប្រធាន​មន្ទីរ​ធនធានទឹក និង ឧតុនិយម ខេត្តកំពង់ឆ្នាំង កាលពី​ល្ងាច ថ្ងៃទី​៧ ខែធ្នូ បាន​ជម្រាប​លោក​រដ្ឋ មន្ត្រី​ក្រសួង ធនធានទឹក និង​ឧតុនិយម​ថាៈ ” កាលពី​ល្ងាច​មិញ (៧​ធ្នូ​) នេះ ខ្ញុំបាទ​បាន​ចុះ​ពិនិត្យ​ផ្ទាល់ ជួប​ជាមួយ​លោក​អភិបាល ស្រុក​បរិបូ​ណ៍ និង​មេឃុំ​មេលំ​។ ការ បោះបង្គោល​កាត់​ស្ទឹង បរិបូ​ណ៍​នេះ គឺ​ដឹកនាំ​ដោយ​លោក​មេឃុំ ដែល​លោក​អភិបាលស្រុក គាត់​ទើប​បានដឹង​ដែរ​។ ខ្ញុំបាទ​បាន​ពិនិត្យ ការធ្វើ​នេះ ពុំ​ត្រឹមត្រូវ​តាម​លក្ខណៈ​បច្ចេកទេស​ទេ (​ចរន្តទឹក​ហូរ​ខ្លាំង ក្នុង​រដូវវស្សា ) ” ។​

​នៅក្នុង​របាយការណ៍ ជូន​លោក​រដ្ឋមន្ត្រី​នោះ លោក ដោក ប៊ុន​ថុ​ន បាន​សរសេរ​បញ្ជាក់ថាៈ ” ខ្ញុំបាទ​បាន​ណែនាំ​គាត់ អោយប្រើ​ប្រាស់​ទំនប់​ចាស់ នៅ​ផ្នែក​ខាង លើ​ទីតាំង​ប្រមាណ ៤៥០ ម៉ែត្រ ដែល​មន្ទីរ បាន​យក​គ្រឿងចក្រ ទៅ​ជួយ​ធ្វើឱ្យ​គាត់ តាំងពី​ឆ្នាំ​២០១៩ ដែល​បច្ចុប្បន្ន គាត់​កំពុង​ប្រើប្រាស់ បង្វែរ​ទឹក​ពី​ស្ទឹង ចូលទៅ​ប្រឡាយ​មេ​។ គោលបំណង​ដែល​គាត់ (​មេឃុំ​) ធ្វើ​ទំនប់​ថ្មី គឺ​កាលណា តម្លើង​កំពស់​ទឹក ទឹក​នៅក្នុង​ប្រឡាយ​មេ​ជ្រៅ អ្នកភូមិ​ពិបាក​ឆ្លង​។ ទំនប់​ចាស់ មាន​កន្លែង​ខ្លះ ទឹក​ច្រោះ គាត់​មានការ​បារម្ភ​។ ចំណុច​ទាំងពីរ ខាងលើ​ខ្ញុំបាទ បាន​ពន្យល់ អោយប្រើ​ទំនប់​ចាស់ ដោយ​យើង​គ្រាន់តែ​ពង្រឹង បន្ថែម​បន្តិច អស់​ថវិកា​តិច ហើយ​ចំណែក​ការធ្វើដំណើរ ឆ្លង​ប្រឡាយ យើង​អាចធ្វើ​ជំរាល​ប្រឡាយ អោយ​ធំ ធារទឹក ក៏​ហូរ​បាន​ច្រើន អ្នកធ្វើដំណើរ ក៏​អាចធ្វើ​ដំណើរ បាន​ស្រួល​”​។​

​គួរ​រំលឹក​ឱ្យដឹងថា កាលពី​ថ្ងៃទី​៧ ខែធ្នូ រស្មី​កម្ពុជា បាន​ផ្សាយដំណឹង​ថា នៅ​ព្រឹក​ថ្ងៃទី​៦ ខែធ្នូ ឆ្នាំ​២០២០ អាជ្ញាធរ​ឃុំ​មេលំ បាន​ឯកភាពគ្នា ជាមួយ​ប្រជាពលរដ្ឋ បាន​ប្រមូល​ថវិកា បាន​ជាង ៣៨ លាន​រៀល ជួល​គ្រឿងចក្រ យកមក​បុកគ្រឹះ ឲ្យ​បាន​រឹងមាំ នៅ​ចំណុច​ព្រំប្រទល់​ជាប់​គ្នា រវាង​ឃុំ​ផ្សារ និង​ឃុំ​មេលំ ក្នុងស្រុក បរិបូណ៌ ដើម្បី​ទប់​ស្ទឹង​បញ្ចាល់ទឹក ចូល​ប្រឡាយ សម្រាប់​នាំយក​ទឹក​ពី​ស្ទឹង ទៅ​ស្រោចស្រព ដីស្រែប្រាំង ប្រើប្រាស់​អោយបាន​យូរអង្វែង តែម្តង ។ អាជ្ញាធរ​ឃុំ​មេលំ និង​ប្រជាពលរដ្ឋ បាន​ឯកភាពគ្នា ជា​ឯកច្ឆន្ទ​នេះ ដោយសារតែ ពួកគេ​ជួប​ទុក្ខលំបាក​នឹង​តម្រូវការ​ទឹក ជា​ចាំបាច់ ហើយ​ត្រូវ​ចំណាយ​ថវិកា ប្រមាណ ២ លាន​រៀល ជា​រៀងរាល់ឆ្នាំ សម្រាប់​ទប់​ស្ទឹង បញ្ចាល់ទឹក ចូល​ប្រឡាយ ដើម្បី​នាំយកទៅ ស្រោចស្រព​ផ្ទៃដី ស្រែប្រាំង​នោះ ។​

​លោក ម កេ ត សុ ឃា មេឃុំ មេលំ ស្រុក បរិបូណ៌ បានបញ្ជាក់ ប្រាប់ អ្នកយកព័ត៌មាន ថាៈ ជា​រៀងរាល់ឆ្នាំ ប្រជាពលរដ្ឋ ទាំងពីរ​ឃុំ ដែល​នៅជាប់​គ្នា តែងតែ ប្រមូល​ថវិកា​គ្នា​ទិញ សំបក​កា​រ៉ុង ទិញ​ឈើ ធ្វើជា​បង្គោល បោះ​និង​ទិញ​ដើម​ឫស្សី ជាដើម ដើម្បី​ទប់ទឹក​បញ្ចូល ទៅតាម​ប្រឡាយ រួច​នាំយកទៅ ស្រោចស្រព ផ្ទៃដី ស្រែប្រាំង ដែលមាន​ជាង ៨០០ ហិកតា នៅក្នុង​ឃុំ ២ គឺ​ឃុំ​មេលំ និង​ឃុំ​ផ្សារ ជាប់​ព្រំប្រទល់​គ្នា ។ ដោយសារតែ កិច្ចការងារ​នេះ ធ្វើ​ដដែលៗ ជា​រៀងរាល់ឆ្នាំ បែបនេះហើយ ទើប​ឆ្នាំនេះ លោក​បាន​សម្របសម្រួល​គ្នា ជាមួយ​ប្រជាពលរដ្ឋ ប្រមូល​ថវិកា ជួល​គ្រឿងចក្រ មក​បុកគ្រឹះ​រឹងមាំ សម្រាប់​ការប្រើប្រាស់ អោយបាន យូរអង្វែង តែម្តង ។​

​លោក មេឃុំ មេលំ បានបញ្ជាក់ ថាៈ ការប្រមូល និង​រៃអង្គាស​គ្នា ជា​ប្រាក់ បានមកពី​ភូមិ​មេលំ ចំនួន ២៤.៤៦៥.០០០ រៀល និង​ភូមិ​កាន់​យួរ ប្រមូល ថវិកា​បាន ១៤.៤៦០.០០០ រៀល សរុប​ទាំង ២ ភូមិ គឺ​បាន​ចំនួន ៣៨.៩២៥.០០០ រៀល ។ ថវិកា​ទាំងនោះ បាន​ជួល​គ្រឿងចក្រ មក​លើក​ជា​ទំនប់ និង​បុកគ្រឹះ​សសរថ្ម តែម្ដង ដែល​អាច​ប្រើប្រាស់​យូរអង្វែង ។​

​សូមបញ្ជាក់ថា ផ្ទៃដី​ជាង ៨០០ ហិកតា នៅ​ផ្នែក​ខាងក្រោម នៃ​ឃុំ​មេលំ និង​ឃុំ​ផ្សារ ប្រសិនបើ​ប្រជាពលរដ្ឋ មិន​នាំគ្នា​បញ្ចាល់​ទឹកស្ទឹង ឱ្យ​ហូរ​ចូល​ប្រឡាយ​ទេ គឺ​ស្រែ​របស់ ប្រជាពលរដ្ឋ មិនអាច​បង្ករ​បង្កើន​ផល ស្រូវប្រាំង​បានឡើយ ដោយហេតុ​នេះហើយ ទើប​ពួកគេ តែង​សហការគ្នា ទាំង​ថវិកា និង​កម្លាំង​ពលកម្ម ទប់ទឹក រៀងរាល់ឆ្នាំ ។ តែ​សម្រាប់​ឆ្នាំនេះ អាជ្ញាធរ​ឃុំ​មេលំ ប្រើ​វិធានការ​ថ្មី ជួល​គ្រឿងចក្រ​បុកគ្រឹះ​សម្រាប់​ការ ប្រើប្រាស់ យូរ​ឆ្នាំ​តែម្តង ៕​PC

ទីតាំងផ្សាយពាណិជ្ជកម្ម

- Advertisment -

Most Popular