Home ព័ត៌មានជាតិ អប់រំ ​ការរៀបចំ​ពិព...

​ការរៀបចំ​ពិព័រណ៍​សៀវភៅ ឆ្នាំនេះ ធ្វើឡើង​តាម​ប្រព័ន្ធ​អន​ឡាញ ចាប់ពី​ថ្ងៃទី​១២ ដល់ ១៩​ធ្នូ​

​ដោយៈ ដេប៉ូ / ភ្នំពេញៈ ការរៀបចំ​ពិព័រណ៍​សៀវភៅ​កម្ពុជា នា​ឆ្នាំនេះ ត្រូវបាន​គេ​ប្រារព្ធ​ធ្វើឡើង តាម​ប្រព័ន្ធ​អន​ឡាញ​វិញ ដោយសារតែ​ការរីក​រាលដាល នៃ​ជំងឺ​កូ​វីដ​-១៩ កំពុង​កើតមាន​បន្តបន្ទាប់ នៅ​កម្ពុជា ក្នុង​រយៈ​ចុង​ក្រោយនេះ ពិសេស​ក្នុង​ព្រឹត្តិការណ៍ សហគមន៍ ២៨ វិច្ឆិកា តែម្តង​។​

​យោងតាម​លិខិត​ជូនដំណឹង ពី​គណៈកម្មការ​រៀបចំ​ពិព័រណ៍​សៀវភៅ បានឱ្យដឹង​នៅ​ថ្ងៃទី​៩ ខែធ្នូ ឆ្នាំ​២០២០​នេះ​ថាៈ ដើម្បី​បន្ត​លើកស្ទួយ ការបោះពុម្ពផ្សាយ និង​ឧស្សាហកម្ម​សៀវភៅ​កម្ពុជា គណៈកម្មការ សម្រេចយក​សប្តាហ៍​ទី​២ នៃ​ខែធ្នូ ឆ្នាំ​២០២០​ជា “ សប្តាហ៍​សៀវភៅ​” ជាមួយ​ព្រឹត្តិការណ៍ និង​សកម្មភាព​មួយចំនួន ដែល​នឹងត្រូវ​រៀបចំឡើង ជា​លក្ខណៈ​អន​ឡាញ គឺជា​រយៈ​សន្មត​មួយ ដើម្បី​ឧទ្ទិស​ដល់​សៀវភៅ ក្នុង​បរិបទ​មួយ ដែល​យើង​មិនអាច​រៀបចំ ពិព័រណ៍​សៀវភៅ ថ្នាក់ជាតិ បាន​ដោយសារ មាន​ការរីក​រាលដាល នៃ​ជំងឺ​កូ​វីដ​-១៩​។ ក្រោម​ប្រធានបទ “​សម័យ​កូ​វីដ កាន់តែ​ស្និទ្ធ​នឹង​សៀវភៅ​” ដែល​នឹង​ប្រារព្ធ​ឡើង ពេញ​មួយ​សប្តាហ៍​ទី​២ នៃ​ខែធ្នូ គិត​ចាប់ពី​ថ្ងៃទី​១២ រហូតដល់​ថ្ងៃទី​១៩ ខែធ្នូ ឆ្នាំ​២០២០ ក្រោម កិច្ចសហប្រតិបត្តិការ ពី​ស្ថាប័ន​ក្រសួង ចំនួន ៣ ដូចជា​ក្រសួង​វប្បធម៌​និង វិចិត្រសិល្បៈ ក្រសួង​ព័ត៌មាន និង​ក្រសួង​អប់រំ យុវជន និង​កីឡា​។​

​គួរ​បញ្ជាក់ថា ការរៀបចំ​ពិព័រណ៍ “ សប្តាហ៍​សៀវភៅ​” នេះ បានរួម​បញ្ចូល​សកម្ម​ភាព​មួយចំនួន ដែល​នឹង​រៀបចំ តាម​ប្រព័ន្ធ​អន​ឡាញ មានដូចជា ការផ្សព្វផ្សាយ​សៀវភៅ និង វី​ឌី​អូ របស់​កវី​អ្នក​បោះពុម្ពផ្សាយ បណ្ណាគារិក អ្នកលក់​សៀវភៅ ដៃគូ​អភិវឌ្ឍ វិស័យ​សៀវភៅ និង​អំ​ណាន​គ្រឹះស្ថាន​អប់រំ និង​លើ​គេហទំព័រ របស់​ពិព័រណ៍​សៀវភៅ​កម្ពុជា​។ លើសពីនេះ​ទៀត ក៏មាន​ការជួប​និយាយ សំណេះសំណាល ជាមួយនឹង​វាគ្មិន​ពិសេសៗ ដែល​នឹង​អញ្ជើញ ចូលរួម តាមរយៈ​កម្មវិធី Zoom ទៀតផង​។ តាមរយៈ​កម្មវិធី​នេះដែរ សំដៅ​ធ្វើយ៉ាងណា ទាក់ទាញ​ឱ្យ​អ្នក​ចូលចិត្ត​អាន​សៀវភៅ និង​ស្រឡាញ់​ការអាន សៀវភៅ​នៅ​កម្ពុជា ក៏ដូចជា លើកស្ទួយ​វិស័យ​បោះពុម្ព នៅ​កម្ពុជា កាន់តែ​រីកចម្រើន ទៅមុខ​បន្ថែមទៀត​៕/V


ទីតាំងផ្សាយពាណិជ្ជកម្ម

- Advertisment -



Most Popular