Home ព័ត៌មានជាតិ សន្តិសុខ ប៉ូលិស ដកហូត​...

ប៉ូលិស ដកហូត​ម៉ូតូ២០​គ្រឿង នៅពេល​ឆែកឆេរកន្លែង​បញ្ចាំចំនួន​បី​ទីតាំង​

​ដោយៈ អង្គរតូច​/​សៀមរាបៈ កម្លាំង​នគរបាលព្រហ្មទណ្ឌ​កម្រិត​ស្រាល នៃ​ស្នងការដ្ឋាននគរបាល​ខេត្ត កាលពី​រសៀល ថ្ងៃទី​៨ ខែធ្នូនេះ បាន​សហការ​ជាមួយ កម្លាំង​នគរបាល មូលដ្ឋានចុះ​ឆែកឆេរទីតាំង​បញ្ចាំ​គ្មាន​ច្បាប់ ចំនួន៣កន្លែង ដោយបាន​ដកហូត​ម៉ូតូ មិនមាន​លិខិត​សម្គាល់ចំនួន២០គ្រឿង​។

​លោក​វរសេនីយ៍ឯក ហង្ស សូផាត​ភី​រម្យ នាយការិយាល័យ នគរបាល​ព្រហ្មទណ្ឌ​កម្រិត ស្រាល​ខេត្ត បាន​ឲ្យ​ដឹងថាៈ ការបង្ក្រាប​នេះ គឺមាន​ការសហការ​ជាមួយ អធិការនគរបាល ក្រុង ប៉ុស្តិ៍នគរបាល​សង្កាត់​ទឹក​វិល និង​ប៉ុស្តិ៍នគរបាល សង្កាត់​គោកចក​។ ក្នុងនោះ សង្កាត់ ទឹក​វិល ចំនួន​ពីរ ទីតាំង ដែល​គ្មាន​ច្បាប់ និង អាជ្ញាប័ណ្ណ​ទទួល​បញ្ចាំ ។ ទីតាំង​ទីមួយ ម្ចាស់​ឈ្មោះ ទែន សុ​ភិន ភេទ​ស្រី អាយុ​៣៦​ឆ្នាំ និង​ប្ដី​ឈ្មោះ ដួង ហេង អាយុ ៤៨​ឆ្នាំ ស្ថិតនៅ​ភូមិ​ប្រិ​យ៍​ចាស់ សង្កាត់ ទឹក​វិល ក្រុង​សៀមរាប ដកហូត​ម៉ូតូ បាន​ចំនួន ៧ គ្រឿង ដែល​ខុស​ប្រក្រតី​។ ទីតាំង​ទី​២ ម្ចាស់​ឈ្មោះ ស៊ីម ប៊ុន​ណាត ភេទ​ស្រី អាយុ ៤៨ ឆ្នាំ មាន​ទីតាំង នៅ​ភូមិ​ជ័យ សង្កាត់​ទឹក​វិល ក្រុង​សៀមរាប ដកហូត​ម៉ូតូ ខុស​ប្រក្រតី ចំនួន ៣ គ្រឿង ។ ឯ​ទី​តាំងទី​៣ ម្ចាស់​ឈ្មោះ ស៊ឹង នួ​ម ភេទ​ស្រី អាយុ ៥១ ឆ្នាំ នៅ​ភូមិ នគរ​ក្រៅ សង្កាត់​គោកចក ក្រុង​សៀមរាប ដកហូត​ម៉ូតូ ខុស​ប្រក្រតី ចំនួន ១០ គ្រឿង ។​

​លោកនាយ​ការិយាល័យ បានបញ្ជាក់​ថាៈ ចំពោះ​ម្ចាស់​ទីតាំង មកទល់​រសៀល ថ្ងៃទី​៩ ខែធ្នូ​នេះ សមត្ថកិច្ច កំពុង​សាកសួរ និង​ស៊ើបអង្កេត​នៅឡើយ​។ ប្រសិនបើ ការស៊ើបអង្កេត ឃើញថា មិនមាន​ជាប់​ពាក់ព័ន្ធ​នឹង​ការ​ទទួលផល​ចោរកម្ម​នោះ និង​អប់រំ​ធ្វើ​កិច្ចសន្យា​។ ប៉ុន្តែ​បើ​មាន​ពាក់ព័ន្ធ​នឹង​ការ​ទទួលផល​ចោរកម្ម នោះ​នឹង​កសាង​សំណុំរឿង​បញ្ជូនទៅ តុលាការ​។​

​ជាមួយគ្នា​នោះ លោក​វរសេនីយ៍ឯក ហង្ស សូផាត​ភី​រម្យ ក៍បាន​អំពាវនាវ​ដល់​ប្រជាពលរដ្ឋ ទាំងអស់ ដែល​បាន​បាត់​ម៉ូតូ សូម​អញ្ជើញ​ទៅពិនិត្យ​មើល នៅ​អធិការដ្ឋាន​នគរបាល ក្រុង​សៀមរាប ដោយ​ភ្ជាប់​ជាមួយ ឯកសារ​ឲ្យ​បាន​ត្រឹមត្រូវ​៕​PC

ទីតាំងផ្សាយពាណិជ្ជកម្ម

- Advertisment -

Most Popular