Home ព័ត៌មានអន្តរជាតិ ប្អូនស្រី​គីម...

ប្អូនស្រី​គីម​ជុង​អ៊ុន​រិះគន់​រដ្ឋាភិបាល​ក្រុង​សេ​អ៊ូ​ល​ចំពោះ​ការសង្ស័យ​លើ​ករណី​កូវី​ដ​សូន្យ​នៅ​កូរ៉េខាងជើង​

ប្រែ​សម្រួល : កញ្ញា​ដា​លី​ស ៖​ប្អូនស្រី​ដ៏​មាន​អំណាច​របស់​មេដឹកនាំ​កូរ៉េខាងជើង គីម ជុង​អ៊ុន បាន​វាយប្រហារ​រិះគន់​រដ្ឋមន្ត្រីការបរទេស​កូរ៉េខាងត្បូង​ចំពោះ​ការសង្ស័យ​លើ​ការអះអាង​របស់​កូរ៉េខាងជើង​ដែល​​ថា​ប្រទេស​នេះ​គ្មាន​វីរុស​កូរ៉ូណា​មួយ​គ្រាប់សោះ ដោយ​ព្រមាន​ទៅ​រដ្ឋមន្ត្រី​នោះ​ថា​អាច​នឹង​ទទួល​ផលវិបាក​ចំពោះ​សម្តី​បែបនេះ​។​

​រដ្ឋមន្ត្រីការបរទេស​កូរ៉េខាងត្បូង​លោកស្រី កាង ឃ្យុ​ង​វ៉ា បាន​និយាយ​កាលពី​ចុង​សប្តាហ៍​ថា វា​ពិបាក​នឹង​ជឿ​ចំពោះ​ការអះអាង​របស់​កូរ៉េខាងជើង​ថា​មិន​មាន​ការ​ផ្ទុះ​ឡើង​នៃ​វីរុស​កូរ៉ូណា​នៅលើ​ដី​របស់​ខ្លួន​។​

​លោកស្រី​បាន​បន្ថែមទៀតថា​កូរ៉េខាងជើង​មិនបាន​ឆ្លើយតប​នឹង​ការផ្តល់ជូន​របស់​កូរ៉េខាងត្បូង​សម្រាប់​កិច្ចសហប្រតិបត្តិការ​ដើម្បី​រួម​គ្នា​ប្រយុទ្ធ​នឹង​ជំងឺ​រាតត្បាត​នោះទេ​។​

​ប្អូនស្រី​របស់​មេដឹកនាំ​កូរ៉េខាងជើង នាង​គីម យ៉ូ​ជុង បាន​ឆ្លើយតប​វិញ​នៅ​ក្នុង​សេចក្តីថ្លែងការណ៍​មួយ​ដែល​ផ្សាយ​ដោយ​ទូរទស្សន៍​រដ្ឋ​។​

នាង​គីម យ៉ូ​ជុង

​នាង​និយាយថា “​គេ​អាច​មើលឃើញ​ពី​សម្តី​មិន​សម​ហេតុ​សម​ផល​ដែល​ធ្វើឡើង​ដោយ​លោកស្រី ដោយ​មិន​បាន​ពិចារណា​អំពី​ផលវិបាក​នានា​រហូតដល់​ថ្នាក់​លោកស្រី​ចង់​ធ្វើឱ្យ​ទំនាក់ទំនង​កាន់តែ​សោះកក្រោះ​​ថែមទៀត​រវាង​កូរ៉េ​ខាងជើង​និង​កូរ៉េខាងត្បូង​”​។​

​នាង​បន្ត​ថា “​ចេតនា​ពិត​របស់​លោកស្រី​គឺ​ឃើញច្បាស់​នឹង​ភ្នែក​។ យើង​នឹង​មិន​ភ្លេច​ពាក្យ​សម្តី​របស់​លោកស្រី​ឡើយ ហើយ​លោក​ស្រី​ប្រហែល​ត្រូវ​បង់​នូវ​តម្លៃ​ដ៏​ច្រើន​សម្រាប់​សម្តី​នេះ​”​។​

​ការអត្ថាធិប្បាយ​របស់​នាង​យ៉ូ​ជុង​បង្ហាញ​ពី​ភាព​រសើប​របស់​កូរ៉េខាងជើង​ចំពោះ​អ្វី​ដែល​ខ្លួន​ចាត់ទុកថា​ជា​ការប៉ុនប៉ង​ធ្វើឱ្យ​ខូច​កេរ្តិ៍ឈ្មោះ​របស់​ខ្លួន​នៅពេល​ដែល​ប្រទេស​នេះ​កំពុង​ការពារ​ប្រឆាំង​​នឹង​ជំងឺ​រាតត្បាត​និង​ការធ្លាក់​ចុះ​សេដ្ឋកិច្ច​។​

​ទោះបីជា​មាន​ការអះអាង​ពី​ករណី​វីរុស​កូរ៉ូណា​សូន្យ​ក៏ដោយ​ក៏​ប្រព័ន្ធ​ផ្សព្វផ្សាយ​រដ្ឋ​របស់​កូរ៉េខាងជើង​នៅ​តែ​និយាយ​ម្តង​ហើយ​ម្តងទៀត​ថា​មាន​យុទ្ធនាការ​ប្រឆាំងនឹង​ការរីក​រាលដាល​ជំងឺ​​ក្នុង​កម្រិត​ប្រុងប្រយ័ត្ន​ខ្ពស់បំផុត ដោយ​ក្នុងនោះ​ប្រទេស​នេះ​បាន​បិទ​ព្រំដែន​អន្តរជាតិ ដោយ​បណ្តេញ​អ្នក​ការទូត​និង​ធ្វើ​ចត្តា​ឡីស័​ក​អ្នកស្រុក​ដែល​មាន​រោគ​សញ្ញា​សង្ស័យ​។​

​ការបិទ​ព្រំដែន​ភាគ​ខាងជើង​ជាមួយ​ប្រទេស​ចិន​ដែល​ជា​ដៃគូ​ពាណិជ្ជកម្ម​ដ៏​ធំ​បំផុត​របស់​ខ្លួន កំពុង​ធ្វើ​ឱ្យ​ខូច​សេដ្ឋកិច្ច​ដែល​ផុយស្រួយ​របស់ខ្លួន​។ ​កូរ៉េ​ខាងជើង​បាន​សារភាពថា​ខ្លួន​កំពុង​ប្រឈម​នឹង​វិបត្តិ​ជា​ច្រើន​ដោយសារ​ផល​ប៉ះពាល់​នៃ​ជំងឺ​រាតត្បាត​ជា​សកល គ្រោះមហន្តរាយធម្មជាតិ​កាល​ពី​រដូវក្តៅ​មុន និង​ការដាក់ទណ្ឌកម្ម​ដឹកនាំ​ដោយ​សហរដ្ឋ​​អាម៉េរិក​ជាប់​ទាក់ទង​នឹង​កម្មវិធី​នុយក្លេអ៊ែរ​របស់ខ្លួន​៕

ទីតាំងផ្សាយពាណិជ្ជកម្ម

- Advertisment -



Most Popular