Home ព័ត៌មានជាតិ សេដ្ឋកិច្ច ​ច្រាំងទន្លេ​...

​ច្រាំងទន្លេ​ប្រវែង ១៩ គីឡូម៉ែត្រ ត្រូវបាន​ការពារ និង​ទប់ស្កាត់ ការបាក់​រាលដាល​

ដោយៈ ប​.​ខុន / ភ្នំពេញៈ ច្រាំងទន្លេ​មេគង្គ​លើ និង​ច្រាំង​ទន្លេបាសាក់​ប្រវែង ១៩ គីឡូម៉ែត្រ ដែល​បាន​បាក់ស្រុត បង្កឱ្យមាន​ហា​នី​ភ័យ​ខ្ពស់ ទៅដល់​ផ្លូវជាតិ មណ្ឌល​សុខភាព សាលារៀន វត្ត​អារាម និង​ភូមិដ្ឋាន​របស់​ប្រជាពលរដ្ឋ នៅតាម​ដង​ទន្លេ ត្រូវបានធ្វើ​ការទប់ស្កាត់​រួច នៅក្នុង​ឆ្នាំ​២០១៩-២០២០ ដោយ​ក្រសួង​ធនធានទឹក និង​ឧតុនិយម ដែល​បាន​ប្រើ ប្រាស់​បាវ​ច្រក​ខ្សាច់​( Geotextile bags ) ការពារ​ជើង​ក្រោម ។​

​លោក ម៉ៅ ហាក់ មន្ត្រី​ជំនាញ​របប​ជលសា​ស្ត្រ និង​ជា​អ្នកដឹកនាំ​ក្រុមមន្ត្រី ទប់ស្កាត់​ច្រាំង​បាក់ស្រុត របស់​ក្រសួង​ធនធានទឹក និង​ឧតុនិយម បាន​ប្រាប់​ឱ្យ​រស្មី​កម្ពុជា ដឹង​នៅ​ថ្ងៃទី​៩ ខែធ្នូ ឆ្នាំ​២០២០​ថាៈ សកម្មភាព​ទប់ស្កាត់ ការបាក់​រាលដាល នៃ​ច្រាំងទន្លេ ដោយសារ​ការប្រែប្រួល​ចរន្តទឹក ទើប​ចាប់​ផ្តើមធ្វើ នៅក្នុង​ឆ្នាំ​២០១៩ បន្ទាប់ពី​បាន​សិក្សា​ស្រាវជ្រាវ ចប់សព្វគ្រប់ លើ​ដង​ទន្លេ​ទាំង ៤ រួច ឃើញ​មាន​ទីតាំង​បាក់ស្រុត រាប់សិប​កន្លែង និង​មាន​ប្រវែង រាប់រយ​គីឡូម៉ែត្រ តែ​កន្លែង​ដែល បានធ្វើ​ចំពោះមុខ គឺ​ចំណុច​ប្រឈម​បាក់​ខ្លាំង ដល់​ផ្លូវជាតិ មណ្ឌល​សុខភាព សាលារៀន វត្ត​អារាម និង​ភូមិដ្ឋាន របស់​ប្រជាពលរដ្ឋ រស់នៅ​ច្រើន​កុះករ​។​

​នៅក្នុង​ឆ្នាំ​២០១៩ និង​ឆ្នាំ​២០២០ នេះ លោក ម៉ៅ ហាក់ បាន​បញ្ជាក់ថា មាន​ច្រាំងទន្លេ​ជាច្រើន​កន្លែង នៅក្នុង​ស្រុក​មុខកំពូល កោះធំ ស្អាង ខេត្តកណ្តាល នៅ​ស្រុក ស្ទឹងត្រង់ ខេត្តកំពង់ចាម នៅ​ស្រុក​ក្រូចឆ្មារ និង​ស្រុក​ត្បូងឃ្មុំ ខេត្ត​ត្បូងឃ្មុំ សរុប​មាន​ប្រវែង ១៩.០៥០ ម៉ែត្រ ត្រូវបាន​ទប់ស្កាត់ ការបាក់​រាលដាល​រួច ដោយ​ប្រើ​បាវ ច្រក​ខ្សាច់​( Geotextile bags ) ការពារ​ជើង​ក្រោម​។ កន្លែង​ដែល​ធ្វើ​រួច​បា​នប​ញ្ឃ​ប់ ការបាក់​រាលដាល និង​មាន​ដីដុះ​ជាមួយ ស្មៅ​ត្រែង ជា​សញ្ញា​លែង​បាក់​។​

​លោក ម៉ៅ ហាក់ បានឱ្យដឹង​ទៀតថាៈ ក្រុមការងារ ពេលនេះ កំពុង​បន្តធ្វើ​បង្ហើយ​កិច្ចការ​គម្រោង​ចាស់ ឯ​គម្រោង​ថ្មី មិនទាន់មាន​ទេ ព្រោះ​ថវិកា មានកំណត់​។ ច្រាំងទន្លេ ដែល​បានធ្វើ​ដោយ​ប្រើ​បាវ​ច្រក​ខ្សាច់ វា​មិន​ល្អមើល នៅ​ផ្នែក​ខាងលើ តែ​វា​មាន​សុវត្ថិភាព នៅ​ផ្នែក​ជើង​ក្រោម​។ ចំណែកឯ​ច្រាំងទន្លេ ដែល​សាងសង់​ពី​បេតុង មានតែ​នៅ​ក្រុង​កំពង់ចាម បាន​ប្រវែង ១២០ ម៉ែត្រ និ​ប្រវែង ១៥០ ម៉ែត្រ នៅ​ក្រុង​ក្រចេះ​។ ច្រាំងទន្លេ ដែល​ត្រូវការពារ នៅមាន​ចំនួន រាប់សិប​កន្លែង និង​មាន​ប្រវែង រាប់រយ​គីឡូម៉ែត្រ នៅ​ទន្លេមេគង្គ​លើ ទន្លេមេគង្គ​ក្រោម និង​ទន្លេបាសាក់​។ ច្រាំងទន្លេ​ទាំងនោះ​បាក់ ស្រុត​បន្តបន្ទាប់ មកពី​ការប្រែប្រួល​ចរន្តទឹក ដែល​មិនបាន​បូម​ស្តារ តម្រង់​មុខទឹក ជា​យូរ​មកហើយ​។​

​កាលពី​ក្នុង​ឆ្នាំ​២០១៩ រាជរដ្ឋាភិបាល បានសម្រេច​ឱ្យ​ក្រសួង​ធនធានទឹក និង ឧតុនិយម សិក្សា​ស្រាវជ្រាវ អំពី​ស្ថានភាព​ប្រែប្រួល របស់​ទន្លេ និង​កំណត់​គោលដៅ ត្រូវ​កែលម្អ ដើម្បី​ទប់ស្កាត់ ការបាក់​រាលដាល​។​

​គួរ​រំលឹក​ឱ្យដឹងថា ច្រាំងទន្លេ​មេគង្គ ដែល​បាន​ទប់ស្កាត់ ដោយ​ប្រើ​បាវ ច្រក​ខ្សាច់​រួច នៅក្នុង​ឃុំ​ឫស្សី​ជ្រោយ ស្រុក​មុខកំពូល មាន​ប្រវែង ១២.០០០ ម៉ែត្រ នៅ​ឃុំ​តា​លន់ ស្រុក​កោះធំ ប្រវែង ៦០០ ម៉ែត្រ និង​នៅ​ឃុំ​ព្រែក​ជ្រៃ ស្រុក​ស្អាង ខេត្តកណ្ដាល ប្រវែង ១៥០ ម៉ែត្រ ។ នៅ​ឃុំ​ពាម​កោះ​ស្នា ស្រុក​ស្ទឹងត្រង់ ខេត្តកំពង់ចាម មាន​ប្រវែង ៤.៤០០ ម៉ែត្រ និង​នៅ​ស្រុក​ក្រូចឆ្មារ ១.៥០០ ម៉ែត្រ និង​នៅ​ស្រុក​ត្បូងឃ្មុំ បាន​ប្រវែង ៥០០ ម៉ែត្រ​៕/V​

ទីតាំងផ្សាយពាណិជ្ជកម្ម

- Advertisment -



Most Popular