​កម្ពុជា ក្លាយជា​ម្ចាស់ផ្ទះ​លើកដំបូង ក្នុងការ​រៀបចំ កិច្ចប្រជុំ​ក្រុមប្រឹក្សាភិបាល នៃ​សមាគម​សន្តិសុខ សង្គម​អាស៊ាន​

ដោយៈ ពៅ​និមល / ភ្នំពេញៈ ក្រុមប្រឹក្សាភិបាល នៃ​សមាគម​សន្តិសុខ​សង្គម​អាស៊ាន (ASEAN Social Security Association (ASSA) កាលពី​ព្រឹក​ថ្ងៃទី​៩ ខែធ្នូ ឆ្នាំ​២០២០​នេះ បាន​បើក​កិច្ចប្រជុំ​លើក​ទី​៣៧ ដើម្បី​ពិភាក្សាគ្នា អំពី​ប្រធានបទ ស្តីពី​ការពង្រីក​ការ​គ្របដណ្តប់ របប​សន្តិសុខ​សង្គម​។ នេះ​គឺជា​លើក​ទី​១ ដែល​កម្ពុជា បានរៀបចំ​ជា​ម្ចាស់ផ្ទះ នៃ​កិច្ចប្រជុំ​ក្រុមប្រឹក្សាភិបាល នៃ​សមាគម​សន្តិសុខ​សង្គម អាស៊ាន​លើក​ទី​៣៧ នេះ​ឡើង តាមរយៈ​ប្រព័ន្ធ​វីដេអូ (Video Conference) ដោយមាន​ការចូលរួម ពី​តំណាង​ប្រធាន​សន្តិសុខ​សង្គម​អាស៊ាន ទាំង ១០ ប្រទេស សរុប​ចំនួន ២១ ស្ថាប័ន ដែល​ប្រព្រឹត្តទៅ នៅ​សាលប្រជុំ​ធំ នៃ​បេឡា​ជាតិ របប​សន្តិសុខ​សង្គម (​ប​.​ស​.​ស​) រាជធានី​ភ្នំពេញ​។​

​នៅក្នុង​សេចក្តីប្រកាស​ព័ត៌មាន​ក្រោយ​ចប់​កិច្ចប្រជុំ លោក អ៊ុក សមវិទ្យា អគ្គនាយក​បេឡា​ជាតិ របប​សន្តិសុខ​សង្គម និង​ជា​ប្រធាន​នៃ កិច្ចប្រជុំ បានលើកឡើង​ថាៈ រយៈពេល​ជាង ៥៣ ឆ្នាំ​មកនេះ អាស៊ាន​សម្រេចបាន​សមិទ្ធ​ផល ចម្បង​ជាច្រើន ជាពិសេស​សមិទ្ធផល​ថ្មីៗ ក្នុង​ការកសាង​សហគមន៍​អាស៊ាន ទៅតាម​សរសរ​ស្តម្ភ ទាំងបី គឺ​សហគមន៍​នយោបាយ​-​សន្តិសុខ​អាស៊ាន​, សហគមន៍​សេដ្ឋកិច្ច​អាស៊ាន និង​សហគមន៍​សង្គម -​វប្បធម៌​អាស៊ាន​។ ទន្ទឹមនឹងនេះ ក៏បាន​មើលឃើញ អំពី​បញ្ហា​ប្រឈម និង​កិច្ចការ​ជាច្រើន នៅ​ចំពោះមុខ ដែល​តម្រូវ​ឲ្យ​មានការ​រួបរួមគ្នា ពុះពារ​ជំនះ និង​ដោះស្រាយ ក្នុងស្ថានភាព ដែលមាន​ការវិវត្ត​ប្រែប្រួល យ៉ាង​ឆាប់រហ័ស នៅក្នុង​សភាពការណ៍ នយោបាយ សន្តិសុខ សេដ្ឋកិច្ច និង​សង្គម ទាំង​ក្នុង​កម្រិត​សកល និង​ទាំង​ក្នុង​កម្រិត​តំបន់​។​

​ប្រការនេះ តម្រូវ​ឲ្យ​ទាំងអស់គ្នា បង្កើន​ការខិតខំ​ទ្វេដង​ថែមទៀត ក្នុង​សម័យកាល នៃ​ការរីក​រាលដាល ជំងឺ​កូ​វីដ​១៩ ដែល​នៅតែ​បន្ត​ឆ្លង ក្នុង​តំបន់ និង​ជាស​កល ដែលជា​កត្តា​នាំ​ឲ្យ​យើង​ត្រូវខិតខំ​រួបរួមគ្នា ដើម្បី​ជម្រុញ​កំណើនសេដ្ឋកិច្ច និង​ការចែករំលែក​ផ្លែផ្កា នៃ​កំណើន​នេះ ឲ្យ​បាន​កាន់តែ​ប្រសើរឡើង ក្នុង​បណ្តា​ប្រទេស ជា​សមាជិក​អាស៊ាន ពិសេស​លើ ផ្នែក​របប​សន្តិសុខ​សង្គម​។​

​ក្នុងឱកាស​នោះ លោក​អគ្គនាយក បាន​វាយតម្លៃ​ខ្ពស់ ចំពោះ​អង្គភាព​សន្តិសុខ​សង្គម ជា​សមាជិក​នៃ សមាគម​សន្តិសុខ​សង្គម​អាស៊ាន (ASSA)​ទាំងអស់ និង​អង្គការ​ជាតិ​-​អន្តរជាតិ ដែល​បាន​គាំទ្រ និង​ផ្តល់នូវ​កិច្ចសហការ​កន្លងមក លើ​វិស័យ សន្តិសុខ​សង្គម ក៏ដូចជា​ទៅ​អនាគត ក្នុងការ​ចូលរួមចំណែក ចែករំលែក​ចំណេះដឹង និង​បទពិសោធន៍ គ្នា​ទៅវិញទៅមក សម្រាប់​ការអភិវឌ្ឍ​ប្រទេស ក្រោម​បាវចនា “​ចក្ខុវិស័យ​តែមួយ អត្តសញ្ញាណ​តែមួយ សហគមន៍​តែមួយ (One vision, One Identity, One Community)”​។​

​តាមរយៈ​នៃ​កិច្ចប្រជុំ​នេះ លោក សំណូមពរ​ដល់ សមាជិក​ទាំងមូល សូម​ចូលរួម​ចែករំលែក ផ្តល់នូវ​បទពិសោធន៍ ផ្នែក​សន្តិសុខ​សង្គម ពីគ្នា​ទៅវិញទៅមក ក្នុងនាម​ជា សមាជិក​អង្គភាព​សន្តិសុខ​សង្គម នៃ​បណ្តា​ប្រទេស​នីមួយៗ ក្នុងការ​អនុវត្ត​ទទួល បាន​ជោគជ័យ កន្លងមក ដើម្បី​ជា​ធាតុ​ចូល សម្រាប់​ការអភិវឌ្ឍ​បន្ថែម នូវ​វិស័យ​សន្តិសុខ​សង្គម​របស់ខ្លួន ឲ្យ​កាន់តែ​មានការ​អភិវឌ្ឍ​បន្ថែមទៀត សម្រាប់​ប្រទេស ដែលមាន​ការអភិវឌ្ឍ​តិច ឲ្យ​មានការ​អភិវឌ្ឍ កាន់តែច្រើន​។​

​សូមបញ្ជាក់ថា មុន​បើក​ដំណើរការ កិច្ចប្រជុំ​ក្រុមប្រឹក្សាភិបាល នៃ​សមាគម​សន្តិសុខ​សង្គម​អាស៊ាន (ASSA) នា​ព្រឹក​នេះ លោក Haji Omar bin Mohd. Dali ប្រធាន​សមាគម​សន្តិសុខ​សង្គម​អាស៊ាន (ASSA) និង​ជានា​យក​នៃ​អង្គភាព ETF ប្រទេស​ព្រុយ​ណេ ដា​រ៉ូ​ហ្សា​ឡា​ម បាន​ថ្លែង តាមរយៈ​ប្រព័ន្ធ​វីដេអូ ដែលមាន​ខ្លឹមសារ​ថាៈ នេះ​គឺជា​ថ្ងៃ​ប្រវត្តិសាស្ត្រ និង​ជា​លើក​ទី​១ ដែល​យើង​មិន​ធ្លាប់​ជួបប្រទះ​ពីមុន ដែល​បាន​បើក​កិច្ចប្រជុំ ក្រុមប្រឹក្សាភិបាល នៃ​សមាគម​សន្តិសុខ​សង្គម​អាស៊ាន (ASSA) តាមរយៈ​ប្រព័ន្ធ​វីដេអូ​។ លោក​ពិតជា​សោកស្តាយ​ខ្លាំងណាស់ ដែល​មិនបាន​មកដល់​ផ្ទាល់ នៃ​ទឹកដី​ទីក្រុង​អង្គរ ដ៏​អច្ឆរិយ​មួយ​នេះ​៕/V​

ទីតាំងផ្សាយពាណិជ្ជកម្ម

- Advertisment -



Most Popular