ដោយ: សុផល / ភ្នំពេញ: ក្រសួងសាធារណការ និងដឹកជញ្ជូន បានជម្រាបជូនដំណឹងដល់ម្ចាស់ក្រុមហ៊ុន ដឹកជញ្ជូនតាមនាវា ម្ចាស់នាវា អ្នកបើកបរនាវា នាវិក និងបងប្អូនប្រជានេសាទទាំងអស់ថា៖ បច្ចុប្បន្នស្ថានភាពអាកាសធាតុនៅខេត្តតំបន់ឆ្នេរប្រទេសកម្ពុជា កំពុងមានខ្យល់បក់បោកខ្លាំង និងរលក សមុទ្រខ្ពស់ៗដែលអាចបង្កឲ្យមានគ្រោះថ្នាក់ដល់អាយុជីវិត និងខូចខាតទ្រព្យសម្បត្តិ។
ក្រសួងសាធារណការ និងដឹកជញ្ជូនសង្កេតឃើញថា កន្លងមកមានម្ចាស់ទូកមួយចំនួនតូចពុំបានចូលរួមអនុវត្តទៅតាមការណែនាំ របស់សមត្ថកិច្ចស្តីពីបញ្ហាអាកាសធាតុឡើយ ដូច្នេះ ក្រសួងសូមធ្វើការអំពាវនាវដល់ម្ចាស់ក្រុមហ៊ុនដឹកជញ្ជូន តាមនាវា ម្ចាស់នាវា អ្នកបើកបរនាវា នាវិក និងបងប្អូនប្រជានេសាទទាំងអស់ ឲ្យបង្កើនការយកចិត្តទុកដាក់ ប្រុងប្រយ័ត្នខ្ពស់ ដោយបំពាក់ឧបករណ៍សុវត្ថិភាពឲ្យបានគ្រប់គ្រាន់ទៅតាមចំនួនអ្នកដំណើរដែលមាន ដូចជា អាវពោង ពោងកង ពោងសង្គ្រោះ ខ្សែពួរ ។ល។ និងត្រូវតាមដានលើបញ្ហាប្រែប្រួលអាកាសធាតុនេះ ឲ្យបានគ្រប់គ្រាន់ ដោយមិនត្រូវចេញទៅឆ្ងាយ ពីច្រាំងនៅពេលមានរលកធំៗ និងមានអាកាសធាតុមិនល្អ ឡើយ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ ព្រមទាំងចូលរួមអនុវត្តឲ្យបានល្អទៅតាមការផ្សព្វផ្សាយ ឬការណែនាំរបស់សមត្ថកិច្ចស្តីពីបញ្ហាអាកាសធាតុនេះ។
ក្រសួងសាធារណការ និងដឹកជញ្ជូន សង្ឃឹមជឿជាក់យ៉ាងមុតមាំថា ម្ចាស់ក្រុមហ៊ុនដឹកជញ្ជូនតាមនាវា ម្ចាស់នាវា អ្នកបើកបរនាវា នាវិក និងបងប្អូនប្រជានេសាទទាំងអស់ នឹងចូលរួមសហការអនុវត្តឲ្យមាន ប្រសិទ្ធភាព និងទទួលបានលទ្ធផលល្អប្រសើរ៕
