Home ព័ត៌មានជាតិ នយោបាយ សិទ្ធិមនុស្ស ...

សិទ្ធិមនុស្ស នៅ​កម្ពុជា​!

ដោយ​: ម៉េង​ឆៃ​/ ភ្នំពេញ​: ពិភពលោក ប្រារព្ធ​ពិធី​អបអរសាទរ​ទិវា​សិទ្ធិមនុស្ស​អន្តរជាតិ នៅ​ថ្ងៃទី​១០ ខែធ្នូ ដែល​នៅ​ឆ្នាំនេះ ផ្ដោតលើ​ការធានា​យ៉ាងណា​ឱ្យ​សិទ្ធិមនុស្ស ត្រូវបាន​ចាត់ទុកថា ជា​អាទិភាព​ស្នូល​នៃ​រាល់​កិច្ចខិតខំ​ប្រឹងប្រែង​ទាំងអស់ ដើម្បី​កសាង​ឡើងវិញ​ឱ្យ​រឹតតែ​ប្រសើរ​ពី​ការឆ្លង​រាលដាល​ជាស​កល​នៃ​ជំងឺ​កូ​វីដ​-១៩​។​ចំណែក​នៅ​កម្ពុជា អង្គការសហប្រជាជាតិ បានប្រកាស​អបអរសាទ​រ​ទិវា​សិទ្ធិមនុស្ស​អន្តរជាតិ ជាមួយនឹង​ការផ្ដោត​ការយកចិត្តទុកដាក់​លើ​សិទ្ធិ ក្នុងការ​ចូលរួម​រប​ស់​យុវជន​កម្ពុជា​។ ប្រធានបទ​នេះ ឆ្លើយតប​ចំពោះ​បំណងប្រាថ្នា​របស់​យុវជន​កម្ពុជា ដែល​ចង់​ចូលរួម ក្នុង​កិច្ចខិតខំ​ប្រឹងប្រែង​នានា ដើម្បី​កសាង​អនាគត ដែល​ពួកគេ​ចង់បាន​។​

​យ៉ាងណាក៏ដោយ ស្ថានភាព​សិទ្ធិមនុស្ស​នៅ​កម្ពុជា នៅតែ​ត្រូវបាន​បកស្រាយ​ផ្សេងគ្នា​រវាង​សង្គម​ស៊ីវិល និង​រាជរដ្ឋាភិបាល​។ ក្រុម​សកម្មជន​ខាង​សិទ្ធិមនុស្ស​មួយចំនួន លើកឡើងថា សិទ្ធិមនុស្ស គឺជា​មូលដ្ឋានគ្រឹះ​នៃ​សន្តិភាព ប្រជាធិបតេយ្យ និង​ការអភិវឌ្ឍ​។

ម្យ៉ាងទៀត សកម្មជន​សង្គម​ស៊ីវិល​មួយចំនួន ក៏​លើកឡើង​ពី​ការធ្លាក់ចុះ​នៃ​ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​កម្ពុជា ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ​មាន​ជាអាទិ​ការបំភិតបំភ័យ​និង​បង្ក្រាប​លើ​ក្រុម​អ្នកការពារ​សិ​ទិ្ធ​មនុស្ស​និង​សកម្មជន​បរិស្ថាន​វ័យក្មេង​ជាដើម​។​
​ក្រុម​សកម្មជន​សិទ្ធិមនុស្ស​នៅ​កម្ពុជា​បានស្នើ​សុំឱ្យ​អាជ្ញាធរ​រាជរដ្ឋាភិបាល​កម្ពុជា​ធានា​នូវ​ការគោរព​សិ​ទិ្ធ​សេរី​ភាពជា​មូលដ្ឋាន​របស់​ប្រជាពលរដ្ឋ​ខ្មែរ ក្នុងការ​តស៊ូ​មតិ​ដោយ​អហិង្សា ដើម្បី​សិ​ទិ្ធ​របស់​អ្នក​ទាំងនោះ ក្រុមគ្រួសារ​របស់​ពួកគេ និង​សហគមន៍ ដែល​អ្នក​ទាំងនោះ រស់នៅ​។​

​ប៉ុន្តែ​រាជរដ្ឋាភិបាល​វិញ យល់ឃើញ​ផ្ទុយ​ពីនេះ​។ នោះ​គឺ​បើ​គ្មាន​សន្តិភាព​ទេ កុំ​និយាយ​ឲ្យ​សោះ​ពី​ការគោរព​សិទ្ធិមនុស្ស និង​ការអភិវឌ្ឍន៍​។ រាជរដ្ឋាភិបាល ចាត់ទុកថា ការលើកឡើង​របស់​ម​ន្ត្រី​អង្គការ​សង្គម​ស៊ីវិល និង​អតីត​គណបក្សប្រឆាំង មិន​បង្ហាញ​ពី​ស្ថានភាព​ពិត​នៅ​កម្ពុជា​ឡើយ​។

​រាជរដ្ឋាភិបាល លើកឡើងថា សិទ្ធិមនុស្ស នៅ​កម្ពុជា ត្រូវបាន​ការពារ​ដោយ​ច្បាប់ ហើយ​ការដឹកនាំ​ប្រទេស ក៏​ពឹង​ផ្អែកលើ​ច្បាប់​ដែរ​។ រដ្ឋាភិបាល ពុំបាន​យក​ច្បាប់ ទៅ​កាត់បន្ថយ​សិទ្ធិ​ប្រជាពលរដ្ឋ​ឡើយ​។ ក្នុងនោះ ការចាប់ខ្លួន​អ្នក​តវ៉ា​កន្លងមក ក៏​ដោយសារតែ​អ្នក​ទាំងនោះ ធ្វើ​ខុសច្បាប់​ប៉ុណ្ណោះ​។ ម្យ៉ាង​ការអនុវត្ត​ច្បាប់​នេះ ដើម្បី​ថែរក្សា​ស្ថិរភាព សន្តិសុខ និង​សន្តិភាព​សម្រាប់​សង្គម​ក​ម្ពុ​ជា​ទាំងមូល​តែប៉ុណ្ណោះ​។​

រូបភាពអនុស្សាវរីយ៍កម្មវិធីសិទ្ធិមនុស្សអន្តរជាតិ១០ ធ្នូ នាពេលកន្លងមក!ឆ្នាំនេះ គណៈកម្មាធិការ​សិទ្ធិ​មនុស្សកម្ពុជា មិនបានប្រារព្ធពិធីជួបជុំគ្នាដូចរាល់ឆ្នាំនោះទេ ដោយសារស្ថានភាពខូវីដ១៩​(រូបថតផេកលោក ជិនម៉ាលីនរដ្ឋលេខាធិការក្រសួងយុត្តិធម៌)

​យ៉ាងណាក៏ដោយ ថ្ងៃ​១០​ធ្នូ ទិវា​សិទ្ធិមនុស្ស​អន្តរជាតិ នៅ​ឆ្នាំនេះ គឺ​ត្រូវបាន​រាជរដ្ឋាភិបាល ដក​ចេញពី​ប្រតិទិន​ឈប់សម្រាក​នៅ​កម្ពុជា​។ នោះ​គឺ​មកពី​ថ្ងៃ​បុណ្យជាតិ​ច្រើន​ថ្ងៃ​ពេក នៅ​កម្ពុជា ដែល​ក្រុមហ៊ុន​អ្នកវិនិយោគ ស្នើសុំ​រាជរដ្ឋាភិបាល កាត់បន្ថយ​។ ក្រៅពី​ទិវា​សិទ្ធិមនុស្ស​អន្តរជាតិ ថ្ងៃ​១០​ធ្នូ រាជរដ្ឋាភិបាល ក៏បាន​លុបចោល​ថ្ងៃបុណ្យ​ជាតិ ៥​ថ្ងៃ​ទៀត ដោយ​អនុវត្ត​ពី​ឆ្នាំ​២០២០​នេះ​តទៅ​។​
​ពិតណាស់ ការចូលរួម​របស់​ស​ង្គ​ម​ស៊ីវិល ប្រៀប​បីដូច​ជា​ឈាម ដែល​ទ្រទ្រង់​ដល់​ជីវិត​នៃ​លទ្ធិប្រជាធិបតេយ្យ និង​សង្គម ឱ្យមាន​ភាពរឹងមាំ​។ នៅពេលដែល​ច្រក​សង្គម​ស៊ីវិល មាន​លំហូរ​ដោយ​សេរី នោះ​មានន័យថា គេ​មាន​ការជជែក​វែកញែក ដែល​រស់​រវើក មាន​សេរីភាព​ខាង​គំនិត និង​មតិយោបល់ ព្រមទាំង​មានការ​ចូលរួម​របស់​សាធារណជន នៅក្នុង​ការតាក់តែង​គោលនយោបាយ​។​

​ក៏ប៉ុន្តែ​សម្រាប់​រាជរដ្ឋាភិបាល ឲ្យ​តែ​សកម្មភាព​ទាំងឡាយណា​របស់​សង្គម​ស៊ីវិល និង​ប្រជាពលរដ្ឋ ធ្វើឡើង​ដោយ​ស្របច្បាប់ នោះ​មិនមាន​ការរារាំង និង​ចាប់ខ្លួន​ឡើយ​។ បើ​សង្គមជាតិ បែកបាក់ មាន​សង្គ្រាម​ជាថ្មី​នោះ តើ​សិទ្ធិមនុស្ស និង​លទ្ធិប្រជាធិបតេយ្យ កើតមាន​តាមរបៀប​ណា​? ដូច្នេះ​មុននឹង​និយាយ​ដល់​សិទ្ធិមនុស្ស និង​លទ្ធិប្រជាធិបតេយ្យ គឺ​ដាច់ខាត ត្រូវ​ថែរក្សា​សន្តិភាព ដែល​ធានា​ដល់​សិទ្ធិ​រស់រានមានជីវិត​ដំបូង​គេ សម្រាប់​មនុស្សជាតិ​យើង​៕​សរន

ទីតាំងផ្សាយពាណិជ្ជកម្ម

- Advertisment -

Most Popular