​អាជ្ញាធរ និង​មន្ត្រី​ជំនាញ ចុះ​ពិនិត្យ​អាជីវកម្ម បក​សាច់​ក្តាម​

ដោយៈ ប​.​ខុន / ភ្នំពេញៈ អាជ្ញាធរខេត្ត​ព្រះសីហនុ និង​មន្ត្រី​ជំនាញ​កសិកម្ម រួមជាមួយ​ដៃគូ​អភិវឌ្ឍន៍ ចុះ​ពិនិត្យ​បណ្តុំ​អាជីវកម្ម ចិញ្ចឹម​ត្រី​អណ្តែង បណ្តុំ​អាជីវកម្ម​បក​ក្តាម និង​ប្រមូល​ទិញ​សាច់​ក្តាម នៅ​ស្រុក​ព្រៃនប់ ដែល​កំពុង​ចាប់ផ្តើម ប្រមូល​ផល និង​ធ្វើ​អាជីវកម្ម​។​

​លោក នេន ចំរើន ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្ត​ព្រះសីហនុ បាន​ប្រាប់​ឱ្យ​រស្មី​កម្ពុជា​ដឹង នៅ​ថ្ងៃទី​១០ ខែធ្នូ ឆ្នាំ​២០២០ ថាៈ កាលពី​ថ្ងៃទី​៩ ធ្នូ លោក (​នេន ចំរើន​) និង​លោក គង់ វិ​តាណៈ អភិបាលរង ខេត្ត​ព្រះសីហនុ តំណាងឱ្យ​លោក គួច ចំរើន អភិបាលខេត្ត​ព្រះសីហនុ រួមជាមួយ​មន្ត្រី​ជំនាញ និង​ប្រធាន​ក្រុមទី​ប្រឹក្សា Aspire ចុះ​ពិនិត្យមើល ការប្រមូល​ផល​ស្រូវ របស់​កសិករ នៅ​ឃុំ​ទឹកល្អក់ និង​ពិនិត្យមើល​បណ្តុំ អាជីវកម្ម​ចិញ្ចឹម​ត្រី នៅ​ឃុំ​សាមគ្គី​, បណ្តុំ​អាជីវក​បក​ក្តាម និង​បណ្តុំ​អាជីវកម្ម​ចិញ្ចឹម​មាន់ នៅ​ឃុំ​ទឹកថ្លា ក្នុងស្រុក​ព្រៃនប់​។​

​មន្ត្រី​ខាងលើ បានបញ្ជាក់​ថាៈ បណ្តុំ​អាជីវកម្ម​ចិញ្ចឹម​ត្រី​អណ្តែង មាន ៦៣ គ្រួសារ ក្នុងនេះ​មាន​ចំនួន ៦ គ្រួសារ បាន​ប្រមូល​ផល​វគ្គ​ទី​១ និង​បានដាក់​កូន​ត្រី សារជាថ្មី​ម្តងទៀត​វគ្គ​ទី​២​។ កសិករ​ចំនួន ៥៧ គ្រួសារ​ទៀត ប្រមូល​ផល​វគ្គ​ទី​១ បាន​ប្រមាណ​ជា ៥០ ភាគរយ ដោយមាន​តម្លៃ​ចន្លោះ​ពី ៧.០០០ រៀល ទៅ ៨.០០០ រៀល ក្នុង​មួយ​គីឡូក្រាម​។​

​ចំពោះ​បណ្តុំ​អាជីវកម្ម​បក​ក្តាម និង​ប្រមូល​ទិញ​សាច់​ក្តាម លោក នេន ចំរើន បាន​និយាយថាៈ មាន​ចំនួន ៤៥ គ្រួសារ ប្រមូល​សាច់​ក្តាម បានជា​មធ្យម ចន្លោះ​ពី ៧០ ទៅ ៨០ គីឡូក្រាម ក្នុង​មួយថ្ងៃ ដោយ​សាច់​ក្តាម​លេខ​១ មានតម្លៃ ១០ ម៉ឺន​រៀល និង​លេខ​២ តម្លៃ ២ ម៉ឺន​រៀល ផ្តល់​ឱ្យទៅ​ឈ្មួញ នៅ​ខេត្តកោះកុង​៕/V​

ទីតាំងផ្សាយពាណិជ្ជកម្ម

- Advertisment -



Most Popular