Home ព័ត៌មានជាតិ សង្គម នៅ​កម្ពុជា​តើ...

នៅ​កម្ពុជា​តើ​ជន​ពិការភាព បែបណា​ដែល​អាច​ទទួល​ប័ណ្ណបើកបរ​?

ដោយៈ​ញ៉ែម​សុផល​/​ភ្នំពេញៈក្រសួង​ចំនួន​បី​គឺ​ក្រសួង​សាធារណការ​និង​ដឹកជញ្ជូន ក្រសួង​សង្គមកិច្ច អតីត​យុទ្ធជន​និង​យុវ​នីតិ សម្បទា​និង​ក្រសួងសុខាភិបាល​បានចេញ​ប្រកាស​អន្តរក្រសួង​មួយ​ស្តីពី​លក្ខខណ្ឌ​នៃ​ការចេញ​ប័ណ្ណ​បើកបរ​សម្រាប់​ជន​មាន​ពិការភាព​។​

ប្រកាស​នេះ​បាន​ត្រូវរ​ចុះហត្ថលេខា​កាលពី​ថ្ងៃទី​៣​ធ្នូ​កន្លង​ទៅដោយ​រដ្ឋមន្ត្រី​ទាំងបី​ក្រសួង​គឺ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួង​សាធារណការ​និង​ដឹកជញ្ជូន លោក​សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួង​សុខាភិបាល​និង​លោក វង សូត ក្រសួង​សង្គមកិច្ច អតីតយុទ្ធជន​និង​យុវនីតិសម្បទា​។​

​ប្រកាស​អន្តរក្រសួង​ដែលមាន​១២​មាត្រា​នេះ​មាន​គោលបំណង​លើកកម្ពស់​សិទ្ធិ​ជន​មាន​ពិការភាព​ដែលមាន​សមត្ថភាព​អាច​បើកបរ​យានយន្ត​នៅក្នុង​ព្រះរាជាណាចក្រ​កម្ពុជា​និង​មាន​មាន​វិសាលភាព​អនុវត្ត​ចំពោះ​ជន​មាន​ពិការភាព​ដែលមាន​បំណង​បើកបរ​យានយន្ត នៅ​កម្ពុជា​។​

​ប្រកាស​នេះ​មាន​គោលដៅ​កំណត់​លក្ខខណ្ឌ​នៃ​ការចេញ​ប័ណ្ណ​បើកបរ​សម្រាប់​ជន​មាន​ពិការភាព​ដូចជា​ ប្រភេទ​ជន​មាន​ពិការភាព​ដែល​អនុញ្ញាតឱ្យ​បើកបរ​,​ប្រភេទ​យានយន្ត​សម្រាប់​ជន​មាន​ពិការភាព​បើកបរ​និង ផ្នែក​នៃ​យានយន្ត​ដែល​ត្រូវ​កែច្នៃ​។​

ជនពិការភាពអាចនឹងមានសិទ្ធបើកបរបានទៅតាមប្រភេទពិការភាពនិងយានយន្ត(រូបឯកសារ)

ប្រភេទ​ជន​មាន​ពិការភាព ត្រូវបាន​ចែកជា​៣(​បី​)​កម្រិត ដូចខាងក្រោម ៖
-​កម្រិត​ទី​១ៈ​ជន​មាន​ពិការភាព​កម្រិត​ធ្ងន់ធ្ង​រ​ជាទូទៅ​គ្មាន​សមត្ថភាព​ប្រឡង​យក​ប័ណ្ណ​បើកបរ​យានយន្ត​ឡើយ​ប៉ុន្តែ​លើកលែង​ករណី​មួយចំនួន​ប៉ុណ្ណោះ​ដែល​ត្រូវការ​ការបណ្តុះបណ្តាល​ហ្វឹកហ្វឺន​ថែទាំ​ចិត្ត​សង្គម​និង​ស្តារ​កាយសម្បទា​ជាមុន​ទើប​អាចមាន​សមត្ថភាព​ប្រឡង​យក​ប័ណ្ណ​បើកបរ​យានយន្ត​កែច្នៃ​បាន​
-​កម្រិត​ទី​២៖​ជន​មាន​ពិការភាព​កម្រិត​មធ្យម​ដែលមាន​សមត្ថភាព​ប្រឡង​យក​ប័ណ្ណ​បើកបរ​និង​អនុញ្ញាតឱ្យ​បើកបរ​ដោយ​តម្រូវឱ្យ​កែច្នៃ​ផ្នែក​នៃ​យានយន្ត​
-​កម្រិត​ទី​៣៖​ជន​មាន​ពិការភាព​កម្រិត​ស្រាល​ដែលមាន​សមត្ថភាព​ប្រឡង​យក​ប័ណ្ណ​បើកបរ​និង​អនុញ្ញាតឱ្យ​បើកបរ​ដោយ​មិនចាំបាច់​កែច្នៃ​យានយន្ត​។​

​សូមជម្រាបថា​​ប្រភេទ​យានយន្ត​សម្រាប់​ជន​មាន​ពិការភាព​ដែល​តម្រូវឱ្យមាន​ប័ណ្ណ​បើកបរ មានដូចជា ៖ ១- ទោចក្រយានយន្ត ដែលមាន​ទំហំ​ស៊ីឡាំង​លើសពី​១២៥(​មួយរយ​ម្ភៃ​ប្រាំ​)​សង់ទីម៉ែត្រ​គូប​ឬ​មាន​ថាមពល​អគ្គិសនី​លើសពី​១១(​ដប់​មួយ​)​គីឡូវ៉ាត់​។​
២- ទោចក្រយានយន្ត​សណ្តោង​រ៉ឺម៉ក ត្រីចក្រយានយន្ត និង​ម៉ូតូ​កង់​បួន​។​៣-​រថយន្ត​ដឹក​អ្នកដំណើរ​មិន​លើសពី​៩(​ប្រាំបួន​)​នាក់ ដោយ​គិត​ទាំង​អ្នកបើកបរ និង​រថយន្ត​ដឹកទំនិញ​ដែលមាន​ទម្ងន់​សរុប​អតិបរមា​មិន​លើសពី​៣,៥(​បី​ស្លៀ​ស​ប្រាំ​)​តោន​។​

​ផ្នែក​សំខាន់ៗ​នៃ​យានយន្ត​ដែល​ត្រូវ​កែច្នៃ មានដូចជា ហ្វ្រាំង ហ្គា​រ ចង្កឹះ​លេខ ដៃចង្កូត កៅអី​សម្រាប់​រថយន្ត និង​កែច្នៃ​ពី​កង់​ពីរ ទៅ​កង់​បី​សម្រាប់ទោ​ចក្រយានយន្ត ត្រូវមាន​ភាពសមស្រប បង្កលក្ខណៈ​ងាយស្រួល និង​ធានា​សុវត្ថិភាព​។​

​នីតិវិធី​នៃ​ការប្រឡង​យក​ប័ណ្ណ​បើកបរ​សម្រាប់​ជន​មាន​ពិការភាព​ដែលជា​ប្រជាពលរដ្ឋ​ខ្មែរ ឬ​ជនបរទេស​ត្រូវ​អនុវត្ត ដូច​ការប្រឡង​យក​ប័ណ្ណ​បើកបរ​ទូទៅ​ដែរ​។ ដោយឡែក​ការប្រឡង​អនុវត្ត​បើកបរ​សម្រាប់​បេក្ខជន​ដែលមាន ពិការភាព​កម្រិត​ទី​២ ត្រូវមាន​យានយន្ត​ស្របតាម​ប្រភេទ​នៃ​ការ​ភាព​សម្រាប់​មក​ប្រឡង​អនុវត្ត​បើកបរ​។​

​ចំណែក​ការដាក់​ពាក្យសុំ​ប្រឡង​យក​ប័ណ្ណ​បើកបរ​ជាតិ​សម្រាប់​ជន​មាន​ពិការភាព​ត្រូវ​ធ្វើតាម​ប្រព័ន្ធ​ស្វ័យ​ប្រវត្តិកម្ម​ផ្តល់​បណ្ណ​បើកបរ​យានយន្ត​ដែលមាន​អាសយដ្ឋាន​គេហទំព័រ​https://driverlicense.mpwt.gov.kh​ឬ​ទៅ​ទីតាំង​ផ្តល់​សេវា សាធារណៈ​ដែល​កំណត់ដោយ​ក្រសួង​សាធារណការ និង​ដឹកជញ្ជូន តាម​គំនូសបំព្រួញ​អំពី​ដំណើរ​ការចេញ បណ្ណ​បើកបរ​សម្រាប់​ជន​មាន​ពិការភាព ដូច​មានចែង​ក្នុង​ឧបសម្ព័ន្ធ​ទី​២ នៃ​ប្រកាស​នេះ ឬ​ទៅ​អង្គភាព​ច្រកចេញចូល​តែមួយ​នៃ​រដ្ឋបាល​រាជធានី ខេត្ត​។​

​ប្រកាស​អន្តរក្រសួង​នេះ បានឱ្យដឹង​ទៀតថា​៖​សុពលភាព​បណ្ណ​បើកបរ​សម្រាប់​ជន​មាន​ពិការ​ភាពជា​ប្រជាពល​រដ្ឋ​ខ្មែរ ឬ​ជនបរទេស ដែល​បាន​ប្រឡង​ជាប់​មាន សុពលភាព​រយៈពេល​១០(​ដប់​)​ឆ្នាំ ដូច​ប្រជាពលរដ្ឋ​ទូទៅ​ដែរ​។​សុពលភាព​បណ្ណ​បើកបរ​សម្រាប់​ជន​មាន​ពិការ​ភាពជា​ជនបរទេស ដែល​ត្រូវ​ប្តូរ​មក​បណ្ណ​បើកបរ​កម្ពុជា មាន សុពល​ភាព​រយៈពេល ០១(​មួយ​)​ឆ្នាំ​ម្តង​។​​រីឯ​នីតិវិធី​នៃ​ការប្តូរ និង​ទុតិយតា​បណ្ណ​បើកបរ​សម្រាប់​ជន​មាន​ពិការ​ភាព​​ដែលជា​ប្រជាពលរដ្ឋ​ខ្មែរ ឬ​ជនបរទេស ត្រូវអនុវត្ត​ដូច​ប្រជាពលរដ្ឋ​ទូទៅ​ដែរ​។

​កម្រៃ​សេវាសាធារណៈ​ក្នុងការ​ផ្តល់​បណ្ណ​បើកបរ​ជាតិ​សម្រាប់​ជន​មាន​ពិការភាព ត្រូវ​កំណត់ដោយ​ប្រកាស អន្តរក្រសួង​រវាងរ​ដ្ឋ​មន្ត្រី​ក្រសួង​សេដ្ឋកិច្ច និង​ហិរញ្ញវត្ថុ និង​រដ្ឋមន្ត្រីក្រសួង​សាធារណការ និង​ដឹកជញ្ជូន​៕​សរន​

ទីតាំងផ្សាយពាណិជ្ជកម្ម

- Advertisment -

Most Popular