Home ព័ត៌មានអន្តរជាតិ វ៉ាក់សាំង​កូវ...

វ៉ាក់សាំង​កូវី​ដ​១៩​របស់​ក្រុមហ៊ុន Pfizer ប្រឈម​ឧបសគ្គ​ចុង​ក្រោយ​មួយ

​ប្រែ​សម្រួល : កញ្ញា​ដា​លី​ស​/​វ៉ាស៊ីនតោន ៖ វ៉ាក់សាំង​កូវី​ដ​១៩​របស់​ក្រុមហ៊ុន Pfizer ប្រឈម​នឹង​ឧបសគ្គ​ចុង​ក្រោយ​មួយ មុន​ពេល​វា​អាច​ទទួលបាន​ភ្លើង​ខៀវ​លើកដំបូង​នៅ​សហរដ្ឋ​អាម៉េរិក នោះ​គឺ ក្រុម​អ្នកជំនាញ​ដែល​នឹង​ពិនិត្យ​ទិន្នន័យ​របស់​ក្រុមហ៊ុន​នេះ​ដើម្បី​រក​មើល​សញ្ញា​ព្រមាន​ពណ៌​ក្រហម​។​

​ការប្រជុំ​ថ្ងៃ​ព្រហស្បតិ៍​នេះ​របស់​ក្រុមប្រឹក្សា​វ៉ាក់សាំង​នៃ​រដ្ឋបាល​ចំណីអាហារ​និង​ឪ​ស​ថ (FDA) ទំនង​ជា​ជំហាន​ចុង​ក្រោយ​មុនពេល​ការសម្រេចចិត្ត​ណាមួយ​របស់​សហរដ្ឋ​អាម៉េរិក​ក្នុង​ការចាប់ផ្តើម​ចែក​​ចាយ​វ៉ាក់សាំង​រាប់​លាន​ដូស ដែល​បាន​បង្ហាញ​ពី​ការការពារ​យ៉ាង​ខ្លាំង​ប្រឆាំង​នឹង​មេរោគ​កូរ៉ូណា​។​

​ក្រុមប្រឹក្សា​វ៉ាក់សាំង​របស់ FDA មាន​មុខងារ​ដូចជា​តុលាការ​វិទ្យាសាស្ត្រ​អ៊ីចឹង​ដែល​នឹង​ទាញ​យក​ផ្នែក​ខ្លះ​នៃ​ទិន្នន័យ​យក​មក​ជជែក​ដេញដោល​គ្នា​ជា​សាធារណៈ​និង​ផ្សាយ​ផ្ទាល់​ទៀតផង​ដើម្បី​សម្រេច​​ថា​តើ​វ៉ាក់សាំង​មាន​សុវត្ថិភាព​និង​ប្រសិទ្ធភាព​គ្រប់គ្រាន់​ដើម្បី​ប្រើប្រាស់​បន្ទាន់​ឬ​អត់​។ អ្នកជំនាញ​មិនមែន​រដ្ឋាភិបាល​ទាំងនោះ​មាន​ឯកទេស​ខាង​អភិវឌ្ឍ​វ៉ាក់សាំង ជំងឺឆ្លង និង ស្ថិតិ​វេជ្ជសាស្ត្រ​។ រដ្ឋបាល FDA រំពឹង​អនុវត្តតាម​ដំបូន្មាន​របស់​គណៈកម្មាធិកា​រ​ទោះបីជា​គេ​មិន​តម្រូវ​ឱ្យ​ធ្វើចឹងក៏​ដោយ​។​

​សេចក្តីសម្រេច​របស់ FDA នឹង​ធ្វើឡើង ខណៈពេល​ដែល​មេរោគ​កូរ៉ូ​ណាបន្ត​ឆ្លង​រាលដាល​ពាសពេញ​ពិភព​លោក ដោយ​ឆក់យក​ជីវិត​មនុស្ស​ច្រើន​ជាង ១,៥ លាន​នាក់ ក្នុងនោះ​មាន​ជាង ២៨៩.០០០ នាក់​នៅ​សហរដ្ឋ​អាម៉េរិក​។​

​ការប្រជុំ​នេះ​មានការ​ពន្យារ​ពេល​បន្តិច​ពីព្រោះ​មាន​ការព្រមាន​ពី​មន្ត្រី​អង់គ្លេស​ថា​មនុស្ស​ដែល​មាន​ប្រវត្តិ​ប្រតិកម្ម​អាឡែរ​ស៊ី​ធ្ងន់ធ្ងរ​មិនគួរចា​ក់​វ៉ាក់សាំង​នេះទេ​។ ​មន្ត្រី​រដ្ឋាភិបាល​នៅ​ទី​នោះ​កំពុង​ធ្វើ​ការស៊ើបអង្កេត​លើ​របាយការណ៍​ចំនួន ២ អំពី​ប្រតិកម្ម​ធ្ងន់ធ្ងរ នៅ​ពេល​ប្រទេស​អង់់គ្លេស​ចាប់ផ្តើម​ចាក់​វ៉ាក់សាំង​ទ្រង់ទ្រាយ​ធំ​។​

​ទោះយ៉ាងណា អនុសាសន៍​វិជ្ជមាន​និង​ការអនុម័ត​យ៉ាង​លឿន​របស់​សហរដ្ឋ​អាម៉រិក​ហាក់​នឹង​កើត​ឡើង​យ៉ាង​ប្រាកដ បន្ទាប់​ពី​អ្នកវិទ្យាសាស្ត្រ​របស់ FDA​បាន​ចេញ​ការពិនិត្យ​វិជ្ជមាន​លើសលប់​លើកដំបូង​​លើ​វ៉ាក់សាំង​នេះ​កាលពី​ដើម​សប្តាហ៍​៕

ក្រុមប្រឹក្សា​វ៉ាក់សាំង​របស់ FDA នឹង​សម្រេច​ចិត្ត​ចុងក្រោយ​ថា​តើ​វ៉ាក់សាំង​របស់​ក្រុមហ៊ុន Pfizer គួរ​អនុញ្ញាត​ឱ្យ​ប្រើ​បន្ទាន់​ឬ​អត់

ទីតាំងផ្សាយពាណិជ្ជកម្ម

- Advertisment -



Most Popular