Home ព័ត៌មានជាតិ សន្តិសុខ ចាប់ខ្លួន​សកម...

ចាប់ខ្លួន​សកម្មជន​អតីត​គណបក្សប្រឆាំង ករណី​រិះគន់​រដ្ឋាភិបាល និង​រួមគំនិត​ក្បត់​

ចាប់ខ្លួន​សកម្មជន​អតីត​គណបក្សប្រឆាំង ករណី​រិះគន់​រដ្ឋាភិបាល និង​រួមគំនិត​ក្បត់​

​ដោយៈ ភ្នំ​ស្វាយ / បន្ទាយ​មាន​ជ័​យៈ សមត្ថកិច្ច​នគរបាល កាលពី​ថ្ងៃទី​៩ ខែធ្នូ ឆ្នាំ​២០២០ បាន​ចាប់ខ្លួន​គ្រូបង្រៀន​ម្នាក់ នៅ​វិទ្យាល័យ​ថ្មពួក ស្រុក​ថ្មពួក ដែល​ក៏​ជា​អតីត​សកម្មជន នៃ​អតីត​គណបក្ស​សង្គ្រោះ​ជាតិ ពាក់ព័ន្ធ​ករណី​រិះគន់​រដ្ឋាភិបាល និង​រួមគំនិត​ក្បត់ ។​

​លោក​វរសេនីយ៍ ឈឿង គឹមឈុន អធិការនគរបាល ស្រុក​ថ្មពួក បាន​ប្រាប់​កាសែត​រស្មី​កម្ពុជា ថ្ងៃទី​១០ ខែធ្នូ នេះ​ថាៈ កម្លាំង​នគរបាល​សន្តិសុខ​ខេត្ត បាន​ចាប់ខ្លួន​លោកគ្រូ រ័ត្ន សុធី មែន ។ ប៉ុន្តែ​លោក​អធិការ បាន​បង្វែរ​សំណួរ​អោយទៅ​សួរ លោក​ឧ​ត្ត​ម​សេនីយ៍​ត្រី វង្ស ប្រាថ្នា ស្នងការរង ទទួល​ផែន​សន្តិសុខ វិញ ព្រោះ​លោក បាន​ដឹកនាំ​កម្លាំង​រួម ។​

​លោក វង្ស ប្រាថ្នា មិនអាច​ទាក់ទង​បំភ្លឺ​បានទេ នៅ​ថ្ងៃទី​១០ ខែធ្នូ ។ ប៉ុន្តែ លោក អែម សុខា អភិបាលស្រុក​ថ្មពួក ក៏​ដូច​មិត្តភក្តិ​រួម​អាជីព នៅ​វិទ្យាល័យ​ថ្មពួក បាន​ប្រាប់​កាសែត​រស្មី​កម្ពុជា នា​ថ្ងៃ​ដដែល​ថាៈ ពិតជា​មានការ​ចាប់ខ្លួន លោក រ័ត្ន សុធី គ្រូបង្រៀន មុខវិជ្ជា​ភាសា​អង់គ្លេស ដែលជា​សកម្មជន អតីត​គណបក្ស​សង្គ្រោះ​ជាតិ នៅផ្ទះ​របស់​នោះ​មែន ។​

​ការចាប់ខ្លួន លោក រ័ត្ន សុធី បាន​ត្រូវគេ​ដាក់​ការសង្ស័យថា មាន​ជាប់​ពាក់ព័ន្ធ​នឹង​ការ​បង្ហោះ​សារ រិះគន់​រាជរដ្ឋាភិបាល និង​រួមគំនិត​ក្បត់ ជាមួយ​អតីត​មេដឹកនាំ អតីត​គណបក្ស​សង្គ្រោះ​ជាតិ ជា​គណបក្ស ដែល​ត្រូវ​តុលាការ​កំពូល បាន​រំលាយ ។​

​លោក​អភិបាលស្រុក បាន​បន្តថាៈ ជននេះ វា​សមតែ​នឹងត្រូវ​ចាប់ខ្លួន​ហើយ ព្រោះ​នៅ​មិន​ស្ងៀម បំផុស​បង្ហោះ​ព័ត៌មាន​បំផ្លើស រិះគន់​គ្មាន​មូលដ្ឋាន លើ​រាជរដ្ឋាភិបាល និង​អាជ្ញាធរ ។​

​ក៏ប៉ុន្តែ​នៅ​ល្ងាច ថ្ងៃទី​១០ ខែធ្នូ​នេះ ប្រភពព័ត៌មាន​នានា បានឱ្យដឹងថា បន្ទាប់ពី​បញ្ជូន​ខ្លួន ទៅ​រាជធានី​ភ្នំពេញ ដើម្បី​សួរនាំ និង​ធ្វើ​កិច្ចសន្យា លោកគ្រូ រ័ត្ន សុធី ត្រូវបាន​សមត្ថកិច្ច ដោះលែង​មកវិញហើយ ។​

​សូម​រំលឹកថា លោក រ័ត្ន សុធី ក៏មាន​ឈ្មោះ ក្នុង​បញ្ជី​សកម្មជន អតីត​គណបក្សប្រឆាំង ជាង ១០ រូប នៅ​ខេត្តបន្ទាយមានជ័យ របស់​ដីកា​បង្គាប់​អោយ​ចាប់ខ្លួន របស់​ព្រះរាជអាជ្ញា នៃ​អយ្យការ អម​សាលាដំបូង ខេត្តបន្ទាយមានជ័យ តាំង​ពីមុន​ព្រឹត្តិការណ៍ គម្រោង​មាតុភូមិនិវត្តន៍ មេខ្លោង​ឧទ្ទាម សម រង្សី និង គូកន កាល​ថ្ងៃទី​៩ ខែវិច្ឆិកា ឆ្នាំ​២០១៩ កន្លងទៅ ។ ប៉ុន្តែ ក្រោយ​ផែនការ មេ​ឧទ្ទាម​នោះ បរាជ័យ អាជ្ញាធរ រដ្ឋាភិបាល ក៏បាន​ប្រកាស​អត់ឱន ត្រា​ប្រណី ដល់​អតីត​សកម្មជន​ទាំងអស់ ដោយ​ចាត់ទុកថា ជាការ​ចាញ់បោក មេខ្លោង​របស់ខ្លួន​ប៉ុណ្ណោះ បន្ថែម​លើ​នោះ ក៏បាន​អំពាវនាវ​អោយ​ពួកគេ វិល​ពី​ទី​និរទេស មក​ផ្ទះសម្បែង​វិញ ហើយ​រស់នៅ ប្រកប​របរ​រកស៊ី ធ្វើការ​ដោយ​សុខសន្តិភាព គ្មាន​ការ​ធ្វើទុក្ខបុកម្នេញ ទៀតឡើយ​៕/V​

ទីតាំងផ្សាយពាណិជ្ជកម្ម

- Advertisment -

Most Popular