កសិករ រីករាយ​នឹង​ការដាំ​បន្លែ ដែល​ជួយ​លើកកម្ពស់​សេដ្ឋកិច្ច​គ្រួសារ​

​ដោយៈ រិ​ទ្ធិ​សែន​/​ពោធិសាត់ៈ កសិករ នៅ​ឃុំ​ស្វាយ​ហ្លួង ស្រុក​កណ្តៀង បានបង្ហាញ​នូវ ទឹកមុខ​រីករាយ​នឹង​ការដាំ​បន្លែ ដែល​ជួយ​លើកកម្ពស់​សេដ្ឋកិច្ច​គ្រួសារ របស់​ពួកគេ​ឱ្យ​កាន់ តែមាន​ជីវភាព​គ្រាន់បើ​ជាង​មុន​។​

​កសិករ​ម្នាក់ ឈ្មោះ ទេព ភា​រិ​ទ្ធ អាយុ ២៧​ឆ្នាំ រស់នៅក្នុង​ភូមិ​ជ្រែង ឃុំ​ស្វាយ​ហ្លួង​បានអោយ ដឹង នៅពេល​លោក ឡាយ វិសិដ្ឋ ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តពោធិសាត់ ដោយ​រួមជាមួយ ក្រុមមន្ត្រី​ទទួលបន្ទុក​ដំណាំ​បន្លែ ប្រចាំ​កណ្តៀង​បាន​ចុះទៅ ពិនិត្យមើល ពី​ស្ថានភាព នៃ​ការដាំ​បន្លែ របស់​ប្រជាកសិករ កាលពី​ថ្ងៃទី​១០ ខែធ្នូ ឆ្នាំ​២០២០ ថាៈ គាត់ បាន​ដាំ​ដំណាំ​ត្រសក់ នៅលើ​ផ្ទៃដី ១០ អា ហើយ​អស់​រយៈពេល ៥០ ថ្ងៃ​កន្លងមក នៅពេលនេះ ដំណាំ​ត្រសក់​របស់គាត់ កំពុងផ្ដល់​ផល​ជា​បណ្តើរៗ​ហើយ​។ បើតាម​លក្ខណៈ បច្ចេកទេស ត្រសក់​របស់គាត់ អាច​ប្រមូល​ផល​បាន នៅក្នុង​រយៈពេល ៣៥ ថ្ងៃ ទៅ ៤០ ថ្ងៃ បន្ទាប់ពី​ដាំ​រួច​។​

​ទេព ភា​រិ​ទ្ធ បាន​អោយដឹងទៀតថាៈ ការប្រមូល​ផល​ត្រសក់ អាច​បេះ​បាន​មួយថ្ងៃ ចំនួន ៥០ គ​.​ក្រ ដោយ​លក់បាន​តំលៃ ២.០០០ រៀល ក្នុង ១​គ​.​ក្រ​។ តំលៃ​នេះ ជា​តំលៃ​សមរម្យ ដែល​ធ្វើអោយ​គាត់​ពេញចិត្ត និង​ខិតខំ ក្នុង​ការដាំ ដំណាំ​ត្រសក់​នេះ ជា​បន្តទៀត​។ ក្រៅពី ដំណាំ​ត្រសក់ គាត់​មាន​ដាំ​ស្ពៃ​ក្រ​ញ៉ា​ញ់ លើ​ផ្ទៃដី ៦ អា ដែល​ឥឡូវនេះ​គាត់​កំពុង​ប្រមូល ផល ជា​បណ្តើរៗ ដោយ​លក់​នៅក្នុង​តំលៃ ២.០០០ រៀល ក្នុង​១ គ​.​ក្រ ។​

​នៅក្នុង​ឱកាស​នោះ លោក​ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ ខេត្តពោធិ៍សាត់ បាន​ជំរុញ​ដល់​កសិករ​ដាំ​បន្លែ ត្រូវ​បង្កើន​ការដាំដុះ តាម​បច្ចេកទេស​របស់ មន្ទីរ​កសិកម្ម រុក្ខាប្រមាញ់ និង​នេសាទ ដែល​បង្ហាញ​ណែនាំ ដោយ​ធ្វើយ៉ាងណា ឱ្យ​ដំណាំ​មាន​ទិន្នផល ល្អប្រសើរ ដើម្បី​បំពេញតម្រូវការ នៅលើ​ទីផ្សារ បន្ថែមទៀត និង​ដើម្បី​សម្រាប់​ទ្រទ្រង់ ជីវភាព​រស់នៅ របស់​គ្រួសារ ក្នុងអំឡុងពេល​ជំងឺ​កូ​វីដ​-១៩ កំពុង​រីក​រាលដាល ជាស​កល ធ្វើអោយប៉ះពាល់ ដល់​សេដ្ឋកិច្ចជាតិ និង​ជីវភាព​រស់នៅ​របស់ ប្រជាពលរដ្ឋ​៕​PC

ទីតាំងផ្សាយពាណិជ្ជកម្ម

- Advertisment -

Most Popular