Home ព័ត៌មានអន្តរជាតិ ញាក់សាច់​! មួ...

ញាក់សាច់​! មួយ​ថ្ងៃ​ស្លាប់​៣.០០០​នាក់​ដោយកូវី​ដ​១៩​នៅ​អាម៉េរិក​

​ប្រែ​សម្រួលៈ​វាសនា​/​វ៉ាស៊ីនតោន​៖​ការព្រមាន​បាន​កើតឡើង​ក្រោយពី​អាជ្ញាធរ​សុខាភិបាល​អាម៉េរិក​កាលពី​ថ្ងៃ​ព្រហស្បតិ៍​បាន​អះអាង​របាយការណ៍​ដ៏​សោកសៅ​មួយ​គឺ​មនុស្ស​ជាង​៣​ពាន់​នាក់​បាន​ស្លាប់​​ដោយ​ជំងឺ​កូវី​ដ​១៩​នៅ​អាម៉េរិក​នៅ​២៤​ម៉ោង​កន្លងទៅ​។​

​នាយក​មជ្ឈមណ្ឌល​គ្រប់គ្រង​និង​បង្ការ​ជំងឺ​(CDC) លោក​រ៉ូ​ប៊ឺត រេ​ដ​ហ្វៀល

​នាយក​មជ្ឈមណ្ឌល​គ្រប់គ្រង​និង​បង្ការ​ជំងឺ​(CDC) លោក​រ៉ូ​ប៊ឺត រេ​ដ​ហ្វៀល បាន​ចេញ​ការប៉ាន់ស្មាន​ដ៏​សោកសៅ​មួយ​សំរាប់​អាម៉េរិក​ដោយ​លោក​លើកឡើង​ថា យោង​តាម​និន្នាការ​បច្ចុប្បន្ន ការស្លាប់​ដោយ​​វីរុស​កូរ៉ូ​ណា​នៅ​អាម៉េរិក​ក្នុង​មួយថ្ងៃ អាច​កើន​លើស​ការស្លាប់​ក្នុង​ព្រឹត្តិការណ៍​ភេរវកម្ម​ថ្ងៃ​១១​កញ្ញា​(9/11) ឬ ការវាយប្រហារ​នៅ​កំពង់ផែ ភៀ​ល ហា​ប៊ឺរ​(Pearl Harbor)​។​

​ទើប​តែ​ថ្ងៃ​១០​ធ្នូ​ម្សិលមិញ គណៈកម្មាធិការ​ទីប្រឹក្សា​នៃ​រដ្ឋបាល​ចំណីអាហារ​និង​ឱសថ​អាម៉េរិក​(FDA) បានអនុម័ត​ការប្រើ​វ៉ាក់សាំង​Pfizer​លើ​ពលរដ្ឋ​អាម៉េរិក ទោះជា​យ៉ាងណា​អ្នកជំនាញ​ការព្យាករណ៍​​ថា​នឹង​មិន​រំពឹង​ថា​ការឆ្លង​នឹង​ធ្លាក់​ចុះ​ទេ​រហូត​ដល់​ខែ​កុម្ភៈ ទោះជា​មាន​ការចាក់​វ៉ាក់សាំង​។​

​លោក​រេ​ដ​ហ្វៀល​បាន​និយាយ​នៅក្នុង​ពិធី​ដែល​រៀបចំឡើង​ដោយ​ក្រុមប្រឹក្សា​ស្តីពី​ទំនាក់ទំនង​ការ​បរទេស​កាលពី​ថ្ងៃ​ព្រហស្បតិ៍​ថា «​យើង​ប្រហែលជា​ស្ថិត​ក្នុង​រង្វង់​ពេល​៦០​ទៅ​៩០​ថ្ងៃ​ទៀត ដែល​ការស្លាប់​ក្នុង​​មួយថ្ងៃៗ លើស​ចំនួន​ស្លាប់​ក្នុង​ព្រឹត្តិការណ៍​9/11 ឬ​Pearl Harbor»​។​

​សូមបញ្ជាក់​ថា ប្រធានាធិបតី ដូ​ណា​ល់ ត្រាំ បាន​ចុះហត្ថលេខា​លើ​បទ​បញ្ជា​ប្រតិបត្តិ​មួយ​ដោយ​អោយ​អាទិភាព​លើ​ការផ្តល់​វ៉ាក់សាំង​ប្រឆាំង​កូវី​ដ​១៩​ដល់​ពលរដ្ឋ​អាម៉េរិក​មុន​ពេល​បញ្ជូន​វា​ទៅកាន់​ប្រទេស​​ផ្សេង​ទៀត​ដែល​ត្រូវការ​វា​ដែរ​។​ត្រាំ​បាន​អះអាងថា ពលរដ្ឋ​អាម៉េរិក​នឹង​ទទួលបាន​វ៉ាក់សាំង​នៅ​យ៉ាងយូរ​ត្រឹម​ថ្ងៃ​បោះឆ្នោត​០៣ វិច្ឆិកា ឆ្នាំ​២០២០ តែ​ការសន្យា​មិន​បាន​លេចចេញ​ជា​រូបរាង​ទេ​ហើយ​បាន​ចោទ​​ប្រកាន់​ក្រុមហ៊ុន​ផលិត​Pfizer ថា​សមគំនិត​ជាមួយ​ពួក​បក្ស​ប្រជាធិបតេយ្យ​និង​FDA​ដើម្បី​ពន្យឺតការ​អនុម័យ​ប្រើ​វ៉ាក់សាំង ក្នុង​បំណង​រារាំង​ការជាប់ឆ្នោត​ឡើង​វិញ​របស់​លោក​។​

​ក្នុងពេល​ជាមួយគ្នា កិច្ចពិភាក្សា​អំពី​កញ្ចប់​ថវិកា​សង្គ្រោះ​ក្នុងអំឡុង​វិបត្តិកូ​វីដ​១៩ នៅ​ជាប់គាំង​ក្នុង​សភា អស់​ពេល​ជាង​៩​ខែ​មក​ហើយ ។​ពួក​សមាជិកសភា​មក​ពី​បក្ស​ប្រជាធិបតេយ្យ និង​ពួក​សាធារណ​​រដ្ឋ​ក្នុង​ព្រឹទ្ធសភា ខ្វែងគំនិត​គ្នា​ខ្លាំង​លើ​ទំហំ​ទឹកប្រាក់​ជំរុញ​សេដ្ឋកិច្ច​នាពេលខាងមុខ និង​របៀប​ចែកចាយ​ជំនួយ​រវាង​ពលរដ្ឋ​និង​បណ្តា​សហគ្រាស​ក្រុមហ៊ុន​។​

​តាំងពី​យូរ​មក​ហើយ​អាម៉េរិក​នាំមុខគេ​ខាង​ចំនួន​ឆ្លង​និង​អ្នក​ស្លាប់​ដោយកូវី​ដ​១៩​នៅលើ​លោក ។​យោង​តាម​សកល​វិទ្យាល័យ​Johns Hopkins University ប្រទេស​នេះ​មាន​អ្នក​ឆ្លងកូវី​ដ​១៩​សរុប ជាង​១៥,៥​លាន​នាក់ និង​យ៉ាងតិច​អ្នកជំងឺ​កូវី​ដ​១៩​ចំនួន​២៩២.០០០​បាន​ស្លាប់​៕​

ទីតាំងផ្សាយពាណិជ្ជកម្ម

- Advertisment -



Most Popular