Home ព័ត៌មានជាតិ សង្គម តេស្ដ​លើក​ទី​...

តេស្ដ​លើក​ទី​១ លើ​អ្នកពាក់ព័ន្ធ នៅ​សណ្ឋាគារ «​ចម្ប៉ា​ពេជ្រ​» ចំនួន​៧៣​នាក់ គឺ​អវិជ្ជមាន​ជំងឺ​កូ​វីដ​-១៩

ដោយៈ ស​រិ​ទ្ធ​/ក្រចេះ ៖ របាយការណ៍​របស់ មន្ទីរ​សុខាភិបាល​ខេត្តក្រចេះ នៅ​ព្រឹក​ថ្ងៃទី​១១ ខែធ្នូ ឆ្នាំ​២០២០ បាន​អះអាងថា វិទ្យាស្ថាន​ប៉ាស្ទ័រ​កម្ពុជា បានធ្វើ​តេស្ដ​លើក​ទី​១ លើ​អ្នក​ពាក់ ព័ន្ធ​នៅ​សណ្ឋាគារ «​ចម្ប៉ា​ពេជ្រ​» ដែលមាន​ទីតាំងនៅ​ស្រុក​ស្នួល ខេត្តក្រចេះ ចំនួន ៧៣ នាក់ គឺ​អវិជ្ជមាន​ជំងឺ​កូ​វីដ​-១៩ ទាំងអស់គ្នា​។​

​អ្នកពាក់ព័ន្ធ​ទាំង ៧៣ នាក់​នេះ ត្រូវបាន​មន្ទីរ​សុខាភិបាល ខេត្តក្រចេះ យក​សំណាក​ទៅ ធ្វើតេស្ដ កាលពី​ល្ងាច​ថ្ងៃទី​៩ និង​ព្រឹក​ថ្ងៃទី​១០ ខែធ្នូ ឆ្នាំ​២០២០ បន្ទាប់ពី​អ្នកមាន​ជំងឺ​កូ​វីដ​ម្នាក់ ឈ្មោះ អិត កុ​ម៉ា​ល បាន​ទៅ​ស្នាក់នៅ​មួយ​យប់ ហើយ​បាន​បន្ដដំណើរ ទៅ​ខេត្តមណ្ឌលគិរី​។​

​បើទោះបី​លទ្ធផល បង្ហាញថា អវិជ្ជមាន​ជំងឺ​កូ​វីដ​-១៩ ក៏ពិតមែន ប៉ុន្ដែ​បច្ចុប្បន្ន សណ្ឋាគារ «​ចម្ប៉ា​ពេជ្រ​» ត្រូវ​ផ្អាក​អាជីវកម្ម ជា​បណ្ដោះអាសន្ន តាម​ការណែនាំ​របស់​ក្រសួងសុខាភិបាល រយៈពេល ១៤ ថ្ងៃ ហើយ​បុគ្គលិក និង​អ្នកពាក់ព័ន្ធ ក៏ត្រូវ​ធ្វើ​ច​ត្តា​ឡី​ស័ក តាម​ការកំណត់ ផងដែរ​។ បន្ថែម​ពីនេះ អ្នក​ដែល​ពាក់ព័ន្ធ ក៏ត្រូវ​ធ្វើតេស្ដ ទៅតាម​ចំនួន​កំណត់ ដូចគ្នា​ដែរ​។​

​ជាមួយគ្នានេះ មន្ទីរ​សុខាភិបាល ខេត្តក្រចេះ បាន​អំពាវនាវ​ដល់ ប្រជាពលរដ្ឋ​រស់នៅ​ស្រុក ស្នូល និង​ប្រជាពលរដ្ឋ រស់នៅ​ខេត្តក្រចេះ​ទាំងអស់ កុំ​មានការ​ភិតភ័យ ឬ​ជ្រួលច្របល់ ព្រោះ​ស្ថានការណ៍​នេះ រាជរដ្ឋាភិបាល អាច​គ្រប់គ្រង​បាន ហើយ​ណាមួយ នៅ​ស្រុក​ស្នួល មិនទាន់មាន​អ្នក​ឆ្លង​នោះទេ​។​

​មន្ទីរ​សុខាភិបាល ខេត្តក្រចេះ ក៏បាន​ណែនាំ​ដល់ ប្រជាពលរដ្ឋ ត្រូវតែ​បន្ដ​ការប្រុងប្រយ័ត្ន រក្សា​អនាម័យ ពាក់​ម៉ាស ឧស្សាហ៍​លាងដៃ ជាមួយ​អាល់កុល ឬ​ជែ​ល និង​រក្សា​គម្លាត សុវត្ថិភាព​សាធារណៈ ហើយ​មិនចាំបាច់ សូមកុំ​ចេញ​ក្រៅ​ផ្ទះ​។​

​គួរ​បញ្ជាក់ថា គិត​ត្រឹម​ព្រឹក ថ្ងៃទី​១១ ខែធ្នូ ឆ្នាំ​២០២០ នេះ ក្រសួងសុខាភិបាល​រក​ឃើញ​អ្នក ឆ្លង​ជំងឺ​កូ​វីដ​-១៩ ពី​ព្រឹត្តិការណ៍ «​សហគមន៍ ២៨ វិច្ឆិកា​» មាន​ចំនួន​សរុប ៤០ នាក់ ៕​PC

ទីតាំងផ្សាយពាណិជ្ជកម្ម

- Advertisment -

Most Popular