Home ព័ត៌មានជាតិ សន្តិសុខ ម្ខាង​ប្តឹង​ក...

ម្ខាង​ប្តឹង​ករណី​កាប់បំផ្លាញ​ដំណាំ និង​ហ៊ុមព័ទ្ធ​យក​ដី​, ម្ខាង​ប្តឹង​ពីបទ​បរិហាកេរ្តិ៍​

ដោយៈ បូកគោ​/​កំ​ពតៈ និវត្តន៍​ជន​មួយរូប បាន​ចោទប្រកាន់​មេបញ្ជាការរង​កងរាជអាវុធហត្ថ ខេត្តកំពត​ម្នាក់ ពីបទ​ប្រើ​អំណាច​កាប់ និង​ដុតបំផ្លាញ​ដំណាំ រួច​បោះ​របង​ហ៊ុមព័ទ្ធ​យក​ដី របស់ខ្លួន​។ ជា​កិច្ច​ឆ្លើយតប លោក​មេបញ្ជាការរង ប្តឹង​បក​វិញ ពីបទ​បរិហារកេរ្តិ៍​។​

​អតីតមន្ត្រី​ការិយាល័យ​ផលិតកម្ម និង​បសុព្យាបាល នៃ​មន្ទីរ​កសិកម្ម​ខេត្តកំពត លោក កែម មុន្នី​វណ្ណ បាន​រៀបរាប់ថាៈ គាត់​ជា​ម្ចាស់ និង​បាន​អាស្រ័យ​ផល លើដី​ទំហំ​បួន​ហិកតា ដែលមាន​ទីតាំង​ស្ថិតក្នុង​ភូមិ​កែប​ថ្មី ឃុំ​បឹង​ទូក ស្រុក​ទឹកឈូ អមដោយ​លិខិតស្នាម​បញ្ជាក់ ត្រឹមត្រូវ តាំងពី​ឆ្នាំ​១៩៩៣ មក​។ ដីចម្ការ​របស់លោក និង​ដី​ពលរដ្ឋ ៦ គ្រួសារ​ទៀត ដែល​នៅជាប់​គ្នា មិនទាន់មាន​ប័ណ្ណកម្មសិទ្ធិ​ទេ ដោយសារ​ពេល​ក្រុមនិស្សិត ចុះ​វាស់វែង តាម​បទបញ្ជា ០១ ឆ្នាំ​២០១៣ លោក សែម សឿន មេបញ្ជាការរង កងរាជអាវុធហត្ថ ខេ​ត​កំពត បានចេញ​មុខមក​ជំទាស់ និង​អះអាង​ជា​ដី​របស់ខ្លួន​។​

​មន្ត្រី​ចូល​និវត្ត៍ ដដែល​នេះ បានបញ្ជាក់​ថាៈ ទោះជា​បែប​នោះ​ក្តី លោក​នៅតែ​បន្ត​អាស្រ័យ ផល ដាំ​ដុះ​ដំណាំ ដូចជា ស្វាយ ចន្ទី ខ្នុរ អាកាស្យា និង​គ្រញូង​ជាច្រើន រយ​ដើម​ដោយ​មិន មាន​បញ្ហា​អ្វី​ទេ​។ ស្រាប់តែ​ថ្មីៗ​នេះ លោក សែម សឿន បានដាក់​កម្លាំង មក​កាប់​ដំណាំ របស់លោក រួច​ដុតបំផ្លាញ ដើម្បី​បំបាត់ភស្តុតាង​។​

​លោក កែម មុន្នី​វណ្ណ បាន​បន្តថាៈ ពីរ​ថ្ងៃ​បន្ទាប់ ស្រាប់តែ​លោក​មេបញ្ជាការរង បានដាក់ កម្លាំង​កម្មករ មក​បោះ​របង​ហ៊ុមព័ទ្ធ យក​ដី​នេះ ដោយ​គ្មាន​ការសួរនាំ ឬ​ដោះស្រាយ​អ្វី​សោះ​។ ពេលនេះ លោក​បានដាក់​ពាក្យបណ្តឹង ចូល​អាជ្ញាធរ មន្ត្រី​ជំនាញ​ពាក់ព័ន្ធ​ដើម្បី​រក​ដំណោះ ស្រាយ និង​ផ្តល់​យុត្តិធម៌ ចំពោះ​រូបលោក​។​

​ទាក់ទិន​ករណី​ខាងលើ លោក សែម សឿន មេបញ្ជាការរង កងរាជអាវុធហត្ថ​ខេត្តកំពត បាន​ឆ្លើយតប​ថា លោក​មិនមាន​អ្វី​ពាក់ព័ន្ធ ជាមួយ​ហេតុការណ៍​កាប់ និង​ដុតបំផ្លាញ​ដើម ឈើ​នោះទេ ព្រោះ​ដី​នេះ ជា​របស់​អ្នក នៅ​ខេត្តកណ្តាល​ម្នាក់ ដែល​លោក​បាន​លក់ និង​ផ្ទេរ​ជូន កាលពី​ឆ្នាំ​២០១៤​។ ប្រវត្តិ​ដី គឺ​លោក​បាន​ទិញ ពី​ប្រជាពលរដ្ឋ កាលពី​ឆ្នាំ​២០០៨ ដោយមាន​ឯកសារ ស្របច្បាប់​គ្រប់គ្រាន់​។​

​លោក​មេបញ្ជាការរង បានបញ្ជាក់​ថាៈ ហេតុផល​ដែល​លោក កែម មុន្នី​វណ្ណ មិនបាន​ទទួល ការវាស់វែង តាម​បទបញ្ជា ០១ ឆ្នាំ​២០១៣ ដោយសារ​លោក ជា​អ្នកប្តឹង​ចូល​ក្រុមនិស្សិត ឱ្យ​រង់ចាំ​ធ្វើការ​ដោះស្រាយ​សិន ព្រោះ​ដី​នោះ​លោក​ទិញ ពី​ប្រជាពលរដ្ឋ​។ ដោយឡែក ពេលនេះ ដើម្បី​ជា​កិច្ច​ឆ្លើយ តប​នឹង​ការចោទប្រកាន់ លើ​រូបលោក​ថា ជា​អ្នក​បំផ្លិចបំផ្លាញ ដំណាំ និង​បោះ​របង​ហ៊ុម​ព័​ទ្ធិ​ដី​នោះ លោក​នឹង​ប្តឹង​បក​វិញ ព្រោះ​ជា​បទ​បរិហារកេរ្តិ៍ ដ៏​ធ្ងន់ធ្ងរ​មួយ ខណៈដែល​លោក មិនមាន​សិទ្ធិ​អ្វី​គ្រប់គ្រង លើដី​កើតហេតុ តាំងពី​ឆ្នាំ​២០១៤ តរៀងមក​៕​PC

ទីតាំងផ្សាយពាណិជ្ជកម្ម

- Advertisment -

Most Popular