Home ព័ត៌មានជាតិ នយោបាយ ក្រសួងសុខាភិប...

ក្រសួងសុខាភិបាល ឆ្លើយតប​ទៅ​ក្រុម​អង្គការ​សង្គម​ស៊ីវិល អំពី​ការការពារ​អ្នក​ជាប់ឃុំ ពី​ជំងឺ​កូ​វីដ​-១៩

ដោយៈ មុនី​រ័ត្ន​/​ភ្នំពេញៈ ក្រសួងសុខាភិបាល បានបញ្ជាក់​ថាៈ ក្រសួង​បានធ្វើការ​ត្រួតពិនិត្យ និង​តាមដាន​សុខភាព អ្នកជាប់ឃុំឃាំង នៅក្នុង​បរិបទ ប្រយុទ្ធ​នឹង​ជំងឺ​កូ​វីដ​-១៩ ។ ទាក់ទង​នឹង​វិធានការ ការពារ​ការចម្លង​វីរុស​កូ​វីដ​-១៩ ក្នុងចំណោម​អ្នកជាប់ឃុំឃាំង កន្លងមក ក្រសួងសុខាភិបាល បាន​សហការ យ៉ាង​ជិតស្និទ្ធ ជាមួយ​អគ្គនាយកដ្ឋាន​ពន្ធនាគា​រ នៃ​ក្រសួងមហាផ្ទៃ ដើម្បី​តាមដាន​មើល​ជាប្រចាំ នូវ​ស្ថានភាព​ជំងឺ​ផ្តាសាយធំ និង​ជំងឺ​កូ​វីដ ១៩​។​

​ឆ្លើយតប​ទៅនឹង​សេចក្តី​ថ្លែង​ការរួម របស់​អង្គការ​លើកលែងទោស​អន្តរជាតិ​អង្គការ​ឃ្លាំមើល សិទ្ធិមនុស្ស និង​សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស​លីកាដូ កាលពី​ថ្ងៃទី​៩ ខែធ្នូ ឆ្នាំ​២០២០ ស្តីពី​ប្រទេស​កម្ពុជា ៖ ភាពចាំបាច់​ដើម្បី ការពារ​អ្នក​ជាប់ឃុំ ពី​ជំងឺ​កូ​វីដ​-១៩ ក្រសួងសុខាភិបាល បាន​បញ្ជាក់ថា រាជរដ្ឋាភិបាល​កម្ពុជា បាន​យកចិត្តទុកដាក់ យ៉ាងខ្លាំង ក្នុង​ការគោរព​សិទ្ធិមនុស្ស និង​ការយកចិត្តទុកដាក់ លើ​ការផ្តល់សេវា​សុខភាព​ជូន​ប្រជាជន ទូទៅ ដោយ​មិន​រើសអើង វណ្ណៈ ពូជសាសន៍ ពណ៌​សម្បុរ ឬ​អ្នក​ជាប់ពន្ធនាគារ​នោះឡើយ ដើម្បី​ទទួល​សេវា​សុខភាព ស្មើៗ​គ្នា ដោយ​មិនមាន​ការរើសអើង​ឡើយ ជាពិសេស ជន​ងាយ​រងគ្រោះ ជនក្រីក្រ ជនពិការ​មនុស្ស​ចាស់​ជរា ស្ត្រី និង​កុមារ​ត្រូវបាន​ទទួល​ការ គាំទ្រ​បន្ថែម ទាំង​ផ្នែក​ហិរញ្ញវត្ថុ និង​សង្គម ដើម្បី​ពួកគាត់ អាច​ទទួលបាន​សេវា​សុខាភិបាល ប្រកបដោយ​សមភាព គុណភាព និង​តម្លាភាព​។​

​ទាក់ទង​នឹង​វិធានការ ការពារ​ការចម្លង វីរុស​កូ​វីដ​-១៩ ក្នុងចំណោម​អ្នកជាប់ឃុំឃាំង កន្លងមក ក្រសួងសុខាភិបាល បាន​សហការ​យ៉ាង​ជិតស្និទ្ធ ជាមួយ​អគ្គនាយកដ្ឋាន​ពន្ធនាគា​រ នៃ​ក្រសួងមហាផ្ទៃ ដើម្បី​តាមដាន​មើល​ជាប្រចាំ នូវ​ស្ថានភាព​ជំងឺ​ផ្តាសាយធំ និង​ជំងឺ​កូ​វីដ​-១៩ ដោយ​អគ្គនាយកដ្ឋាន​ពន្ធនាគា​រ បាន​យកចិត្តទុកដាក់​បន្ថែម ក្នុងការ​តាមដាន​សុខភាព អ្នកជាប់ឃុំឃាំង និង​រាយ​ការ​ណ៏​មក ក្រសួងសុខាភិបាល ក្នុងករណី​មានការ​សង្ស័យ លើ​បញ្ហា​សុខភាព អ្វីមួយ ដែល​កន្លងមកនេះ ក្រសួង បានធ្វើ​អន្តរាគមន៍ ជួយ​ពិនិត្យ និង​ព្យាបាល ដល់​អ្នកជាប់ឃុំឃាំង ដែលមាន​ជំងឺ​ផ្តាសាយធំ នៅតាម​បណ្តា​ខេត្ត​មួយចំនួន រួចមកហើយ រហូត​ពួកគេ បានជា​សះស្បើយ​។​

​ក្រសួងសុខាភិបាល បានបញ្ជាក់​ថាៈ ចាប់តាំងពី​ពេល មានការ​ផ្ទុះ​ព្រឹត្តិការណ៍ សហគមន៍ ២៨ វិច្ឆិកា មក អគ្គនាយកដ្ឋាន​ពន្ធនាគា​រ នៃ​ក្រសួងមហាផ្ទៃ បាន​តាមដាន​ស្រាវជ្រាវ រក​ករណី​ពាក់ព័ន្ធ​នឹង​ព្រឹត្តិការណ៍ សហគមន៍​នេះ ហើយ​មាន​បុគ្គល​ណាខ្លះ​ដែល​បាន មក​ពាក់ព័ន្ធ​នឹង​ពន្ធនាគារ ព្រមទាំង​បាន​តាមដាន សុខភាព អ្នកជាប់ឃុំឃាំង​កាន់តែ​ហ្មត់ ចត់​ថែមទៀត​។​

​របាយការណ៍​របស់ អគ្គនាយកដ្ឋាន​ពន្ធនាគា​រ បង្ហាញថា មិនមាន​អ្នក​ប៉ះពាល់​នឹង ព្រឹត្តិការណ៍​សហគមន៍ ២៨ វិច្ឆិកា​” ណា​ម្នាក់ មានការ​ប្រាស្រ័យ​ទាក់ទង​ជាមួយ​អ្នក​ជាប់ ឃុំឃាំង​ឡើយ ហើយ​ចាប់ពី​ថ្ងៃទី​០១ ដល់ ថ្ងៃទី​១០ ខែធ្នូ ឆ្នាំ​២០២០ មណ្ឌល​អប់រំ​កែប្រែ​ទី​១ មិនមាន​ករណី ជំងឺ​ផ្តាសាយធំ ដែលមាន​ការសង្ស័យថា ជាប់​ពាក់ព័ន្ធ​ទៅនឹង​ការចម្លង វីរុស​កូ​វីដ​-១៩ ទាំង​ក្នុងចំណោម​មន្ត្រី ចំនួន ៣៥៤ នាក់ និង​អ្នកជាប់ឃុំឃាំង ចំនួន ៧៦០៨ នាក់​ឡើយ​។​

​លើសពីនេះ​ទៀត បន្ទាប់ពី​បានទទួល​ព័ត៌មាន តាមរយៈ​បណ្តាញសារព័ត៌មាន អំពី​ការ ផ្ទុះឡើង​ជំងឺ​ផ្តាស​សាយ​ធំ នៅ​មណ្ឌល​អប់រំ​កែប្រែ​ទី​១ នៅ​ថ្ងៃទី​៩ ខែធ្នូ ឆ្នាំ ២០២០ មក ក្រសួងសុខាភិបាល បាន​ចាត់​មន្ត្រី​ក្រុម​ឆ្លើយតប​បន្ទាន់ ចុះ​ជាបន្ទាន់​ទៅកាន់​មណ្ឌល​អប់រំ កែប្រែ​ទី ១ នៅ​យប់​ថ្ងៃទី​៩ និង​នៅ​ព្រឹក​ថ្ងៃទី​១០ ខែធ្នូ ឆ្នាំ​២០២០​ដើម្បី​ពិនិត្យមើល​ស្ថានភាព សុខភាព អ្នក​ជាប់ឃុំ ឃាំង​ដោយផ្ទាល់ ហើយ​របាយការណ៍​រប​ស់ អគ្គនាយកដ្ឋាន​ពន្ធនាគា​រ មណ្ឌល​អប់រំ​កែប្រែ​ទី​១ ជា​ផ្លូវការ បាន​បង្ហាញថា មិនមាន​ករណី​ជំងឺ​ផ្តាសាយធំ​ក្នុងចំណោម អ្នកជាប់ឃុំឃាំង នៅ​ទី​នោះឡើយ​។​

​ក្រសួងសុខាភិបាល បានបញ្ជាក់​ទៀតថាៈ ក្រសួង​នៅតែ​បន្ត​កិច្ចសហការ​ជាមួយ​អគ្គនាយក ដ្ឋា​ន​ពន្ធនាគារ នៃ​ក្រសួងមហាផ្ទៃ និង​អាជ្ញាធរ​ថ្នាក់ក្រោម​ជាតិ នៅតាម​បណ្តា​រាជធានី​-​ខេត្ត ទាំងអស់ ដើម្បី​តាមដាន​មើល​ជាប្រចាំ នូវ​ស្ថានភាព​ជំងឺ​ផ្តាសាយធំ ដែល​អាច​សង្ស័យថា ជា​ជំងឺ​កូ​វីដ​-១៩ នៅតាម​មណ្ឌល​អប់រំ​កែប្រែ ទាំងអស់ ក្នុង​ព្រះរាជាណាចក្រ​កម្ពុជា និង​ជំរុញ ឲ្យ​អគ្គនាយកដ្ឋាន​ពន្ធនាគា​រ នៃ​ក្រសួងមហាផ្ទៃ បន្ត​យកចិត្តទុកដាក់ អនុវត្ត​វិធានការ​របស់ ក្រសួងសុខាភិបាល ដើម្បី​ទប់ស្កាត់ ការចម្លង​ជំងឺ​កូ​វីដ​-១៩ ក្នុងចំណោម​អ្នកជាប់ឃុំឃាំង ផងដែរ​។ ក្រសួងសុខាភិបាល សូម​អំពាវនាវ​ដល់ គ្រប់​ស្ថាន​ប័ន​ពាក់ព័ន្ធ ចូលរួម​អនុវត្ត វិធានការ​របស់ ក្រសួងសុខាភិបាល ក្នុង​ស្មារតី​រក្សា​សមភាព និង​សាមគ្គីភាព​គ្នា ដើម្បី​ទប់ ស្កាត់​ការចម្លង​ជំងឺ​កូ​វីដ​-១៩៕​PC

ទីតាំងផ្សាយពាណិជ្ជកម្ម

- Advertisment -



Most Popular