Home កីឡា លី​ក​អឺរ៉ុប​ច...

លី​ក​អឺរ៉ុប​ចុង​សប្តាហ៍ ៖ Man U ស្វាគមន៍ Man City, តោ​ខៀវ​ទៅ​ទឹកដី​ក្រុម​ស្ករ​គ្រាប់ Everton, Real ទទួលភ្ញៀវ Atl. Madrid, Leipzig និង Bayern សង្ឃឹម​ឈ្នះ​ស្រួលៗ​

​ប្រែ​សម្រួល : កញ្ញា​ដា​លី​ស​/​បាល់ទាត់ ៖ ការប្រកួត​បាល់ទាត់​លី​ក​អឺរ៉ុប​ចុង​សប្តាហ៍​នេះ​បាន​មកដល់​ទៀតហើយ​។ ជំនួប​ថ្ងៃ​សៅរ៍​សុទ្ធតែជា​ក្រុម​ខ្លាំងៗ​ប៉ះគ្នា ជាពិសេស​នៅ​លី​ក​អង់គ្លេស គឺ​បិសាច​ក្រហម Man U ទទួល​មេឃ​ខៀវ Man City និង ក្រុម​ស្ករ​គ្រាប់ Everton ទទួលភ្ញៀវ​ខ្លាំង​តោ​ខៀវ Chelsea​។

​ចំណែក​នៅអេ​ស្ប៉ា​ញក៏​មិន​ធម្មតា​ដែរ ថ្ងៃ​សៅរ៍​នេះ​មាន​ជំនួប​ធំ​រវាង​ស្តេច​ស Real Madrid និង Atl. Madrid ដែល​ជា​ក្រុម​ជិតខាង​គ្នា​។

​សម្រាប់​លី​ក​កំពូល​អាល្លឺម៉ង់​វិញ ក៏​មាន​ការប្រកួត​ច្រើន​គូ​ដែរ ហើយ​ក្រុម​ដែល​រំពឹង​ឈ្នះ​ស្រួលៗ​មាន​ពីរ គឺ Leipzig និង Bayern Munich​។ ហើយ​នៅ​អ៊ីតាលី​និង​បារាំង​ក៏​មាន​ការប្រកួត​ប៉ុន្មាន​គូ​ដែរ​សម្រាប់​ថ្ងៃ​សៅរ៍​នេះ​។

– EPL : Man Utd vs Man City ៖ នេះ​ជា​ជំនួប​ធំជាងគេ​ប្រចាំ​លី​ក​កំពូល​អង់គ្លេស រវាង​ក្រុម​ជិតខាង​ត្រកូល Manchester ទាំងពីរ ដែល​នឹង​ធ្វើឱ្យ​កក្រើក​រាត្រី​ថ្ងៃ​សៅរ៍​នេះ ខណៈ​ក្រុម​ទាំង​ពីរ​ប្រជែង​យក​៣​ពិន្ទុ​រៀងៗ​ខ្លួន​។ Man U កំពុង​រើប​ឡើង​សន្សឹមៗ​ក្នុងស្រុក ដោយ​ប្រកួត​ឈ្នះ​៤​លើកចុងក្រោយ​ជាប់ៗ​គ្នា រួម​ទាំង​ជ័យជម្នះ​ចុង​ម៉ោង​មិន​គួរឱ្យ​ជឿ​ក្នុងជំនួប​ចុងក្រោយ​នៅ​ទឹកដី​របស់ West Ham ក្រោយ​តាម​ឈ្នះ​វិញ ៣-២ បន្ទាប់ពី​គេ​នាំ​មុខមុន​២​សូន្យ​។ ប៉ុន្តែ​នៅ​ក្របខ័ណ្ឌ​អឺរ៉ុប​វិញ បិសាច​ក្រហម​លេង​មិនបាន​ល្អ​ទេ ទើប​ជ្រុះ​ចេញពី CL ក្រោយ​ចាញ់ Leipzig ៣-២​។ និយាយ​ពី​ក្នុង​ទឹកដី​វិញ បិសាច​ក្រហម​ធ្វើ​មិនបាន​ល្អ​ទេ គឺ​ចាញ់​៣​ដង​និង​ឈ្នះ​ម្តងគត់​លើ​ក្រុម​អន់ West Brom​។​

Man City ក៏​ចាប់ផ្តើម​រដូវ​កាល​មិនសូវ​បាន​ល្អ​ដែរ ទើបតែ​ប៉ុន្មាន​ប្រកួត​ចុងក្រោយ​នេះ​ទេ ដែល​ចាប់ផ្តើម​បង្ហាញ​ទម្រង់​លេង​អស្ចារ្យ ដោយ​ឈ្នះ​ច្រើន​គ្រាប់​នៅ​២​ប្រកួត​ចុងក្រោយ ពោលគឺ​ស៊ុត​ចូល​៧​គ្រាប់​ក្នុង​ជំនួប​ទល់នឹង Burnley និង Fulham​។ ថ្ងៃនេះ​កូនក្រុម​របស់​លោក​ប៉េប ហ្គាឌី​អូ​ឡា អាច​ឡើង​មក​លើ​បិសាច​ក្រហម បើ​ឈ្នះ​ថ្ងៃនេះ ព្រោះ​មេឃ​ខៀវ​ចាញ់​បិសាច​ក្រហម​តែ​១​ពិន្ទុ​ប៉ុណ្ណោះ​។​

​ក្រុម​ទាំង​ពីរ​ធ្លាប់​ជួប​គ្នា​ច្រើន​ដង​មកហើយ ប៉ុន្តែ​ជំនួប​២​លើក​ចុងក្រោយ​គឺ Man City ឈ្នះ​រហូត ហើយ​អ្វី​ដែល​ពិសេស​គឺ​មេឃ​ខៀវ​ទៅ​ទឹកដី​របស់​បិសាច​ក្រហម ៥ លើកចុងក្រោយ ឈ្នះ​៣​ដង ហើយ​នៅ​៦ ប្រកួត​ចុងក្រោយ​ក្រុម​ទាំង​ពីរ​តែងតែមាន​គ្រាប់​បាល់​ស៊ុត​គ្នា​ទៅវិញទៅមក​។

​ដោយហេតុ​ថា Man U កំពុង​ល្អ​ក្នុងស្រុក រីឯ Man City ក៏​កំពុង​រើប​ខ្លាំង​ដូចគ្នា យើង​រំពឹង​ការប្រកួត​នេះ​ស្មើគ្នា ឬ មិន​អ៊ីចឹង​ភ្ញៀវ​ឈ្នះ​។

– EPL : Everton vs Chelsea ៖ វា​ជា​រឿង​គួរឱ្យ​សោកស្តាយ​សម្រាប់​ក្រុម​ស្ករ​គ្រាប់ Everton ដែល​បើកឆាក​៦​ប្រកួត​ដំបូង​ល្អ​ដូច​ផ្កា បែរ​ជា​ឥឡូវ​ធ្លាក់ចុះ​ទម្រង់​លេង​វិញ​យ៉ាង​គំហ៊ុក ដោយ​៥​លើកចុងក្រោយ​ចាញ់​ដល់​ទៅ​៣​ដង​ទៅ​ហើយ​។ បច្ចុប្បន្ន​កូនក្រុម​របស់​លោក​កា​ឡូ​ស អាន់​សេ​ឡូ​ទី ឈរ​នៅ​លេខ​៩​មាន​១៧​ពិន្ទុ ចាញ់​លេខ​៣ Chelsea ៥​ពិន្ទុ​។

​កាលពី​សប្តាហ៍​មុន Everton បាន​ត្រឹម​ស្មើ ១-១ នៅ​ទឹកដី​របស់ Burnley ប៉ុន្តែ​ដោយហេតុថា​ពួកគេ​ទទួលបាន​ត្រឹម​៤​ពិន្ទុ​ពី​លទ្ធភាព​ពិន្ទុសរុប ១៥ ដូច្នេះ​បានន័យថា​ពួកគេ​កំពុង​ធ្លាក់​ទម្រង់​លេង​។ អ្វី​ដែល​រឹតតែ​យ៉ាប់​សម្រាប់ Everton គឺ​លេង​ក្នុង​ទឹកដី​៣​លើក​ចុង​ក្រោយ​មិន​ដែល​ឈ្នះ​ទៀត ហើយ​ប្រកួត​ចុងក្រោយ​គឺ​ចាញ់ Leeds ១-០ ក្នុង​ទឹកដី ដូច្នេះ​វា​មិនមែន​ជា​ពេលវេលា​ល្អ​ទេ ដែល​ប៉ះ​តោ​ខៀវ​ដែល​កំពុង​លេង​ល្អ​មិន​ដែល​ចាញ់​ក្នុង​១៧​ប្រកួត​ចុងក្រោយ​។

​តោ​ខៀវ​កំពុង​បង្ហាញ​ខ្លួន​ឯង​ថា​ជា​ក្រុម​ខ្លាំង​បំផុត​មួយ​នៅ​លី​ក​កំពូល​អង់គ្លេស​ក្នុង​រយៈពេល​៤​សប្តាហ៍​ចុងក្រោយ​នេះ ហើយ​ពួកគេ​ឈរ​នៅ​លេខ​៣ មាន​២២​ពិន្ទុ និង​ចាញ់​លេខ​១​និង​លេខ​២​តែ ២​ពិន្ទុ​ប៉ុណ្ណោះ​។ ដោយសារ Tottenham និង Liverpool ត្រូវ​លេង​នៅ​ថ្ងៃអាទិត្យ ដូច្នេះ​បើ​ឈ្នះ​ថ្ងៃនេះ Chelsea នឹង​ឡើង​មក​លេខ​១​បណ្តោះអាសន្ន​។ ក្រុម​របស់​លោក​ហ្វ្រែង​ឡាំ​ផាត​ប្រមូលបាន​១៣​ពិន្ទុ​ពី​ពិន្ទុ​សរុប ១៥ ហើយ​ពួកគេ​ចាញ់​តែ​ម្តង​គត់ គឺ​ក្រោម​ថ្វី​ដៃ Liverpool កាល​ពី​បី​ខែ​មុន​។

Chelsea រដូវ​កាល​មុន​ទៅ​ទឹកដី Everton ចាញ់​៣-១ ហើយ​បើ​មើល​ស្ថិតិ តោ​ខៀវ​មិន​ដែល​ឈ្នះ​នៅ​ទឹកដី Everton ទេ​តាំងពី​ឆ្នាំ​២០១៧​។ ដូច្នេះ​ការប្រកួត​ថ្ងៃនេះ​មាន​ឱកាស​ខ្ពស់​ណាស់​ដែល​ថា​ក្រុម​ទាំង​ពីរ​នឹង​មាន​គ្រាប់​បាល់​លើសពីរ​២​គ្រាប់​កន្លះ​។ មើល​លើ​បច្ចុប្បន្នភាព Chelsea មាន​ក្រុម​ល្អ​ជាង Everton ទាំង​ការពារ បម្រើ ប្រយុទ្ធ និង​អ្នកចាំទី​។ កាល​ប្រកួត CL ពាក់កណ្តាល​សប្តាហ៍​ជម្រើស​ឈុត​ធំ​របស់ Chelsea បាន​សម្រាក​យក​កម្លាំង ដូច្នេះ​ថ្ងៃនេះ​ពួក​គេ​រំពឹង​ចូល​លេង​វិញ ហើយ​នឹង​ទទួលបាន​លទ្ធផល​ល្អ​ពី​ក្រុម​ស្ករ​គ្រាប់​។​

– La Liga : Real Madrid vs Atl. Madrid ៖ ក្រោយ​លេង​មិន​ដែល​ឈ្នះ​ប៉ុន្មាន​ប្រកួត​ជាប់​គ្នា ស្តេច​ស Real Madrid បាន​យក​ឈ្នះ ១-០ នៅ​ទឹកដី​របស់​ក្រុម​ខ្លាំង Sevilla ដូច្នេះ​ពួកគេ​នឹង​មាន​កម្លាំងចិត្ត​ខ្ពស់​នៅពេល​ទទួលភ្ញៀវ​ខ្លាំង​ក្បែរ​ខាង​គ្នា គឺ Atl. Madrid​។

Atl. Madrid បាន​ពង្រឹក​ជ័យជម្នះ​របស់​ខ្លួន ៧ ប្រកួត​ជាប់ៗ​គ្នា​នៅក្នុង​ក្របខ័ណ្ឌ​បាល់ទាត់​អេ​ស្ប៉ា​ញ La Liga ។ ក្រុម​ភ្ញៀវ​ថ្ងៃនេះ​គឺជា​ក្រុម​តែមួយ​គត់ ដែល​មិន​ទាន់​ចាញ់​រហូតមកទល់​ពេលនេះ​។ ពួកគេ​មក​ទឹកដី​ស្តេច​ស​ថ្ងៃនេះ ក្រោយ​ឈ្នះ ២-០ នៅ​ទឹកដី​របស់ Valladolid សប្តាហ៍​មុន​។

​ពីរ​ប្រកួត​ក្នុងចំណោម​៣​លើកចុងក្រោយ​រវាង​ក្រុម​ទាំង​ពីរ​បញ្ចប់​ទៅ​ស្មើគ្នា និង​មួយ​ប្រកួត​ទៀត​គឺ Real Madrid ឈ្នះ ១-០​។ តែ​ទោះ​យ៉ាងណា ស្តេច​ស​លេង​១១​ប្រកួត​បើកឆាក​រដូវ​កាល​នេះ លេង​ឡើង​ចុះ​មិន​ថេរ​ទេ ហើយ​បច្ចុប្បន្ន​ឈរ​នៅ​លេខ​៤​។ មួយវិញទៀត ស្តេច​ស Real Madrid មាន​បញ្ហា​របួស​កីឡាករ​ច្រើន​រួម​ទាំង​អេដិន ហាហ្សា​ដ ត្បិត​ថ្ងៃនេះ​ប្រធាន​ក្រុម សឺ​ជី​អូ រ៉ា​ម៉ូ​ស ត្រឡប់​មក​ដឹកនាំ​ក្រុម​វិញ​ក៏ដោយ​។ Atl. Madrid កំពុង​លេង​ល្អ​ខ្លាំង​មិន​ដែល​ចាញ់ ហើយ​ខ្សែប្រយុទ្ធ​មុត​ស្រួច ល្វីស ស្វា​រ៉េ​ស ក៏​វិលត្រឡប់​ចូល​ក្រុម​វិញ​ទៀត ដូច្នេះ លទ្ធភាព​ដែល Atl. Madrid យក​ឈ្នះ​នៅ​ទឹកដី Real Madrid គឺ​មាន​ខ្ពស់​ណាស់​ថ្ងៃនេះ ឬ​បើ​ស៊យ​ណាស់​គឺ​ស្មើគ្នា​។

​តារាង​កម្មវិធី​ប្រកួត​លី​ក​កំពូល​អឺរ៉ុប​សម្រាប់​ចុង​សប្តាហ៍ ៖

ទីតាំងផ្សាយពាណិជ្ជកម្ម

- Advertisment -

Most Popular