Home ព័ត៌មានជាតិ សង្គម មន្ត្រី​មូលដ្...

មន្ត្រី​មូលដ្ឋាន រួមគ្នា​សុំ​កិច្ច​អន្តរាគមន៍ ពីស​ម្តេច​តេ​ជោ ហ៊ុន សែន ចំពោះ​ការដោះដូរ មណ្ឌល​សុខភាព​ប៉ោយប៉ែត

ដោយៈ ស​រិ​ទ្ធ/បន្ទាយ​មាន​ជ័​យៈ លោក​ចៅសង្កាត់​ប៉ោយប៉ែត និង សមាជិក​ក្រុមប្រឹក្សា ទាំងអស់ កាលពី​ថ្ងៃទី​៤ ខែធ្នូ ឆ្នាំ​២០២០ កន្លងទៅ បានរួម​គ្នា​ធ្វើ លិខិត​មួយច្បាប់ ស្នើសុំ​កិច្ច អន្តរាគមន៍​ពី សម្តេច​តេ​ជោ ហ៊ុន សែន នាយករដ្ឋមន្ត្រី​នៃ​កម្ពុជា ក្នុង​កម្មវត្ថុ «​ក្នុងការ​ផ្អាក ដោះដូរ មណ្ឌល​សុខភាព ប៉ោយប៉ែត ស្ថិត​ក្នុងភូមិ​ក្បាលស្ពាន​១ សង្កាត់​ប៉ោយប៉ែត ក្រុង​ប៉ោយប៉ែត ខេត្តបន្ទាយមានជ័យ​»​។ នេះ​បើ​យោងតាម​លិខិត ដែល​ទើប​ទទួលបាន នៅ​ថ្ងៃទី​១២ ខែធ្នូ ឆ្នាំ​២០២០ នេះ ។​

​យោងតាម​ខ្លឹម​សារលិខិត បានអោយដឹងថាៈ ប្រជាពលរដ្ឋ រស់នៅ​ច្រើនជាង ១ ម៉ឺន​គ្រួសារ ក្នុង​សង្កាត់​ប៉ោយប៉ែត មាន​មណ្ឌល​សុខភាព តែមួយគត់ ។ ក្នុង​រយៈពេល​ប៉ុន្មាន​ខែ មកនេះ មានការ​ផ្សព្វផ្សាយ តាម​សារព័ត៌មាន និង​មានការ​រអ៊ូរទាំ ពី​សំណាក់​ប្រជាពលរដ្ឋ អំពី​ការ ដោះដូរ​មណ្ឌល​សុខភាព ប៉ោយប៉ែត ទៅ​ឆ្ងាយ​ពី​លំនៅដ្ឋាន របស់​ពួកគាត់ ទៅកាន់​ភូមិ ផ្សារកណ្តាល សង្កាត់​ផ្សារកណ្តាល ក្រុង​ប៉ោយប៉ែត ។​

​លោក​ចៅសង្កាត់​ប៉ោយប៉ែត និង​សមាជិក​ក្រុមប្រឹក្សា​ទាំងអស់ បាន​រៀបរាប់​ទៀតថាៈ សង្កាត់​ផ្សារកណ្តាល «​មាន​មណ្ឌល​សុខភាព​២» និង «​មន្ទីរពេទ្យបង្អែក​១» ហើយ​ធ្វើអោយ សង្កាត់​ផ្សារកណ្តាល មាន​មណ្ឌល​សុខភាព​ឡើងដល់ ៣ សរុប​ទាំង​មន្ទីរពេទ្យបង្អែក ឡើងដល់ ៤ កន្លែង ហើយ​នៅ​សង្កាត់​ប៉ោយប៉ែត អត់​មាន​មណ្ឌល​សុខភាព ទាល់តែសោះ ។ ហេតុដូច្នេះ កុំអោយ​មានការ​ថ្នាំងថ្នាក់ ពី​ប្រជាពលរដ្ឋ​នោះ ទើប​សមាជិក​ក្រុមប្រឹក្សា សង្កាត់​ប៉ោយប៉ែត រៀបចំ​ប្រជុំ​វិសាមញ្ញ ហើយ​ស្មារតី​អង្គប្រជុំ ក្រុមប្រឹក្សា​សង្កាត់ បានសម្រេច សូម​មិន​អោយមាន ការដោះដូរ​មណ្ឌល​សុខភាព ប៉ោយប៉ែត ទេ ។​

​ហេតុផល​ដែល​លោក​ចៅសង្កាត់ ប៉ោយប៉ែត និង​សមាជិក​ក្រុមប្រឹក្សា​ទាំងអស់ សូម​មិន អោយមាន​ការដោះដូរ មណ្ឌល​សុខភាព ប៉ោយប៉ែត រួមមានៈ ១-​នៅ​ជុំវិញ​មណ្ឌល​សុខភាព មាន​ប្រជាពលរដ្ឋ រស់នៅ​ជាង ១​ម៉ឺន​គ្រួសារ ហើយ​ភូមិ​ជាច្រើន ដូចជា​ភូមិ​ក្បាលស្ពាន​១ ក្បាលស្ពាន​២ ភូមិ​ប៉ោយប៉ែត ភូមិ​ក្បាលកោះ ភូមិ​អូរជ្រៅ ភូមិ​បា​លិ​លេ​យ្យ​១ និង បា​លិ​លេ​យ្យ​២ ហើយ​ភាគច្រើន ប្រជាពលរដ្ឋ ជា​កម្មករ​អូស​រទេះ និង កម្មករ​លីសែង​ឥ​វ៉ាន់ ។ ២-​បើ​ប្តូរ​មណ្ឌល​សុខភាព ទៅ​សង្កាត់​ផ្សារកណ្តាល ខុស​នឹង​គោលការណ៍ សង្កាត់​មួយ មាន​មណ្ឌល​សុខភាព​មួយ ហើយ​នៅ​ឆ្ងាយ​បងប្អូន​ប្រជាពលរដ្ឋ ជួប​ការលំបាក ទៅ​ត្រួត ពិនិត្យ សុខភាព ជាពិសេស​ស្ត្រី​មាន​ផ្ទៃពោះ និង ជន​ចាស់ជរា ។ ៣-​ប្រជាពលរដ្ឋ ម្ចាស់ឆ្នោត សូម​ដល់​ក្រុមប្រឹក្សា​សង្កាត់​ប៉ោយប៉ែត ជាច្រើនលើក ហើយ​អាច​នឹងមាន​ការតវ៉ា​ណាមួយ ធ្វើអោយប៉ះពាល់​អាជ្ញាធរ និង រាជរដ្ឋាភិបាល ។​

​ជាមួយគ្នានេះ លោក​ចៅសង្កាត់​ប៉ោយប៉ែត និង សមាជិក​ក្រុមប្រឹក្សា​ទាំងអស់ ថ្លែងថា ដើម្បី​កាត់បន្ថយ ហានិភ័យ​ផ្សេងៗ និង​បង្កើន​ការជួយ​សង្គ្រោះបន្ទាន់ ដល់​ប្រជាពលរដ្ឋ អោយបាន​ទាន់ពេលវេលា អាជ្ញាធរ ស្នើសុំ​ទៅ​សម្តេច​តេ​ជោ ហ៊ុន សែន មេត្តាជួយ អន្តរាគមន៍ ដ៏​ខ្ពង់ខ្ពស់ ក្នុង​ការផ្អាក​ការដោះដូរ មណ្ឌល​សុខភាព ប៉ោយប៉ែត​ទៅកាន់​សង្កាត់ ផ្សារកណ្តាល ។

​ទោះបីយ៉ាងណា ពេលនេះ ពុំទាន់​សុំ​ការបញ្ជាក់​បន្ថែម ពី​លោក ភោគ លន ចៅសង្កាត់ ប៉ោយប៉ែត បាន​នៅឡើយ​ទេ ដោយសារ​ទូរស័ព្ទ ចូល​គ្មាន​អ្នកទទួល ។​

​ដោយឡែក យោងតាម​លិខិត​របស់ ក្រសួងមហាផ្ទៃ កាលពី​ថ្ងៃទី​២០ ខែវិច្ឆិកា ឆ្នាំ​២០២០ កន្លងទៅ គឺ រាជរដ្ឋាភិបាល បាន​យល់ព្រម​ជាគោលការណ៍ អោយ​រដ្ឋបាលខេត្ត បន្ទាយមានជ័យ រៀបចំ​បំពេញបែបបទ និង នីតិវិធី ក្នុងការ​ផ្ទេរ​ប័ណ្ណ​សម្គាល់​សិទ្ធិ កាន់កាប់​ទីតាំង​ដី មណ្ឌល​សុខភាព ប៉ោយប៉ែត​១ មកអោយ​ក្រុមហ៊ុន ស៊ីន សាន ដុង អ៊ិន​ធើ​ណេ​សិ​នណល អ៊ិន​វេស​ម៉ិ​ន ឯ​.​ក ដោយ​ពន្ធ​ប្រថាប់ត្រា ជា​បន្ទុក​របស់​រដ្ឋ ។

​ទន្ទឹមនេះ រដ្ឋបាលខេត្ត​បន្ទាយមានជ័យ ត្រូវធ្វើ​ការណែនាំ ដល់​ក្រុមហ៊ុន អោយ​រៀបចំ សាងសង់ អគារ​មណ្ឌល​សុខភាព​ប៉ោយប៉ែត​១ ថ្មី និង​ហេដ្ឋារចនាសម្ព័ន្ធ នានា អោយបាន រួចរាល់​ជា​ស្ថាពរ ដោយ​ធ្វើការ​ប្រគល់​ទទួល និង​ចេញប្រកាស​រួម ជាមុនសិន​ទើប​អនុញ្ញាត អោយ​យក ទីតាំង​ចាស់​ទៅ​អភិ​វ​ឌ្ឈ​ន៍​៕​PC

ទីតាំងផ្សាយពាណិជ្ជកម្ម

- Advertisment -

Most Popular