Home ព័ត៌មានអន្តរជាតិ ប៉ូលិស​ឥណ្ឌា​...

ប៉ូលិស​ឥណ្ឌា​ចាប់​កម្មករ​ជាង​១០០​នាក់ ក្រោយ​វាយបំផ្លាញ​រោងចក្រ​ផលិត​iPhone ដោយសារ​រឿង​ប្រាក់​ឈ្នួល​

​ប្រែ​សម្រួល : កញ្ញា​ដា​លី​ស ៖ ប៉ូលិស​ឥណ្ឌា​បាន​ចាប់ខ្លួន​កម្មករ​ជាង​១០០ នាក់​ដែល​បាន​វាយ​បំផ្លាញ​រោងចក្រ ជុំវិញ​ការទាមទារ​ប្រាក់​ឈ្នួល​នៅឯ​រោងចក្រ​ផលិត iPhone​ដែល​គ្រប់គ្រង​ដោយ​​កោះ​តៃវ៉ាន់​នៅក្បែរ​ទីក្រុង​បាង​ហ្គាល័រ​។​

​វីដេអូ​នៅលើ​បណ្តាញ​សង្គម​បានបង្ហាញ​ថា កាមេរ៉ា​សុវត្ថិភាព​និង​កញ្ចក់​បែក​ខ្ទេចខ្ទី អំពូល​ភ្លើង​ត្រូវ​ខូច និង​រថយន្ត​មួយ​គ្រឿង​ត្រូវ​ដុត​ឆេះ​នៅ​ឯ​រោងចក្រ​ផលិត​របស់​ក្រុមហ៊ុន Wistron Infocomm ។​

​ក្រុម​កម្មករ​អះអាង​ថា​ពួកគេ​មិន​បាន​ទទួល​ប្រាក់​ឈ្នួល​ពេញ​រយៈពេល ៤ ខែ​ហើយ​ត្រូវ​បង្ខំ​ឱ្យធ្វើ​ការប្តូរ​វេន​បន្ថែម​ទៀត​។​

​ក្រុមហ៊ុន Wistron Infocomm និយាយថា ខ្លួន​បាន​សន្យា​អនុវត្ត​តាម​ច្បាប់​ការងារ​ក្នុងស្រុក​។​

​នៅក្នុង​សេចក្តីថ្លែងការណ៍​មួយ​ទៅកាន់​ទីភ្នាក់ងារសារព័ត៌មាន AFP ក្រុមហ៊ុន​មិនបាន​និយាយ​សំដៅ​ដោយ​ផ្ទាល់​ទៅលើ​ពាក្យ​តវ៉ា​របស់​កម្មករ​ទេ ប៉ុន្តែ​និយាយថា​”​ឧបទ្ទវហេតុ​នេះ​គឺ​បណ្តាលមកពី​​មនុស្ស​មិន​ស្គាល់​អត្តសញ្ញាណ​ពី​ខាងក្រៅ ដែល​បាន​រំលោភ​ចូល​និង​បំផ្លាញ​ទីតាំង​រោងចក្រ​របស់ខ្លួន​ដោយ​ចេតនា​មិន​ច្បាស់លាស់​”​។​

​ក្រុមហ៊ុន​និយាយថា ខ្លួន​នឹង​បន្ត​ប្រតិបត្តិការ​ឱ្យបាន​ឆាប់​តាម​ដែល​អាច​ធ្វើទៅបាន​។​

​បាង​ហ្គាឡ័​រ ដែល​ជា​រដ្ឋធានី​នៃ​រដ្ឋកា​ណា​តា​កា​ស្ថិតនៅ​ភាគ​ខាងត្បូង​ប្រទេស គឺ​ជា​មជ្ឈមណ្ឌល​បច្ចេក​វិជ្ជា​របស់​ឥណ្ឌា​។​

​សារព័ត៌មាន Times of India បាន​រាយការណ៍​ថា អំពើហិង្សា​បាន​ផ្ទុះឡើង​នៅពេល​ដែល​កម្មករ​ប្រមាណ ២.០០០ នាក់​ពី​វេន​យប់ បាន​ចាកចេញ​ពី​អគារ​នៅ​សង្កាត់​ណា​សា​ពូ​រ៉ា កាលពី​យប់​ថ្ងៃ​សៅរ៍​ទី​១២​ធ្នូ​។​

​មនុស្ស​រាប់រយ​នាក់​វាយបំផ្លាញ​រោងចក្រ ដោយ​កម្ទេច​ការិយាល័យ​របស់​នាយក​ប្រតិបត្តិ​ជាន់ខ្ពស់ បំផ្លាញ​គ្រឿងសង្ហារិម អង្គភាព​ដំឡើង និង វាយ​កញ្ចក់​និង​ទ្វារ​ដោយ​ដំបង​។​

​យោងតាម​ប្រព័ន្ធ​ផ្សព្វផ្សាយ​ក្នុងស្រុក រោងចក្រ​នេះ​ជួល​កម្មករ ១៥.០០០ នាក់ ដែល​ភាគច្រើន​ជួល​តាមរយៈ​ក្រុមហ៊ុន​ស្វែងរក​ការងារ​ធ្វើ​៕

​កម្មករ​ជាង​១០០​នាក់​ត្រូវ​ចាប់ខ្លួន​ពី​បទ​វាយ​បំផ្លាញ​រោងចក្រ​ផលិត iPhone របស់​ក្រុមហ៊ុន Wistron Infocomm

ទីតាំងផ្សាយពាណិជ្ជកម្ម

- Advertisment -

Most Popular