សាខា ក​.​ប​.​ប ខេត្តតាកែវ យក​បន្លែ ផ្លែឈើ ៧ គំរូ នៅ​ទីផ្សារ មក​ពិនិត្យ​រកសារ​ធាតុគីមី


ដោយៈ តាកែវ / តាកែវៈ មុខទំនិញ​កសិផល​ជា​ប្រភេទ​ផ្លែឈើ ៥ មុខ និង​ប្រភេទ​បន្លែ ២ មុខ ដែល​ដាក់តាំង​លក់ នៅលើ​ទីផ្សារ នៅក្នុង​ខេត្តតាកែវ ត្រូវបាន​មន្ត្រី​ជំនាញ​សាខា ក​.​ប​.​ប ខេត្តតាកែវ យកមក​ពិនិត្យ នៅ​មន្ទីរពិសោធន៍​ខ្នាតតូច ដើម្បី​រកសា​ធាតុគីមី នា​ព្រឹក​ទី​១៤ ខែធ្នូ ឆ្នាំ​២០២០ ។​

​ជាមួយនឹង​ការពិនិត្យ​នេះ លោក លី សេរី​សម្បត្តិ ប្រធាន​សាខា​ការពារ​អ្នកប្រើប្រាស់ កិច្ចការ​ប្រកួតប្រជែង និង​ក្លែងបន្លំ (​ក​.​ប​.​ប​) សាខា​ខេត្តតាកែវ បាន​ដឹកនាំ​មន្ត្រី​ជំនាញ សហការ​ជាមួយ​មន្ត្រី​នៃ​មន្ទីរ​ពាណិជ្ជកម្ម​ខេត្ត ចុះ​ត្រួតពិនិត្យ​ទំនិញ ឧបភោគ បរិភោគ ស្ថិតនៅ​ទីផ្សារ​កសិផល សុខ អាន ទន្លាប់ ស្ថិតនៅ ឃុំ​ព្រះបាទ​ជាន់ជុំ ស្រុក​គិរីវង់ ខេត្តតាកែវ​។​

​លោក លី សេរី​សម្បត្តិ បានឱ្យដឹងថាៈ ទំនិញ​ជា​កសិផល ដែល​មន្ត្រី​ជំនាញ បាន​យកមក​ពិនិត្យ ចំនួន ៧ គំរូ មានដូចជាៈ ១-​ផ្លែ​ប៉ោម . ២-​ផ្លែ​ទំពាំងបាយជូរ​,
៣-​ផ្លែក្រូច​ឃ្វិច​, ៤-​ផ្លែក្រូច​សំរាប់ធ្វើ​តែ​ជ្រក់​, ៥-​ផ្លែ​មៀន​, ៦-​បន្លែ​ស្ពៃចង្កឹះ និង​៧-​បន្លែ​ផ្កា​ខាត់ណា​។​

​លោក​ប្រធាន សាខា ក​.​ប​.​ប ខេត្តតាកែវ បានបញ្ជាក់​ថាៈ ការយក​ទំនិញ​កសិផល​នេះ គឺ​យកមក​ធ្វើតេស្ត នៅ​មន្ទីរពិសោធន៍​ខ្នាតតូច របស់​សាខា ក​.​ប​.​ប ខេត្តតាកែវ ដើម្បី​ពិនិត្យ និង​ធានាថា គ្មាន​សំណល់​ថ្នាំ​កសិកម្ម នៅលើ​ទំនិញ​បន្លែ ផ្លែឈើ ចំនួន ៧ គំរូ​នេះ និង​បាន​យក​ទឹក​សូ​លុយ​ស្សុង (GT) ធ្វើតេស្ត​ទៅលើ បន្លែ និង​សូ​លុយ​ស្សុង (PY) ធ្វើតេស្ត ទៅលើ​ផ្លែឈើ​។​

​លោក លី សេរី​សម្បត្តិ បាន​បន្ថែមថាៈ ជា​លទ្ធផល ក្រោយ​ការធ្វើ​តេស្ត ដោយ​យកចិត្តទុកដាក់ រយៈពេល​ជាង ២ ម៉ោង ក្នុងការ​ប្រើប្រាស់ ទឹក​សូលុយស្យុង (GT, PY) ធ្វើតេស្ត​ទៅលើ​បន្លែ ផ្លែឈើ មន្ត្រី​សាខា ក​.​ប​.​ប ខេត្តតាកែវ សង្កេតឃើញថា ពុំមាន​វត្តមាន​សំណល់​ថ្នាំ​កសិកម្ម នៅលើ​បន្លែ ផ្លែឈើ ទាំង ៧ គំរូ ដែល​មន្ត្រី​យើង បាន​យកមក​ធ្វើតេស្ត​នោះទេ​៕/V​

ទីតាំងផ្សាយពាណិជ្ជកម្ម

- Advertisment -



Most Popular