Home ព័ត៌មានជាតិ សន្តិសុខ ​ប៉ូលិស បញ្ជូ...

​ប៉ូលិស បញ្ជូន​មុខសញ្ញា​ចោរលួច​ប្លន់ ៥ នាក់ ទៅ​សាលាដំបូង​ខេត្ត​

​ដោយៈ គ្រញូង / ​បាត់ដំបងៈ នា​ព្រឹក​ថ្ងៃទី​១៤ ខែធ្នូ ឆ្នាំ​២០ ២០ នគរបាល​ព្រហ្មទណ្ឌ​កម្រិត​ស្រាល​ខេត្ត បាន​កសាង​សំណុំរឿង បញ្ជូន​មុខសញ្ញា​ចោរលួច​ប្លន់ ៥​នាក់ ទៅ​សាលាដំបូង​ខេត្ត ក្រោយពេល​សមត្ថកិច្ច​ជំនាញ បាន​ឃាត់ខ្លួន​ជនសង្ស័យ បានជា​បន្តបន្ទាប់ ពីបទ​ប្លន់​ម៉ូតូ មួយគ្រឿង របស់​កម្មករ​លីសែង​បន្លែ នៅ​ផ្សារ​ភូ​ពុ​យ ស្ថិត​ក្នុងភូមិ​អណ្តូង​ចេញ សង្កាត់​អូរ​ចារ ក្រុង​បាត់ដំបង​។​

​លោក​វរសេនីយ៍ឯក ឈឿង គឹម​សុង នាយការិយាល័យ​ព្រហ្មទណ្ឌ​កំរិត​ស្រាល​ខេត្ត បាន​ឲ្យ​ដឹងថា ជនសង្ស័យ ប្រុស​ទាំង​៥​នាក់ មានៈ ១- ឈ្មោះ ហូ ឌឿ​ន ហៅ ដូង អាយុ ៤២ ឆ្នាំ នៅ​ភូមិ​ទូល​តា​ឯក សង្កាត់​ទូល​តា​ឯក ក្រុង​បាត់ដំបង​, ២ -​ឈ្មោះ មូល សុ​គុណ អាយុ ២០ ឆ្នាំ នៅ​ភូមិ​ព្រៃ​កូន​សេក សង្កាត់​អូរ​ចា ក្រុង​បាត់ដំបង​, ៣-​ឈ្មោះ លុន រ៉ា​ឆា ហៅ វីន អាយុ ១៩ ឆ្នាំ នៅ​ស្រុក​ក្រគរ ខេត្តពោធិសាត់​, ៤.​ឈ្មោះ ពាង សុខ​ងី អាយុ ២៣ ឆ្នាំ នៅ​ភូមិ​កណ្ដាលស្ទឹង ឃុំ​អណ្ដើក​ហែប ស្រុក​រតនមណ្ឌល និង​៥.​ឈ្មោះ យាន វិ​ជ្ជ​តា ហៅ វីត អាយុ ១៥ ឆ្នាំ នៅ​ភូមិ​កំពង់​ពិល ឃុំ​វត្ត​តា​មិ​ម ស្រុក​សង្កែ ។ ចំណែក​វត្ថុតាង ដែល​ដកហូត​បាន មាន​ម៉ូតូ ២​គ្រឿង ក្នុងនោះ មួយគ្រឿង ជា​ម៉ូតូ​របស់​ជនរងគ្រោះ និង​មួយគ្រឿង​ទៀត ជា​របស់​ក្រុម​ជនសង្ស័យ ជិះ​ធ្វើ​សកម្មភាព​ប្លន់ និង​កាំបិត​ច្នៃ ចំនួន ២ ដើម​ទៀត​។

​លោក​បាន​បន្តថាៈ ជនសង្ស័យ​ទាំង ៥​នាក់​នេះ បានធ្វើ​សកម្មភាព តាម​វាយ​ប្លន់​យក​ម៉ូតូ ១ គ្រឿង នៅ​ម៉ោង ១២ យប់​ថ្ងៃទី​១១ ធ្នូ នៅ​ជិត​ផ្សារ​ទំនើប ភូ​ពុ​យ​។
​ជនរងគ្រោះ ជា​ម្ចាស់​ម៉ូតូ ឈ្មោះ ឈាន សាមុត ភេទ​ប្រុស អាយុ ១៩ ឆ្នាំ ជា​កម្មករ​លី​បន្លែ នៅ​ផ្សារ​នេះ​។ ក្រោយ​ធ្វើ​សកម្មភាព​រួច កម្លាំង​របស់លោក បាន​ស្រាវជ្រាវ រហូត​ឈានដល់​ឃាត់ខ្លួន​បាន ជា​បន្តបន្ទាប់ ចំនួន ៥ នាក់ កាលពី​ព្រលប់ ថ្ងៃទី​១២ ធ្នូ នៅ​ចំណុច​ភូមិ​ទូល​តា​ឯក សង្កាត់​ទូល​តា​ឯក ក្រុង​បាត់ដំបង​។​

​ដោយឡែក លោក​វរសេនីយ៍ឯក លឹម ពុ​ទ្ធី​ឡា ស្នងការរង​ទទួល​ផែន​ព្រហ្មទណ្ឌ​ខេត្ត បាន​ប្រាប់ថា ក្រោយ​សាកសួរ​រួច លោក​បាន​បញ្ជា​ឲ្យ កម្លាំង​ជំនាញ កសាង​សំណុំរឿង បញ្ជូន​ជនសង្ស័យ​ទាំង​៥​នាក់ និង​វត្ថុតាង ទៅកាន់​សាលាដំបូង​ខេត្ត ដើម្បី​ចាត់ការ​តាមច្បាប់​៕/V

ទីតាំងផ្សាយពាណិជ្ជកម្ម

- Advertisment -

Most Popular