Home ព័ត៌មានអន្តរជាតិ សិង្ហ​បុរី​នឹ...

សិង្ហ​បុរី​នឹង​ទទួល​វ៉ាក់សាំង​Pfizer-BioNTech​នៅ​ចុងខែ​នេះ ហើយ​បន្ធូរបន្ថយ​គម្លាត​សង្គម​

​ប្រែ​សម្រួលៈ​វាសនា​/​សិង្ហ​បុរី​៖ អាជ្ញាធរ​វិទ្យាសាស្ត្រ​សុខភាព​បានអនុម័ត​ការប្រើ​វ៉ាក់សាំង​កូវី​ដ​១៩​របស់​ក្រុមហ៊ុន​Pfizer-BioNTech​នៅ​សិង្ហ​បុរី ហើយ​វ៉ាក់សាំង​ក្រុម​ដំបូង​នឹង​ត្រូវ​បញ្ជូន​មក​ដល់​ប្រទេស​​អាស៊ី​អាគ្នេយ៍​នេះ​នៅ​ចុង​ខែ​ធ្នូ ចំ​ពេល​រដ្ឋាភិបាល​ត្រៀម​បន្ធូរបន្ថយ​ការ​រឹតត្បិត​ខ្លះ​នៅពេលនោះ​។​

​នាយករដ្ឋមន្ត្រី លី សៀន​ឡុង បាន​បញ្ចេញ​អោយដឹង​ក្នុង​សុន្ទរកថា​របស់​លោក​ទៅកាន់​ប្រជាជាតិ​កាលពី​ថ្ងៃ​ចន្ទ​ថា «​ខ្ញុំ​សប្បាយរីករាយ​ណាស់​ដើម្បី​ប្រាប់​អ្នក​រាល់គ្នា​ថា ក្រោយ​ការសិក្សា​ភស្តុ​ង​តាង​វិទ្យាសាស្ត្រ​​និង​ទិន្នន័យ​សាកល្បង​វេជ្ជសាស្ត្រ អាជ្ញាធរ​វិទ្យាសាស្ត្រ​បានអនុម័ត​ប្រើ​វ៉ាក់សាំង​របស់​Pfizer-BioNTech​ដើម្បី​បង្ការ​ជំងឺ​កូវី​ដ​១៩»​។​

​លោក​បាន​បន្ថែមថា នេះ​ធ្វើអោយ​សិង្ហ​បុរី ក្លាយជា​ប្រទេស​ដំបូង​គេ​មួយ​ក្នុងចំណោម​ប្រទេស​ដំបូងៗ​ដែល​ទទួល​វ៉ាក់សាំង​នេះ​។​

​លោក​បាន​បញ្ជាក់បន្ថែម​ថា «​វា​ត្រូវ​រំពឹងថា​នឹង​មក​ដល់​សិង្ហ​បុរី​នៅ​ប៉ុន្មាន​ខែ​ខាង​មុខ​តែ​ក្រុម​ដំបូង​នឹង​មក​ដល់​នៅ​ចុង​ខែ​នេះ​។​បើ​អ្វីៗ​ដំណើរការ​ទៅ​តាម​ផែនការ​យើង​នឹង​មាន​វ៉ាក់សាំង​គ្រប់គ្រាន់​សំរាប់​​គ្រប់​គ្នា​នៅ​សិង្ហ​បុរី ត្រឹម​ត្រីមាស​ទី​៣​នៃ​ឆ្នាំ​២០២១»​។​

​សូមបញ្ជាក់​ថា អង់គ្លេស​ជា​ប្រទេស​ដំបូង​គេ​ដែល​បានអនុម័ត​ប្រើ​វ៉ាក់សាំង​របស់់​Pfizer-BioNTech​កាលពី​ថ្ងៃ​០២​ធ្នូ និង​បន្ទាប់មក​អាម៉េរិក​នៅ​ថ្ងៃ​១១​ធ្នូ​។​

​ការអនុម័ត​ប្រើ​នេះ​កើតឡើង​ចំ​ពេល​ក្រុមហ៊ុន​ឳ​សថ​អាម៉េរិក​Pfizer និង​ដៃគូ​អាឡឺម៉ង់​BioNTech​កាលពី​ខែ​វិច្ឆិកា​បាន​បញ្ចេញ​លទ្ធផល​ចុង​ក្រោយ​មក​ពី​ការសាកល្បង​ទ្រង់ទ្រាយ​ធំ​លើ​វ៉ាក់សាំង​កូវី​ដ​១៩​របស់ខ្លួន ដោយ​បង្ហាញ​ថា​វា​មាន​ប្រសិទ្ធភាព​ការពារ​ជំងឺ​កូវី​ដ​១៩​ដល់​ទៅ​៩៥​ភាគរយ​។​

​កាលពី​ថ្ងៃ​ចន្ទ លោក​លី សៀន​ឡុង​ក៏​បាន​និយាយថា សិង្ហ​បុរី​នឹង​ឈាន​ចូល​ក្នុង​ដំណាក់កាល​ទី​៣​នៃ​ការបើក​ប្រទេស​ឡើងវិញ​នៅ​២​សប្តាហ៍​ទៀត គឺ​ថ្ងៃ​២៨​ធ្នូ​។​ការ​បន្ថូរបន្ថយ​នេះ​នឹង​អនុញ្ញាត​អោយមាន​​ការជួបជុំ​មនុស្ស​ចាប់ពី​៥​ទៅ​៨​នាក់​នៅ​តាម​ទីសាធារណៈ ។​

​ទោះជា​យ៉ាង​ដូច្នេះ​ក្តី លោក​លី បាន​និយាយថា​វីរុស​កូរ៉ូណា​នឹង​មិន​ទាន់​ត្រូវ​កំចា​ត់​បាន​នៅឡើយ ហើយ​នៅសល់​ផ្លូវ​វែងឆ្ងាយ​ទៀត​ដែល​ត្រូវ​ទៅ​៕

​ការចាក់​វ៉ាក់សាំង​នឹង​ត្រូវ​ឡើង​តាម​ការស្ម័គ្រចិត្ត សំរាប់​ពលរដ្ឋ​សិង្ហ​បុរី​ទាំងអស់​

ទីតាំងផ្សាយពាណិជ្ជកម្ម

- Advertisment -



Most Popular